У Гродзенскай вобласці - найхутчэйшы рост цэн на прадукты. Што стала есці даражэй?

Найхутчэйшы рост цэн на харчовую прадукцыю ў Беларусі назіраецца ў Гродзенскай вобласці. За першы квартал 2024 года цэны выраслі на 2,95%. На другім месцы Брэсцкая вобласць — 2,62%, на трэцім — Віцебская — 2,61%. Адпаведныя дадзеныя Белстата прааналізаваў «Позірк».

Што падаражала больш за ўсё?

У Гродзенскай і Магілёўскай абласцях большы рост цэн адбыўся на малако і малочныя прадукты. У Гродзенскай вобласці на 1,43%, у Магілёўскай — на 1,77%. У Брэсцкай і Гомельскай абласцях цэны выраслі на 0,44% і 0,71% адпаведна.

Падобная сітуацыя з рыбай і рыбапрадуктамі. У Гродзенскай вобласці рост цэн адбыўся на 2,33%, у Гомельскай на 2,53%. У Мінску і Брэсцкай вобласці рост быў меншы — 0,26% і 0,79% адпаведна.

Цукар стаў даражэй, а гарбата патаннела

У Гродзенскай, Гомельскай, Магілёўскай і Віцебскай абласцях падаражэў цукар. У Мінску і Брэсцкай вобласці ён стаў танней. А цана на гарбату ў Гродзенскай і Мінскай абласцях, наадварот, — знізілася.

Гродзенская вобласць тры разы была ў лідарах па росту цэн

За апошнія 10 гадоў Мінская вобласць шэсць разоў была ў лідарах па росту цэн. На другім месцы — Брэсцкая вобласць, яна была ў лідарах пяць разоў. Гродзенская і Мінская вобласці - тры разы, Магілёўская — два, а Віцебская — адзін. У той жа час Гомельская вобласць ніводнага разу не патрапляла ў спіс лідараў.

Чытайце таксама: Макароны стала есці даражэй, але праезд на цягніках патаннеў. Што вядома пра інфляцыю і цэны ў лютым 2024 года