У Беларусі пачнуць прывіваць ад віруса папіломы чалавека. Чаму гэта важна?

У нацыянальным календары прышчэпак можа стаць на дзве больш. У яго хочуць унесці прышчэпку ад пнеўмакокавай інфекцыі для ўсіх дзяцей і ад віруса папіломы чалавека (ВПЧ). Апошняя дапаможа абараніцца ад рака.

Вакцынацыя супраць ВПЧ дапаможа абараніць жанчын ад раку шыйкі маткі. Эфектыўнасць прышчэпкі перавышае 90%, піша Office Life са спасылкай на загадчыка аддзялення імунапрафілактыкі аддзела эпідэміялогіі Рэспубліканскага цэнтра гігіены, эпідэміялогіі і грамадскага здароўя Кірыла Ігнатава. У Беларусі рак шыйкі маткі займае другое месца сярод самых распаўсюджаных анкалагічных захворванняў у жанчын. Штогод у краіне дыягназуецца больш за 900 выпадкаў гэтай хваробы, саступаючы па частаце толькі раку грудзей. Зараз прышчапіцца ад ВПЧ можна толькі платна і пры наяўнасці вакцыны. Пры гэтым у многіх краінах гэта прышчэпка бясплатная і ўключана ў нацыянальныя праграмы.

Ад пнеўмакокавай інфекцыі за кошт бюджэту ў Беларусі зараз вакцынуюць толькі дзяцей у групах рызыкі.

Усе прышчэпкі, уключаныя ў нацыянальны каляндар, даюцца бясплатна, але для некаторых інфекцый ёсць платныя аналагі. Прафілактычныя прышчэпкі можна рабіць у паліклініках.

Зараз у календары прафілактычных прышчэпак 12 інфекцый. Гэта:

• вірусны гепатыт В,
• сухоты,
• коклюш,
• дыфтэрыя,
• слупняк,
• поліяміэліт,
• гемафільная інфекцыя,
• адзёр,
• эпідэмічны паратыт,
• краснуха,
• грып і пнеўмакокавай інфекцыя ў групах рызыкі.

Чытайце таксама: Гродзенскія медыкі выкарыстоўваюць штучны інтэлект, каб выяўляць анкалагічныя захворванні