Веламарафон «Суседзі» пройдзе на Аўгустоўскім канале 12-ы раз: стала вядома дата

Веламарафон «Суседзі» на Аўгустоўскім канале адбудзецца 20 ліпеня 2024 года. У гэтым годзе спаборніцтва будзе толькі на веласіпедных дыстанцыях. Раней у праграме была і бегавая дыстанцыя, але цяпер яе вывелі ў асобную падзею.

Лагер спаборніцтваў будзе працаваць на тэрыторыі шлюза «Дамброўка» з 19 па 20 ліпеня. Рэгістрацыю абяцаюць адкрыць у бліжэйшы час на сайце «Таймінг кампаніі 42 195».

Побач з каналам адбудуцца іншыя спаборніцтвы

У гэтым годзе з праграмы веламарафону «Суседзі» прыбралі спаборніцтвы па бегу, якія ўвялі ў 2022 годзе. Але 21 ліпеня на тэрыторыі палацава-паркавага ансамбля «Свяцк» адбудуцца спаборніцтвы «Свяцкі трыятлон».

У «Свяцкім трыятлоне» прадугледжаны дзве дыстанцыі. Першая — заплыў на 1,5 км., велазаезд на 40 км., а таксама бег на 10 км. Другая — заплыў на 750 м., велазаезд на 20 км., бег на 5 км.

Што такое веламарафон «Суседзі»

Веламарафон «Суседзі» — штогадовая міжнародная спартыўная падзея. Яго арганізоўваюць на Аўгустоўскім канале веласіпедысты Гродна з 2011 года. У 2020 і 2021 годзе марафон не праводзілі. Прычына — неспрыяльная эпідэміялагічная сітуацыя.

Папярэднія гады змяняліся арганізатары

Раней веламарафон «Суседзі» арганізоўвала грамадскае аб’яднанне раварыстаў «ВелаГродна». Летам 2021 года ўлады ліквідавалі арганізацыю. На марафоне «Суседзі 2022» з папярэдняй каманды арганізатараў і валанцёраў было ўсяго некалькі чалавек.

Летась арганізацыяй займаліся Гродзенскі гарвыканкам і «Таймінг кампанія 42 195».

Чытайце таксама: «Хто будзе адстойваць правы раварыстаў?» Улады хочуць ліквідаваць «ВелаГродна», з якім раней супрацоўнічалі