У Гродне прайшло грамадскае абмеркаванне праекта новага дома на Дзевятоўцы на вуліцы Курчатава. На прэзентацыі праекта будучыя суседзі паскардзіліся, што і без яго не могуць выйсці з пад’езда — іх двор выкарыстоўваюць як праязны па дарозе на рынак. Ёсць і іншыя праблемы: вада ў падвалах, адсутнасць парковак і дзіцячай пляцоўкі.
11-павярховы будынак з двума пад’ездамі збіраюцца пабудаваць у квартале паміж вуліцамі Курчатава, Ліможа, Брыкеля і Дзяржынскага, за падстанцыяй хуткай дапамогі на «Дзевятоўка-1». Адрас шматпавярхоўкі будзе вул. Курчатава, 3. Зараз там пустка, на якой мясцовыя жыхары паркуюць машыны. У новым доме будзе 80 кватэр, куды разлічваюць пасяліць 227 чалавек. Будаўніцтва зойме ўчастак плошчай 0, 73 га.
Заезды да новага дома хочуць арганізаваць з вуліц Дзяржынскага і Курчатава. Паркоўкі на 48 і 40 месцаў будуць з двух бакоў ад дома. Транзітны праезд праз жылую зону праект выключае. Асноўным хутчэй за ўсё будзе заезд з Курчатава, бо вуліца Дзяржынскага часта загружана. Спартыўную і дзіцячую пляцоўку збіраюцца размясціць за адной са стаянак, амаль у тарцы дома па вуліцы Курчатава, 28, адзначае «Вечерний Гродно». Гэта адзінае месца, вольнае ад камунікацый. З-за камунікацый і блізка размешчанага дзіцячага сада № 78 сам будучы дом не могуць нікуды перамясціць.
Усе едуць на рынак праз двор
Жыхары суседніх дамоў па Курчатава, 26 і Дзяржынскага, 125 баяцца, што новы дом прынясе ім шмат праблем. Каля іх дамоў ужо зараз ездзіць столькі машын, асабліва ў гадзіны пік, што немагчыма выйсці з пад’езда, паскардзіўся адзін з жыхароў на прэзентацыі праекта. Уся справа ў тым, што такім шляхам жыхары навакольных шматпавярховак едуць на размешчаны побач міні-рынак — так бліжэй. З гэтай праблемай звярталіся ў розныя інстанцыі, у тым ліку ў ДАІ, але рэакцыі так і не дачакаліся. Калі побач з’явіцца новы дом, сітуацыя толькі пагоршыцца. Адзін з мясцовых жыхароў прапанаваў зрабіць праезд да новага дома з боку Ліможа.
Вада ў падвалах
Яшчэ адна праблема, якую можа абвастрыць новы дом на Дзевятоўцы — навакольныя дамы падтапляе. На месцы, дзе плануюць забудову, доўгі час ужо быў катлаван пад будаўніцтва дома. У ім стаяла вада, і ён быў больш падобны на возера. Катлаван засыпалі, і вада пайшла ў падвалы суседніх дамоў.
«Потым пабудавалі новы дом вокны ў вокны, і мы зараз наогул як у Венецыі — вады стала яшчэ больш. Павінны ж быць дрэнажныя студні. А будзе гмах, зусім „паплывем“», — падзяліліся асцярогамі суседзі.
Няма парковак і дзіцячай пляцоўкі
Акрамя таго, мясцовым ужо не хапае парковачных месцаў. Пры суседніх новабудоўлях паставілі шлагбаумы. Калі на ўездзе на стаянку пры новым доме таксама паставяць шлагбаум, жыхарам Курчатава, 26 і Дзяржынскага, 125 не будзе дзе паставіць свае машыны. Яны просяць архітэктараў прадугледзець дадатковыя месцы і для іх.
Таксама яны баяцца, што на дзіцячую пляцоўку каля новага дома не будзе доступу жыхарам іншых дамоў - а ў іх дварах пляцовак няма. На Курчатава, 26 ёсць толькі пясочніцы, больш дзецям гуляць няма дзе.
Будучыя суседзі просяць пабудаваць новы дом на Дзевятоўцы не каля іх, а каля «Еўраопта» на Ліможа. На пустцы ж яны хутчэй гатовы самастойна пасадзіць дрэвы і ўладкаваць стаянку і дзіцячую пляцоўку.
Чытайце таксама: Спорную высотку у «Фиалки» построят в другом месте. Сработал «фактор Караника»?
