Святы працягваюцца: калі яшчэ чакаць чэргаў на мяжы

Чэргі на мяжы з Еўразвязам беларусы мераюць не ў колькасці машын, а ў дзясятках гадзін. Дні напярэдадні каталіцкіх Калядаў уразілі стаяньнем у бок Беларусі па 40−60 гадзін. Калі яшчэ чакаць калапсу ў пунктах пропуску і ад чаго ён залежыць?

Прагнозы чэргаў на мяжы можна рабіць на аснове мінулых гадоў. Пры гэтым варта ўлічваць, што зараз на мяжы з ЕС працуе на чатыры пагранпераходы менш, чым год таму. Тыдзень з 18 па 25 снежня Telegram-праект «ГраницаВУ Беларусь-ЕС» называе самым складаным за год год для вяртання ў Беларусь. Пік чэргаў прыпадае на 22−25 снежня. У гэты перыяд канал рэкамендаваў уезд у Беларусь праз літоўскія ці латвійскія пункты — далей ад Польшчы. Чаканне ў «Тэрэспалі» («Брэст») і «Райгардас» («Прывалка») прагназавалі больш за суткі. Таксама папярэджвалі, што ў гэтыя дні будзе агульная чарга (для грамадзян ЕС) на выезд з Літвы. У гэты ж перыяд — з 22 да вечара 26 снежня выезд з Беларусі адносна свабодны.

Сапраўды, у чэргах сотні машын стаялі па двое сутак і больш, да 60 гадзін. Рэйсавыя аўтобусы таксама затрымліваліся. Пры ўездзе ў Беларусь вялікая затрымка адбываецца з беларускага боку: памежнікі праводзяць узмоцнены кантроль, патрабуюць выгружаць рэчы з машын і на «зялёным», і на «чырвоным» каналах, і старанна іх пераглядаюць. Не зніклі і паглыбленыя дагляды для людзей з «пратэстных» спісаў, допыты ад супрацоўнікаў КДБ з праглядам змесціва тэлефонаў для ўкраінцаў і беларусаў з замежнымі пашпартамі і відамі на жыхарства.

У апошнія дні даходзіла да жорсткіх канфліктаў паміж кіроўцамі ў чэргах. Людзі шукалі цёплыя рэчы, ежу. У польскай кавярні каля КПП засталася толькі вада і печыва, а ў чарзе ў туалет стаяла па 70−80 дзяўчат. Месцы ў чарзе на мяжу прадавалі па 300−500 у.а.

Якія чэргі на мяжы будуць у бліжэйшыя дні?

• Увечары 26 і 27 снежня паволе прагнозаў канала аб мяжы вырасце чарга на выезд з Беларусі ў ЕС.
• 29 і 30 снежня зноў павялічацца чэргі ў зваротным кірунку, з ЕС у Беларусь.
• У другой палове дня 29 снежня і 30−31 снежня выезд з Беларусі будзе адносна свабодным.
• 1 студзеня з Польшчы ў Беларусь і з Беларусі ў Польшчу ў 2022 і 2023 гадах выехала менш за ўсё машын.
• 5−6 студзеня выезд з Беларусі будзе адносна хуткім. 6 студзеня ў Польшчы, куды многія едуць па пакупкі, выхадны (свята Трох Каралёў, або Багаяўленне).
• 7 студзеня канал прадказвае вялізныя чэргі на выезд з Беларусі. Рэкамендуюць выбіраць латышскі пункт пропуску «Грыгароўшчына» («Патэрніекі»).

У 2023 годзе менш за ўсё машын з Беларусі ў Польшчу ўехала 10 лютага, а праз Цярэспаль, ужо пасля закрыцця «Баброўнікаў» — 9 красавіка (на каталіцкі Вялікдзень).

Што на мяжы зараз

26 снежня чэргі пачалі памяншацца, але ўсё роўна на праходжанне мяжы кіроўцы раяць закладваць суткі. Тыя, хто прайшоў літоўскую мяжу ў гэты дзень, у чарзе ў пункце «Катлоўка» («Лаварышкес») у бок Беларусі стаялі па 36−41 гадзіну. У «Беняконях» («Шальчынінкай») на 26 снежня праходжанне заняло «ўсяго» 20 гадзін. У «Каменным Логу» («Мядзінінкай») стаялі па 44 гадзіны толькі да пашпартнага кантролю з літоўскага боку.

На адзіным адкрытым на латышскай мяжы пункце пропуску «Патэрніекі» («Грыгароўшчына») у бок Беларусі 26 снежня чарга заняла 22−23 гадзіны.

Месца ў чарзе на адзіным адкрытым польскім пункце пропуску «Цярэспаль» («Брэст») прадаюць за 300 у.а., напісалі ў чаце мяжы. Затрымкі там рэзка выраслі з 23 снежня. Кіроўцы стаялі па 45 гадзін і ад роспачы сігналілі, каб прыцягнуць увагу памежнікаў да праблемы. Днём 26 снежня зрух там у бок Беларусі за 5 гадзін склаў 2 км. Кіроўцы пішуць, што стаяць па 30 гадзін і яшчэ не дабраліся да шлагбаума, і адзначаюць, што «палякі працуюць хутка, а далей затор». На аўтобусе мяжа ў бок Беларусі ў пасажыраў, якія падселі ў аўтобус ужо перад шлагбаумам, заняла 7 гадзін. У бок Польшчы мяжу аўтобус прайшоў за 1 гадзіну 45 хвілін.

«Прывалка» — самая павольная

Многія кіроўцы скардзяцца на бліжэйшы да Гродна пункт «Прывалка» («Райгардас»). У адным з чатаў, прысвечаных праходжанню мяжы, пра «Прывалку» пішуць як пра самы «павольны» пункт пропуску. Увечары 25 снежня ў чарзе там стаялі больш за 240 машын, час чакання быў больш за 50 гадзін.

«Рух ёсць, але па 20 м у гадзіну. На Беняконях за раз па 100 м за пару гадзін паўкіламетра праходзяць, а тут з ночы на ​​200 м прасунуліся», — напісаў адзін з карыстальнікаў чата ў 13.30 26 снежня. Раніцай 26 снежня ў чарзе з боку Літвы стаялі 160 легкавых машын. А вось з боку Беларусі праходжанне мяжы заняло ўсяго 3,5 гадзіны.

Некаторыя спрабуюць аб’ехаць чаргу. «Я адстаяў двое сутак. Цяпер стаю 6 перад шлагбаўмам. Па вопыце скажу што пакуль хтосьці тусуецца ля шлагбаўма з чаргі, то не лезуць па-за чаргой. Тры змены да гэтага часу былі нармальныя ахоўнікі і мы іх прыгаварылі запускаць па 10 машын, каб напружваць пагранцоў лт [літоўскіх — Hrodna.life]. І чарга рухалася нармальна. Цяпер заступіў ахоўнік, які пускае ўсіх з нагоды і без. Таму раю ісці ў пачатак і кантроліць. Учора пасля нашага паходу да начальніка змены пачалі працаваць хутчэй. Цяпер зноў вернецца і будзе 6 машын у гадзіну. Лічыце колькі часу страціце, калі ў гадзіну будуць лезці па тры па-за чаргой», — напісаў адзін з кіроўцаў пра «Прывалку» ў чаце 26 снежня.

Чытайце таксама: Дзяржпагранкамітэт стварыў Telegram-бот: можна глядзець чэргі і стварыць маршрут