Пад Гальшанамі прадаюць 100-гадовы спіртзавод па цане 20-гадовага аўто

Спіртзавод 1907 года пабудовы ў вёсцы Міхайлаўшчына быў раней часткай маёнтка Скіндараў. Зараз яго выставіў на продаж Гальшанскі сельвыканкам. Стартавая цана — 14 800 рублёў ($ 4620 па курсе Нацбанка).

Будынак узведзены з камянёў і цэглы, мае плошчу 411,9 кв.м. У 2021 годзе ён быў прызнаны безгаспадарнай маёмасцю, у яго не было ні інвентарнага нумару, ні прызначэння. Да будынка спіртзавода ідзе ў камплекце зямельны ўчастак плошчай 0,2759 га у арэнду на 50 гадоў. Мэтавае выкарыстанне ўчастка — для «будаўніцітва і абслугоўвання будынка невысветленага прызначэння».

Аўкцыён пройдзе на электроннай пляцоўцы Беларускай універсальнай таварнай біржы 29 студзеня 2024. Пераможца аўкцыёна будзе мець тры гады, каб пачаць карыстацца набытай нерухомасцю.

Ён будзе мець права пабудаваць на ўчастку жылы дом, культурна-асветніцкі аб’ект, гандлёвы аб’ект або кропку грамадскага харчавання, бытавога абслугоўвання ці іншы аб’ект, які будзе абслугоўваць насельніцтва. Пра абмежаванні па рэканструкцыю будынка інфармацыі ў апісанні аўкцыёну няма. У дзяржаўным спісе гiсторыка-культурных каштоўнасцей Беларусі былога спіртзавода няма.

Чытайце таксама: У Карэлічах распрацуюць праект зон аховы на будынак былога бровара

Маёнтак Скіндараў у Міхайлаўшчыне і што ад яго засталося

Фальваркам Міхалаўшчызна з другой паловы XIX ст. валодала сям’я Скіндараў. Сядзіба канца XVIII — пачатку XIX ст. дасталася ім ад папярэдніх уласнікаў. У гады Першай сусветнай вайны ў панскіх дамах размяшчаўся шпіталь, піша канал «Спадчына». Пазней тут адкрылі льноперапрацоўчую вытворчасць. У гады Другой сусветнай немцы трымалі ў будынках ваеннапалонных.

Паводле даследчыка Анатоля Федарука, спіртзавод (яго яшчэ называюць броварам) пабудавалі Скіндары ў 1891 годзе, а ў 1907 яго рэканструяваў апошні ўласнік Чэслаў Скіндар.

Захаваліся фрагменты парку, брамы, гаспадарчыя пабудовы. Сядзібны дом не захаваўся — на яго месцы сёння адміністрацыйны будынак.