Ілюстрацыя Hrodna.life
Жыхар Гродна прайшоў медкамісію ў ваенкамаце і апынуўся непрыдатным да службы ў ваенны час з-за плоскаступнёвасці і дэфармацыі стоп. Але ў 2023 годзе ў спіс хвароб, па якіх мужчыны вызваляюцца ад пераагляду, унеслі змены. Цяпер хлопцу трэба зноў яго праходзіць. Ён палічыў гэта парушэннем сваіх правоў і пайшоў у суд.
Грамадзянскі працэс разглядалі ў судзе Ленінскага раёна Гродна з удзелам прадстаўнікоў ваеннага камісарыята горада і раёна і вобласці.
Гродзенец лічыць, што дзеянні ваеннага камісарыята Гродна і раёна ўшчамляюць яго правы. Хлопец паведаміў, што прызыўная камісія прызнала яго нягодным да ваеннай службы ў мірны час і абмежавана прыдатным да службы ў ваенны час. Яго залічылі ў запас, выдалі яму ваенны білет і вызвалілі ад абавязковага медагляду (пераагляд звычайна праводзіцца кожныя тры гады). Узрост хлопца ў рашэнні суда не пазначылі.
Пасля змены закона хлопец атрымаў позву на медагляд. Гродзенец лічыць, што ўнесеныя ў прававыя акты змены не маюць зваротнай сілы, а праходжанне пераагляду ўшчамляе яго Канстытуцыйныя правы. Ён прасіў суд прызнаць дзеянні ваенкама незаконнымі і вызваліць яго ад медкамісіі.
Змены ўнесены пастановамі Міністэрства абароны і Міністэрства аховы здароўя
Фактычна, пашырылі спіс хвароб, з якімі беларусы цяпер прыдатныя або часткова прыдатныя для тэрміновай службы.
Прадстаўнік ваенкамата прасіў у задавальненні скаргі адмовіць, бо дзеянні вайсковага камісарыята заснаваныя на законе і не ўшчамляюць правы гродзенца.
Ён паведаміў, што хлопец сапраўды прызнаны непрыдатным згодна з п."в" арт. 68 графы 1 дзеючага раскладу хвароб — плоскаступнёвасць і дэфармацыя стоп. Гродзенец тры гады не праходзіў медагляду. Цяпер жа п. «в» арт. 68 выключаны з пераліку захворванняў, па якіх грамадзяне вызваляліся ад абавязковага медыцынскага агляду. Цяпер ваенныя камісары павінны пераправерыць у тым ліку вызваленых на падставе гэтага пункта ад службы.
Акрамя гэтага, медыцынскі агляд неабходны і для вызначэння крытэрыяў прыдатнасці да ваеннай службы ў ваенны час і прыцягнення да ваенных збораў, паведаміў прадстаўнік.
Справу спынілі за непадведамаснасцю судам, паколькі дадзеныя праваадносіны рэгулююцца спецыяльным заканадаўствам.
Zerkalo.io пісала пра падобныя выклікі нягодных раней да тэрміновай службы хлопцаў. У пачатку 2023 года, калі спіс хвароб толькі змяніўся, у вайсковым камісарыяце Брэста і Брэсцкага раёна тлумачылі: закон зваротнай сілы не мае.
Юрыст, які працуе з прызыўнікамі, тлумачыць: сітуацыя з перааглядам «не з’яўляецца зваротнай сілай закона», таму няма ніякіх парушэнняў у тым, што хлопцаў сталі выклікаць у ваенкамат. Калі ваеннаабавязаны не з’явіцца на пераагляд, яго чакае адміністрацыйная адказнасць па арт.26.3 КаАП «Парушэнне грамадзянамі абавязкаў па воінскім уліку» (штраф у тры базавыя велічыні). Арт. 435 КК «Ухіленне ад мерапрыемстваў па прызыву на вайсковую службу» на яго не распаўсюджваецца, бо яго клічуць на пераагляд, а не на прызыў.
Сэрвіс бясплатнай юрыдычнай дапамогі беларусам Legal Hub на «Белсат» у чэрвені 2023 года раіў звяртацца ў суд са скаргай на незаконныя дзеянні ваенкамата. «Практыка разгляду такіх скаргаў адносна новая: суды і ваенкаматы апынуліся да яе не гатовыя. Здараецца, што дастаткова проста скаргі - і нават без суда ваенкамат пераглядае ўласныя дзеянні», — паведамлялі тады юрысты.
Чытайце таксама:
У Гродне запланавалі бягучы рамонт авальнай залы ў Новым замку. Работы завершаць да канца снежня.…
У Гродзенскім дзяржаўным універсітэце ім. Янкі Купалы месцы ёсць для 82,1% тых, каму яны патрэбны,…
Турыстка прыехала ў Гродна і хацела сфатаграфавацца на фоне вядомай гродзенскай фотазоны - гродзенскага ўніверсітэта,…
Гродзенскі гарадскі выканаўчы камітэт вызначыў месцы, дзе ў Гродне забаронена збіраць подпісы выбаршчыкаў за вылучэнне…
Карціну з выявай помніка Антонію Тызенгаўзу ў гродзенскім Фарным касцёле выставілі на польскі аукцыён Onebid.…
На Карла Маркса, 10 з'явілася чайхана "Халяль" - з мантамі, пловам і лавашам з тандыра.…