У Гродзенскай вобласці ўзяліся адпрацоўваць падпіскі на “экстрэмісцкія” рэсурсы ў Instagram. У апошні час такія справы з’яўляюцца ў банку судовых рашэнняў. Усе яны падобныя: жыхароў вобласці затрымлівалі дома за “захоўванне з мэтай распаўсюджвання” экстрэмісцкай інфармацыі. Але рашэнні суддзяў – розныя. Выпадкі апісвае Telegram-канал «Право имеют».
Судзілі бацьку малалетніх дзяцей
Напрыклад, бацьку малалетніх дзяцей судзілі за распаўсюджванне экстрэмісцкіх матэрыялаў па ч.2 арт. 19.11 КаАП у судзе Кастрычніцкага раёна Гродна. Ён быў падпісаны і захоўваў у Instagram “з мэтай распаўсюджвання” экстрэмісцкую прадукцыю. Мужчына прызнаў віну. Яго аштрафавалі на 15 базавых велічыняў – 555 рублёў – з канфіскацыяй тэлефона.
Судзілі настаўніка і беспрацоўную
9 кастрычніка ў судзе Астравецкага раёна судзілі настаўніка біялогіі мясцовай школы па ч.2 арт. 19.11 КаАП. Яна была падпісана на Zerkalo.io у Instagram. Гэта палічылі захоўваннем з мэтай распаўсюджвання экстрэмісцкай прадукцыі. Судзячы па прысудзе, жанчыну затрымалі ў яе дома. Яе арыштавалі на двое сутак – залічылі тое, што яна ўжо адбыла. Тэлефон не канфіскоўвалі.
Таксама ў той жа дзень судзілі беспрацоўную – за падпіску ў Instagram на «Белсат». Яе таксама арыштавалі на двое сутак і пакінулі тэлефон.
Судзілі замежніка і грузчыка
Па ч.2 арт. 19.11 КаАП гродзенца судзіў суддзя Ленінскага раёна Гродна ў выязным судовым паседжанні ў будынку РАУС. Ён нібыта захоўваў у Instagram “з мэтай распаўсюджвання” інфармацыйную прадукцыю, прызнаную экстрэмісцкай.
Мужчыну аштрафавалі на 30 базавых велічыняў (1110 рублёў) з канфіскацыяй тэлефона.
Што яшчэ вядома пра суды за распаўсюд экстрэмісцкіх матэрыялаў?
Практычна праз дзень у Гродзенскай вобласці праходзяць суды за распаўсюджванне экстрэмісцкіх матэрыялаў. Як мінімум раз на тыдзень які-небудзь рэсурс прызнаюць экстрэмісцкім. У верасні і кастрычніку актыўна затрымлівалі падпісчыкаў былога журналіста Hrodna.life Руслана Кулевіча – яго персанальныя сацсеткі прызналі экстрэмісцкай інфармацыяй. Сярод затрыманых — гродзенкі, дальнабойшчык, святар Андрэй Наздрын.
Чытайце таксама: Як не стаць экстрэмістам ў Беларусі? Юрыст — аб пакаранні за падпіску, лайк і рэпост
