Кікбоксёра з Гродна прызналі палітвязнем — яго асудзілі за спробу ваяваць ва Украіне

Гродзенца Паўла Абознага 25 жніўня прызналі палітвязнем. Стала вядома, што яго асудзілі на пяць гадоў калоніі за спробу трапіць на вайну ва Украіне, захоўванне некалькіх патронаў і перавоз анабалічных стэроідаў, паведамляе «Вясна».

Паўла асудзілі:

• па абвінавачванні ва ўдзеле на тэрыторыі замежнай дзяржавы ва ўзброеным фарміраванні або ўзброеным канфлікце, ваенных дзеяннях (ч. 1 арт. 361−3 КК) за намер далучыцца да абаронцаў Украіны,
• захоўванні 12 патронаў (арт. 295 КК),
• незаконным перамяшчэнні праз мяжу моцнадзейнага рэчыва (анабалічны стэроідны прэпарат) (арт.333−1 КК).

На судзе Павел заявіў, што на эмоцыях адрэагаваў на вайну ва Украіне, але пазней адмовіўся ад ідэі баявых дзеянняў. Таксама яму ставілі ў віну незаконны перавоз з Расіі ў Беларусь моцнадзейных рэчываў (100 таблетак станазалола (карыстаецца папулярнасцю сярод украінскіх атлетаў і бодзібілдараў, ствараецца на аснове тэстастэрону для спальвання лішняга тлушчу і стварэння рэльефных цягліц — Hrodna.life), незаконнае набыццё і захоўванне боепрыпасаў (16 гільзаў ад патронаў калібра 9 мм, 12 патронаў калібра 9 мм).

Кікбаксёра пачалі судзіць у Гродзенскім абласным судзе ў лютым 2023 года. Суддзёй прызначылі вядомага па палітычных справах і санкцыях Максіма Філатава.

Чытайце таксама: Суддзя Максім Філатаў, які асудзіў Ашурка і Мажэйку, пайшоў на павышэнне ў Вярхоўны Суд

Павел Абозны — чэмпіён Беларусі па кікбоксінгу, прызёр па тайскім боксе, інтэркантынентальны чэмпіён па кікбоксінгу. Выступаў з 2000 года, правёў больш за 50 персанальных баёў і быў трэнерам па тайскім боксе.

Павел нарадзіўся ва Украіне, паведамляе партал dissidentby.com. Яму 40 гадоў. Ён быў затрыманы ў студзені 2023 года. 20 ліпеня 2023 года быў унесены ў пералік грамадзян Беларусі, замежных грамадзян і асоб без грамадзянства, якія маюць дачыненне да экстрэмісцкай дзейнасці.