Бондарава хоча закрыць сядзібу «Літоўка»: яна знайшла там парнаграфію, разбэшчванне і скажэнне Бібліі

Вольга Бондарава напісала пракурору Гродзенскай вобласці Аляксандру Жукаву з просьбай закрыць сядзібу «Літоўка» ў Навагрудскім раёне. А яшчэ — ацаніць яе дзейнасць па законе і прыцягнуць «вінаватых» да адказнасці. Яна абвінаваціла ўладальнікаў сядзібы па некалькіх артыкулах, заявіла, што яны падманваюць улады і дрэнна ўплываюць на дзяцей. Дасталася і «ЛГБТ-карцінам», і партрэтам прэзідэнта «ў барвова-сінюшным танах».

Што Вользе Бондаравай не спадабалася ў «Літоўцы»?

Першае — працуюць не як сядзіба

Навагрудскі райвыканкам 22 траўня 2023 года выдаў дазвол уласніку аграэкасядзібы «Літоўка» на аказанне паслуг у сферы аграэкатурызму. Бондарава лічыць, што па факце такой дзейнасці там не вядуць. У рэкламе сядзіба пазіцыянуецца як музей з разавымі наведваннямі.

Бондарава адзначыла, што на тэрыторыі няма дамоў для размяшчэння турыстаў і не прадастаўляюцца пакоі для пражывання.

«Усё вышэйпаказанае сведчыць аб падмане ўласнікамі гэтага аб’екта дзяржаўных органаў. Уласнікі аказваюць турыстычныя паслугі, прыкрываючыся дакументамі аб вядзенні аграэкатурыстычнай дзейнасці», — напісала Бондарава.

Другое — асацыяльнасць і парнаграфія

На тэрыторыі аб’екта Бондарава ўбачыла экспанаты «асацыяльнага і парнаграфічнага характару, якія прапагандуюць культ гвалту і жорсткасці»:

• аголеную натуру, прадстаўленую ў перакручанай форме, з наўмыснай дэманстрацыяй геніталій;
• псіхадэлічныя карціны і прадметы;
• карціны ЛГБТ-тэматыкі;
• прадметы з палітычным падтэкстам (падушка з выявай партрэта Прэзідэнта Расійскай Федэрацыі У. У. Пуціна ў барвова-сінюшных танах);
• прадметы і прыстасаванні, якія выкарыстоўваюцца для гвалту над людзьмі;
• малюнак чалавека, тапельца ў крыві;
• барэльефы з фігурамі людзей, якія выпрабоўваюць боль і пакуты, у ненатуральных позах;
• выявы целаў з глыбока нанесенымі ранамі;
• выявы напаўгнілых цел і т. п.

Гэтыя экспанаты, на думку Бондаравай, парушаюць артыкул 19.8. КаАП «Распаўсюд твораў, якія прапагандуюць культ гвалту і жорсткасці». А дэманстрацыя фалаімітатараў і аголеных тэл парушаюць арт.343 КК «Выраб і распаўсюд парнаграфічных матэрыялаў або прадметаў парнаграфічнага характару».

Трэцяе — скажэнне Бібліі

Экскурсавод падкрэслівае, што на ўваходзе на экскурсійную пляцоўку ўстаноўлена драўляная скульптура дэмана Ліліт. «У сваёй прамове гід дае скажоную трактоўку Бібліі, кпіць і перакручваючы факты Святога Пісання, чым абражае рэлігійныя пачуцці вернікаў», — лічыць Бондарава.

Таксама няма дадзеных аб узгадненні праграмы экскурсіі з Міністэрствам спорту і турызму і праходжанні прафесійнай атэстацыі экскурсаводамі.

Чацвёртае — разбэшчванне непаўналетніх

«Выклікае непакой той факт, што на тэрыторыю дадзенага аб’екта дапускаюцца дзеці, у тым ліку самыя маленькія, духоўна-маральнае развіццё якіх знаходзіцца пад асаблівай абаронай дзяржавы. Улічваючы, і што малых на тэрыторыю названага аб’екта дапускаюць бясплатна, а ў пакой катаванняў дык увогуле завабліваюць, складваецца ўражанне, што ўладальнікі аграсядзібы „Літоўка“ мэтанакіравана праводзяць дэструктыўную працу па разбурэнні дзіцячай і падлеткавай псіхікі, разбэшчванню непаўналетніх», — напісала актывістка.

Што такое «Літоўка»?

Фэнтэзі-сядзібу Літоўка ў Навагрудскім раёне адкрыў мясцовы прадпрымальнік Сяргей Коваль. У сядзібе сумясцілі сімвалы і знакі розных культур і рэлігій. Раней за выходныя яе наведвалі да 4000 чалавек.

Сядзібу атачалі скандалы. На сходы людзей і вечарыны на аб’екце людзі скардзіліся мясцовым уладам. У 2019 годзе скончыў жыццё самагубствам Сяргей Коваль. Коваль сябраваў з «біскупам свету» Дзмітрыем Бондарам, якога затрымалі ў Літоўцы і пасля асудзілі на паўтара года калоніі за «свядомае стварэнне для іншай асобы небяспекі заражэння вірусам імунадэфіцыту чалавека (ВІЧ)».

Цяпер трапіць у фэнтэзі-сядзібу можна ў складзе арганізаванай групы. Кіруе сядзібай дачка Сяргея.

Чытайце таксама: «Гэта ведае толькі ён». З’явілася відэа памяці гаспадара незвычайнай сядзібы пад Навагрудкам