Пад Гроднам дабудавалі новы шклозавод. На праект спатрэбілася больш за $ 55 млн

Новы завод пабудавалі за два гады. Каб рэалізаваць праект, ААТ «Гродзенскі шклозавод» у 2019 годзе стаў рэзідэнтам свабоднай эканамічнай зоны «Гроднаінвест».

Новую вытворчасць Гродзенскі шклозавод запускае да свайго 100-годдзю, удакладнілі ў СЭЗ. У студзені 2023 года стала вядома, што ў рамках адладкі абсталявання і прамысловых выпрабаванняў прайшло распальванне шкловарнай печы.

На пачатку лета стала вядома, што Гродзенскі шклозавод атрымае 6 млн рублёў (больш за $ 2 млн) з інавацыйнага фонду Гродзенскага аблвыканкама на сплату крэдыту па будаўніцтве свайго новага прадпрыемства. Крэдыт выдаваў «Банк развіцця Рэспублікі Беларусь».

Навошта ў Гродне новы завод

Новы завод зможа вырабляць шырокі спектр шкляной тары малых памераў любых расфарбовак. Новаўвядзеннем для шкляной галіны стане работа вытворчых ліній у трохкропельным рэжыме і тэхналогія вырабу аблегчанай тары спосабам NNPB. Печ новай вытворчасці зможа вырабляць 220 тон шкла за суткі.

Шклозавод, які працуе ў цэнтры Гродна, ужо не мог пашырацца. Пры гэтым прадпрыемства — адно з трох найбуйнейшых у краіне ў гэтай сферы. Участак для новага будаўніцтва вылучылі ў прамысловай зоне ў Аульсе. За будаўніцтва вырашылі ўзяцца з-за прагназаванага росту попыту на шклотару ў сувязі з паступовым абмежаваннем выкарыстання ПЭТ-бутэлек. Таксама аргументам была высокая доля імпарту ў сегменце тары з бясколернага шкла.

Вытворчасць пачалі будаваць вясной 2021 года. Генпадрадчыкам выступіў ААТ «Гроднапрамбуд». Работы збіраліся завяршыць да кастрычніка 2022 года. У жніўні 2022 года будоўля перажыла пажар. Яго тушылі пяць цыстэрнаў МНС. У канцы 2022 года тэрмін будаўніцтва новага завода працягнулі да 30 чэрвеня 2023 года ўключна.