Праўладная актывістка з Гродна Вольга Бондарава прымусіла гродзенскія ўлады прыбраць са спісу знакавых для горада персон нацыянальных герояў Кастуся Каліноўскага і Тадэвуша Касцюшку. У сваіх пастах яна здзекуецца з працаўнікоў культуры. Адначасова Бондарава абвесціла вайну «Еўраопту»: у рэкламе бонсцікаў знайшла прапаганду ЛГБТ, а саліста гурта «Дразды», які таксама задзейнічаны ў рэкламе сеткі,
палічыла «змагарам-дзяржпераваротчыкам».
Бондарава супраць герояў: Каліноўскі - «тэрарыст», Касцюшка — «барцун супраць Расіі»
Вольга Бондарава напісала ў сябе ў канале, што 10 ліпеня яна звярталася ў Гродзенскі гарвыканкам з просьбай прыбраць са спісу знакавых для Гродна людзей у Цэнтралізаванай бібліятэчнай сістэме Гродна беларускага героя Кастуся Каліноўскага. Актывістка называе яго «польскім тэрарыстам» і «мярзотным масавым забойцам праваслаўнага насельніцтва Беларусі».
Пры гэтым культуру яна называе выключна «культуркай»: піша пра «чарадзейны пендэль пад зад адказным за культурку асобам», «аддзел культуркі ГрГВК».
Згадка пра Каліноўскага з сайта бібліятэчнай сістэмы сапраўды знікла. Падзякаваўшы ўладзе за аператыўнасць, Бондарава настроілася на Тадэвуша Касцюшку. Яго яна назвала «змагаром за Польшчу супраць Расіі». У канцы гнеўнага паста яна дадала: «Суверэнітэт не бывае напалову. Культурны ў т.л.». Пра суверэнітэт ад якой менавіта краіны яна піша, аўтарка не ўдакладніла. Пост быў напісаны ў пятніцу, 21 ліпеня, удзень. На гэты момант — панядзелак, 24 ліпеня — са спісу манументальнай памяці Гродна знік і Касцюшка. Са згадкамі пра нацыянальнага героя Касцюшку ў Гродне Бондарава змагалася і раней.
Бондарава таксама заявіла, што прасіла гарадскія ўлады прыбраць з вакзала і 30-гадовы памятны знак паўстанцам 1863 года. Знак сапраўды знік з тэрыторыі гродзенскага чыгуначнага вакзала. Але, мяркуючы па тым, што яго адразу замянілі на памятную шыльду савецкім партызанам, рашэнне пра гэта было прынята нашмат раней.
Памяць аб нацыянальным герое Тадэвушы Касцюшку ў Гродне ўшанавана ў кафедральным касцёле Святога Францыска Ксаверыя. Там ёсць таблічка з надпісам па-польску 1917 года, усталяваная да сотай гадавіны з дня яго смерці. Яшчэ адна усталяваная ў 2017 годзе злева ад галоўнага алтара касцёла. Яна зроблена з адмысловага шкла і мае надпісы на беларускай, польскай і англійскай мовах: «1817—2017. Тадэвушу Касцюшку — удзячныя нашчадкі».
Чытайце таксама:
- 10 прычын, чаму слава Касцюшкі належыць Беларусі
- Замкі разбураць не будуць, але назвы вуліц «пачысцяць». Як могуць уніфікаваць гісторыі Беларусі і Расіі
Бондарава супраць «Еўраопта»
Бондарава таксама склала калектыўны зварот да адміністрацыі «Еўраопту» ад асобы «грамадзян Беларусі, якія вызнаюць традыцыйныя хрысціянскія каштоўнасці».
Яе абурыла рэклама бонсцікаў і тавараў для школы з «персанажам пад псеўданімам Дзім Дзімыч, які займаецца прапагандай ЛГБТ» і рэклама з удзелам «змагара-дзяржпераваротчыка В. Карпанава».
Дзім Дзімыч — беларускі блогер. У яго Tik Tok — амаль 2 млн падпісчыкаў, на YouTube-канале — 4,5 млн. Яго аўдыторыя — пераважна школьнікі-падлеткі. Прапаганду ЛГБТ Бондарава знайшла ў яго роліках, дзе ён апрануты ў адзенне ружовага колеру, а таксама ў яго жартоўных фота ў сукенцы. Пры гэтым згаданы блогер выступае на праўладных канцэртах і хваліць БРСМ.
«Вычварэнец — гэта заўсёды змагар, бо выступае супраць дзяржавы, зацікаўленай у традыцыйных сем’ях», — піша Бондарава ў калектыўным звароце. Яна прыходзіць да высновы, што такім спосабам «Еўраопт» «загадзя, да выбараў 2025 г., ужо заняўся падрыхтоўкай пратэстнага электарату».
Віталь Карпанаў - вакаліст гурта «Дразды» — рэкламуе дадатак «Е-плюс». Ён таксама выступае на праўладных канцэртах і публічна хваліць Лукашенку. Бондарава абвінавачвае яго ў тым, што ён у 2020 годзе «выступаў з падтрымкай дзяржпераваротчыкаў, пародыямі на Лукашэнку і дагэтуль не раскаяўся публічна».
Актывістка накіравала скаргу міністру ўнутраных справаў Івану Кубракову, у Міністэрства адукацыі і ў МАРГ.
