Амаль насупраць “Прывалу” прадаюць прамысловы водазабор “Пышкі”. Там хочуць зрабіць санаторый ці турыстычный аб’ект. Комплекс каля веласцежкі прадаюць разам з часткай леса.
Водазабор месціцца ў досыць прахадным месцы: паміж Нёманам і велашляхам уздоўж ракі у Пышках, каля паварота веласцежкі у кірунку БЛК.
Комплекс будынкаў дазволена рэканструяваць пад лячэбна-аздараўленчы, курортна-рэкрэацыйны або турыстычны аб’ект.
У комплекс уваходзяць:
- асноўны цагляны аднапавярховы будынак (1975 г.п.), плошча – 659,4 кв.м,
- бетонны адстойнік – 299 кв.м,
- прыбудова з цэглы,
- дашчаная веранда з жалезным дахам,
- металічны навес на слупах – 15 кв.м,
- дашчаны склад – 13 кв.м,
- цагляны аднапавярховы гідравузел – 19,3 кв.м,
- навес для машын з цаглянымі сценамі і аглядальнай ямінай – 87,5 кв.м,
- цагляны туалет,
- бетонная студня глыбінёй 7,8 м, агароджа з брамай, цэментна-бетонная сцежка, асфальтабетонная пляцоўка ў 10,3 кв.м, вадаправодная сетка падымання вады з Нёмана са сталёвых трубаў, падземнае збудаванне пад ўстаноўку прыбораў уліку вады (4,4х3,7 м), кабельная лінія 6 кВ.
У кошт аб’екта таксама ўваходзяць 57 соснаў і 19 дубоў.
Размяшчэнне водазабора “Пышкі” 
Да нядаўняга часу на тэрыторыі здавалі памяшканні пад майстэрні, піша канал Urban Hrodna. Зараз будынак належыць “Гродзенскаму цэнтру нерухомасці”. Паводле апісання аўкцыёна, зараз там няма вадаправоду, электрычнасці, ацяплення і іншых камунікацый.
Плошча надзела – 0,6489 га. Ён цалкам уваходзіць у прыбярэжную зону і зону санітарнай аховы крыніцы пітнога водазабеспячэння.
Пачатковы кошт будынка і права арэнды зямлі на 50 гадоў – 283 409,88 руб. ($95 тыс.). Аўкцыён пройдзе 20 ліпеня.
Чытайце таксама: У Гродне прадаюць недабудаваны цэнтр «Маяк»: там хацелі адкрыць кафэ на трубе вышынёй 30 метраў
