Каранік чакае, што з Расіі ў Гродна паляцяць самалёты

Гродзенскі аэрапорт гатовы прымаць рэгулярныя рэйсы з Расіі. Пра гэта падчас візіта ў Томскую вобласць сказаў старшыня Гродзенскага аблвыканкама Уладзімір Каранік.

«Пытанне аб аднаўленні рэйсаў з Гродна ў Маскву і іншыя гарады РФ перыядычна разглядаецца, аднак канчатковае рашэнне аб аднаўленні пералётаў — за авіякампаніямі з Расіі. Як гаворыцца, мяч на расійскім баку. Калі яны праявяць зацікаўленасць з улікам пасажырапатоку і самаакупнасці, то мы са свайго боку забяспечым поўную гатоўнасць», — сказаў Каранік.

Як можна было лётаць з Гродна ў Расію раней

У 1960-х гадах з Гродна можна было адляцець у Маскву, Кіеў, а таксама ў Крым. Аэравакзал тады размяшчаўся ў вёсцы Караліно, каля Юбілейнага возера. З 2009 года з гродзенскага аэрапорта было два рэгулярных рэйса. Першы — у Калінінград, адзін раз на тыдзень, але ў 2011 годзе яго адмянілі. Другі - ў Маскву. Потым гэтыя рэйсы адмянілі. У 2018 годзе былі размовы пра тое, каб арганізаваць рэгулярныя рэйсы ў Варшаву, Маскву, Санкт-Пецярбург, а ў летні час у Сочы. Але самалёты так і не паляцелі.

У лістападзе 2021 года стала вядома, што з Гродна ў Маскву запусцяць самалёт. Але рэйс адмянілі. Зараз даляцець да Расійскіх гарадоў: Масквы, Краснадара, Санкт-Пецярбурга, Екацерынбурга, Растова на Доне, Новасібірска можна з Мінска.

Супрацоўнікаў аэрапорта год таму адправілі дамоў
У сакавіку 2022 года гродзенскі аэрапорт у Абухава амаль спыніў працу. Большасць супрацоўнікаў адправілі дамоў. Пакінулі ахову і яшчэ некалькі чалавек, якія павінны былі сачыць за кацельнай.