«Фармальныя пасяджэнні». Судзімых у Гродне не бралі на працу — умяшалася пракуратура

Пракуратура Гродзенскай вобласці праверыла, ці дапамагаюць АУС з сацыяльнай і працоўнай рэабілітацыяй вызваленым з месцаў пазбаўлення волі. Аказалася, што занятасць у судзімых выяўлялі толькі пры пастаноўцы на ўлік у крымінальна-выканаўчай інспекцыі РАУС. А пазней — не кантралявалі.

У 2022 годзе ў Гродзенскай вобласці было 1349 вызваленых. Пасля вызвалення яны здзейснілі 191 злачынства.

АУС Гродзенскай вобласці не перадавалі інфармацыю аб вызваленых у органы па працы, занятасці і сацыяльнай абароне і цэнтры сацыяльнага абслугоўвання насельніцтва па пытаннях працоўнай і сацыяльнай рэабілітацыі асоб. Гэтыя парушэнні пры праверцы выявіла пракуратура Гродзенскай вобласці і запатрабавала ліквідаваць.

«Павярхоўны падыход»

Судзімыя ставяцца да групы асоб, якія маюць патрэбу ў сацыяльнай абароне, адзначылі ў пракуратуры. Ад дзяржорганаў залежыць іх рэсацыялізацыя і папярэджанне новых злачынстваў.

«Вынікі пракурорскіх праверак практычна ва ўсіх раёнах вобласці сведчаць аб павярхоўным падыходзе да прыняцця мер па садзейнічанні ў працаўладкаванні грамадзянам, вызваленым з папраўчых устаноў», — лічаць у пракуратуры.

Што яшчэ дзяржорганы рабілі не так?

• не дапамагалі з аднаўленнем дакументаў,
• не кантралявалі бронь райвыканкамам для прыёму на працу тых, хто не здольны на роўных умовах канкурыраваць на рынку працы,
• недастаткова займаліся пытаннямі бытавога ўладкавання бяздомных судзімых.

Назіральныя камісіі пры рай-, гарвыканкамах, мясцовых адміністрацыях таксама рабілі недастаткова. Іх праца часцяком зводзіцца да правядзення фармальных пасяджэнняў і заслухоўвання дакладаў запрошаных асоб, лічыць пракуратура.

Пытанні працаўладкавання судзімых разглядалі рэгулярна, але фактычна занятасць не адсочвалі. А рашэнні камісій не ўтрымлівалі канкрэтных даручэнняў і тэрмінаў іх выканання.

Чытайце таксама: Гродзенскі актывіст з’ехаў з Беларусі праз пераслед. Ён дапамагаў былым зняволеным