Гродзенскія металісты патрапілі ў ТОП-5 гуртoў, якім бы «пазайздросцілі на Захадзе»

Журналіст Аляксандр Чарнуха на сваім YouTube канале «Міністэрства сепультуры» расказаў пра гродзенскі гурт WOE UNTO ME. Журналіст зрабіў агляд на пяць гуртоў, якім бы «пазайздросцілі на Захадзе». У пяцёрку Чарнуха ўнёс і гродзенцаў Woe Unto Me.

«Гурт існуе ўжо 16 год. І за гэты час музыкі запісалі тры поўнафарматныя альбомы. У гэтым годзе як раз выйшаў трэці, з лаканічнай назвай, якую я нават не вазьмуся вымавіць», — сказаў журналіст.

Гурт Woe Unto Me існуе з 2008 года. Першыя тры гады яго ўдзельнікі працавалі над матэрыялам для дэбютнага альбома, а таксама шукалі музыкаў, каб сфармаваць поўны склад. У 2014 годзе гурт выдаў першы альбом «A Step Into The Waters Of Forgetfulness». Другі альбом, які музыкі запісалі ў Польшчы ў 2017, называецца «Among The Lightened Skies The Voidness Flashed». Трэці альбом музыкі апублікавалі ў сакавіку 2023 года. Ён выйшаў на лос-анджэлескім лэйбле M-Theory.

У альбом «Along the Meandering Ordeals, Reshape the Pivot of Harmony» увайшлі пяць кампазіцый, кожная — прыкладна па 12 хвілін. «Класічная гісторыя для дума. Але пры гэтым матэрыял вельмі разнастайны: тут вам і манатонны, пануры пахавальны дум, і меладычныя ўстаўкі з чыстым вакалам, якія ўжо не пра дум, а пра пост-метал, а месцамі Woe Unto Me можна нават пераблытаць з сучаснымі запісамі Behemoth!».

Паводле журналіста, матэрыял у гурта вельмі дасканала прапрацаваны і небанальны. Гучанне песень шчыльнае і якаснае. А песні з альбома часам нагадваюць рознакаляровую мазаіку, але колеры ў ёй самыя змрочныя. «Нейкім чынам яны не развальваюцца на дробныя кавалкі, а наадварот складаюцца ў манументальныя кампазіцыі».

Чытайце таксама: Rammstein і коцікі. Два браты, два айцішнікі і чыгуначнік адыграюць у Гродне трыб’ют улюбёнага гурта