Не менш за восем затрыманняў адбылося ў Гродне на тыдні. Малітва «Аб міры і стваральнай працы ў Рэспубліцы Беларусь» прайшла ва ўсіх раёнах вобласці. Супрацоўніцы Гродзенскага АМАП Дар’я Бандарчук і Марыя Мазуркевіч хочуць спагнаць кампенсацыю маральнай шкоды. Рэдакцыя Hrodna.life вывучыла, што адбылося ў вобласці з 13 па 19 сакавіка.
Затрыманні
Затрыманні па палітычных матывах актывізаваліся 9 сакавіка.
- Гродзенец затрыманы за тое, што зарэгістраваўся ў плане «Перамога» і распаўсюджваў экстрэмісцкія матэрыялы. Мужчыну затрымалі на працы.
- Рамесніка Дзмітрыя Малея затрымалі на працы ў будаўнічай краме. Паводле яго, ён затрыманы за тое, што пісаў паведамленні ў адрас супрацоўнікаў міліцыі. Гэта прадавец крамы «Мировой инструмент» на вул. Перамогі.
- Гродзенца затрымалі за «непахвальныя» каментары ў Telegram-чатах аб праваахоўных органах. Ён прапаноўваў іх «спаліць, выкінуць з краіны, непаважліва ставіцца». Сілавікі сцвярджаюць, што яго прыцягнуць да адказнасці за распальванне варожасці.
- Гродзенец затрыманы за 1200 каментароў у Youtube. У іх мужчына абразіў дзейную ўладу, міліцыю і расійскіх вайскоўцаў.
- Айцішніка затрымалі за распаўсюд у Telegram экстрэмісцкіх матэрыялаў. На камеру ён распавёў, колькі зарабляе ў IT — у дзяржфірме і як ІП.
- На мінулым тыдні затрымалі актывіста Ігара Банцара. Суд вырашыў арыштаваць яго на сем сутак.
- Гродзенку Кацярыну Шуст затрымалі 16 сакавіка за распаўсюд экстрэмісцкіх матэрыялаў. Таксама сілавікі паведамілі, што дзяўчына прайшла рэгістрацыю ў плане «Перамога». Дзяўчына атрымала 10 сутак арышту за распаўсюд «экстрэмісцкіх матэрыялаў».
- Хакейны «Нёман» у першых матчах плэй-оф застаўся без фанацкага актыву — лідара руху Сяргея Емяльянава і яшчэ каля 10 актыўных заўзятараў сталі затрымліваць у Гродне з 9 сакавіка. Сяргея Емяльянава затрымалі, калі ён выходзіў з дому. Затрыманні іншых фанатаў прайшлі на працоўных месцах, на вуліцы ці проста на хакеі, калі «Нёман» праводзіў першы хатні матч плэй-оф чэмпіянату Беларусі супраць наваполацкага «хіміка».
Новыя «тэрарысты»
Рыгора Грыга, Паўла Мякіша і Соф’ю Сапегу 14 сакавіка ўнеслі ў пералік арганізацый і фізічных асоб, якія маюць дачыненне да тэрарыстычнай дзейнасці.
Малітва «Аб міры і стваральнай працы ў Рэспубліцы Беларусь» прайшла ва ўсіх раёнах вобласці
У Дзень Канстытуцыі маліліся праваслаўныя, каталікі, пратэстанты, мусульмане.
— Кожнае богаслужэнне мы звяртаемся да Бога, каб Гасподзь дапамагаў тым, хто кіруе краінай. Але сённяшняя малітва асаблівая. Мы прасілі аб захаванні міру, таму што цяпер ён вельмі далікатны, яго лёгка можна страціць, а часцяком мы нават не ўсведамляем гэтага, не цэнім тое, што маем. Таму мы молімся, каб Гасподзь захаваў мір у нашай краіне. Мы молімся, каб свет быў у душы кожнага з нас, — распавёў айцец Уладзімір, клірык Свята-Пакроўскага кафедральнага сабора.
З касцёла ў Радуні знялі размешчаную шыльду
У Радуні Воранаўскага раёна на Браме касцёла Маці Божай Ружанцовай была размешчана шыльда з надпісам на беларускай і польскай мовах.
У польскім варыянце вуліцу «перайменавалі» з «Леніна» ў «Касцельную». Праўладныя актывісты абурыліся і абвінавацілі ў гэтым каталіцкіх святароў, паведамляе «Хрысціянская візія».
«Бля…ь. Даўно вядома, што ксяндзы — гэта ворагі нашай краіны, амаль усе яны змагарылі ў 2020 годзе, дык чаму ж гэтыя пачвары дагэтуль прапаведуюць у Беларусі?! (…) З сярэднявечча вядома, што каталіцызм на нашых, спрадвечна рускіх праваслаўных землях — гэта зло! Ксяндзы заўсёды ненавідзелі нас — рускіх. Ці не пара выгнаць усю гэтую прапольска, пралітаўскую брыду з цэркваў і прызначыць туды беларусаў, г. зн. рускіх па паходжанні?»
Неўзабаве Леніна вярнулі.
У Беластоку не будзе вуліцы Вольнай Беларусі. Яна захавае ранейшую назву — Электрычная
Пры перайменаванні часткі Электрычнай вуліцы ў вуліцу Вольнай Беларусі парушылі закон. Гэта прызнаў Ваяводскі адміністрацыйны суд. Таму рашэнне гарадскога савета па гэтым пытанні, прынятае ў верасні 2022 года, палічылі несапраўдным.
Рашэнне аб перайменаванні абскардзіла адна з жыхарак вуліцы. 60 жыхароў квартала падпісалі пратэст да гарадскіх уладаў. На вуліцы таксама знаходзіцца консульства Рэспублікі Беларусь, піша bialystok.tvp.pl.
Новыя «экстрэмісты»
Жалудок Кірыл, Біндзей Аляксандр, Нялепка Сяргей з Гродна 17 сакавіка папоўнілі пералік грамадзян Рэспублікі Беларусь, замежных грамадзян або асоб без грамадзянства, якія маюць дачыненне да экстрэмісцкай дзейнасці.
Па тры гады хатняй хіміі атрымалі гродзенкі за акцыі пратэсту ў 2020 годзе
Людміле Мазуркевіч і Наталлі Антонавай вынеслі прысуд у судзе Ленінскага раёна Гродна 17 сакавіка 2023 года. Суддзя Мікалай Козел прысудзіў абвінавачаных да трох гадоў «хатняй хіміі» за ўдзел у акцыях пратэсту ў 2020 годзе, паведамляе Telegram-канал «Суды, задержания. Гродно и область».
У Беларусі зацьвердзілі прэмію Эміля Чачко — «для змагароў за свабоду слова і дэмакратыю ў Еўрасаюзе і Вялікабрытаніі»
Пра гэта на выставе «Мяжа паміж жыццём і смерцю» распавёў старшыня праўлення Міжнароднага дабрачыннага фонду Дзмітрый Белякоў.
Прэмію будуць уручаць штогод у канцы восені. Яе грашовы фонд прэміі складзе $ 18 тыс. Першае месца — $ 10 тыс., другое месца — $ 5 тыс., трэцяе — $ 3 тыс.
Эміль Чачко — польскі жаўнер, які ў снежні 2021 года папрасіў прытулку ў Беларусі, а потым яго знайшлі павешаным у Мінску. У сакавіку 2022 года Чачко пахавалі на могілках у вёсцы Даўгігава Вілейскага раёна.
Ён быў не згодны з «палітыкай Польшчы адносна міграцыйнага крызісу і практыкай негуманнага абыходжання з бежанцамі», быў задзейнічаны ў антыпольскай прапагандзе.
Выдавец Зміцер Колас на волі
Пра вызваленне выдаўца Змітра Коласа паведамілі Reform.by яго сябры.
Беларускі перакладчык і літаратуразнаўца выйшаў на волю сёння пасля 10 сутак арышту, які правёў у «амерыканцы». Выдавец быў затрыманы работнікамі КДБ 4 сакавіка ў сваёй кватэры. Са слоў сяброў, абвінавачванне яму не выстаўленае. Прычыны затрымання пакуль не разгалошваюцца.
Шэраг гульцоў гродзенскага «Нёмана» па-ранейшаму не дапускаюць да матчаў
Іх не было 12 сакавіка на матчы Кубка Беларусі супраць «Віцебска». У «чорным спісе» значацца Валерый Жукоўскі, Яўген Ляшко, Раман Пасевіч, Сяргей Курганскі, паведамляе «Гарадзенская праўда».
«Чорныя спісы» разаслалі ў спорткамітэты выканкамаў. З гульцамі, якія трапілі туды, не павінны заключаць кантракты.
Гродзенца будуць судзіць за экстрэмізм
53-гадовага гродзенца абвінавачваюць у злачынствах экстрэмісцкай накіраванасці. Абвінавачаны са студзеня 2019 года да траўня 2021 размясціў у Telegram паведамленні, у якіх «даваў відавочна негатыўную ацэнку асобы кіраўніка дзяржавы, абвінавачваў яго ва ўчыненні злачынстваў, а таксама публічна абражаў старшыню Цэнтрвыбаркама, для чаго выкарыстаў нецэнзурную лексіку».
Таксама абвінавачаны заклікаў да ўдзелу ў групавых дзеяннях, якія груба парушаюць грамадскі парадак, прымяненню гвалту да супрацоўнікаў праваахоўных органаў, распальваў сацыяльную варожасць і варажнечу (ч.1 арт. 130, ч. 1 арт. 342, ч. 2 арт. 367, ч. 2 арт. 368, арт. 369 КК).
Пракуратура Гродзенскай вобласці накіравала крымінальную справу ў суд. Мужчыну ўзялі пад варту.
Супрацоўніцы Гродзенскага АМАП Дар’я Бандарчук і Марыя Мазуркевіч хочуць спагнаць кампенсацыю маральнай шкоды
Яны накіравалі іск да Паўла Хакала. Грамадзянскі іск разгледзелі ў судзе Ленінскага раёна Гродна 14 сакавіка. Вынікі пакуль невядомыя.
Супрацоўніцы АМАП сталі вядомыя пасля збіцця фармацэўта Марыны Палікарпавай падчас пратэстаў 2020 года. На просьбу прадставіцца яны адказалі: «Я — Маша Лукашэнка, а я — Насця Лукашэнка».
Wildberries выключыў з каталога тавары з нацысцкай сімволікай
Пракуратура Гомельскага раёна запатрабавала ад інтэрнэт-крамы Wildberries выключыць з каталога тавары з выявай нацысцкай сімволікі, паведамляе БЕЛТА.
Работнікі пракуратуры знайшлі налепкі, падвескі і шаўроны з эмблемай «Чорнае Сонца». Эмблема складаецца з 12 радыяльных рун «зіг», падобных на сімвалы, якія выкарыстоўваліся ў эмблеме СС. Пракуратура вынесла прадпісанне, у якім запатрабавала ліквідаваць парушэнні заканадаўства. Кіраўніцтва крамы з гэтым пагадзілася.
З 2022 года 11 чалавек прыцягнулі да крымінальнай адказнасці спробу ўступіць у полк Каліноўскага
Беларусы спрабавалі выехаць з Беларусі для ўступлення ў добраахвотніцкі полк, паведамляе МУС.
Цяпер жа ўзяліся за іх сваякоў, якіх назвалі «ўтоенымі вочкамі садзейнічання». «Удзельнікі экстрэмісцкіх і тэрарыстычных арганізацый, якія знаходзяцца за мяжой, такіх як Полк Каліноўскага і іншых узброеных фарміраванняў, выношваюць планы па дэстабілізацыі абстаноўкі ў Беларусі. Пры гэтым могуць быць выкарыстаны найміты і асобы, якія прайшлі навучанне ў лагерах падрыхтоўкі на Захадзе».
Ларыса Геніюш і нацызм: ці ёсць нешта агульнае і ці заслугоўвае помнік зносу?
Гродзенская актывістка Бондарава называе паэтку Ларысу Геніюш «нацысткай злачынкай» і патрабуе, каб яе помнік у Зэльве знеслі. Яна лічыць, што помнік парушае Закон «Аб недапушчэнні рэабілітацыі нацызму». Адкуль у Бондаравай падставы так называць Геніюш? Што магло звязваць паэтку з нацысцкім рэжымам? Hrodna.life разабраўся.
У рытуальным доме «Ритал» у Гродне праходзіць вобшук
Пасля вобшуку апыталі і адпусцілі амаль усіх затрыманых, уключаючы камерцыйнага дырэктара і ягоную жонку, паведаміў чытач Hrodna.life. У супрацоўнікаў цікавіліся, ці атрымліваюць яны ад дырэктара грошы, акрамя тых, што паступаюць на карту.
Польская мова ў касцёле — не праблема? Разабраліся, чаму прэтэнзіі ідэолагаў да католікаў не маюць падставаў
Чыноўніца з Іўя назвала выкарыстанне польскай мовы ў каталіцкім касцёле ў Беларусі незаконным. Насамрэч, яе словы — лухта. Hrodna.life разам з юрыстам і каталіцкім актывістам разабраўся ў моўнай праблеме. Ці сапраўды забаронена маліцца на недзяржаўных мовах? Якое месца займаюць беларуская, польская і іншыя мовы ў касцёле? Якія яшчэ мовы выкарыстоўваюць канфесіі ў Беларусі? Адказ у нашым матэрыяле.
Бондарава хацела прымусіць завесці чарговую крымінальную справу, але ў міліцыі ёй адмовілі
У міліцыі вырашылі не прыцягваць да крымінальнай адказнасці карыстальніка, які назваў «інфаспецназаўку» Вольгу Бондараву «даўбанутай» і «даўба*бам» у адным з праўладных каналаў. Прычына — Бондарава не службовая асоба.
Былога сілавіка з Гродна асудзілі да 10 гадоў калоніі за «здраду дзяржаве»
Палітзняволенага былога інспектара крымінальна-выканаўчай сістэмы мясцовага РАУС Андрэя Шкляра асудзілі ў Гродзенскім абласным судзе. Яго абвінавацілі паводле двух артыкулаў КК — ч. 1 арт.356 «Здрада дзяржаве» і арт. 407 «Разгалошванне звестак папярэдняга следства або закрытага судовага паседжання».
У Гродне забілі замежніка. Ён аказаў супраціў КДБ
19 сакавіка ў Гродне на вул. Курчатава забілі замежнага грамадзяніна. Яго спрабавалі затрымаць у ходзе аперацыі па «спыненні дзейнасці асоб, якія праніклі на тэрыторыю Рэспублікі Беларусь з мэтай здзяйснення тэрарыстычнай акцыі».
Павел Мажэйка абвінавачваецца ў садзейнічанні экстрэмісцкай дзейнасці
Палітвязняволены журналіст і грамадскі дзеяч Павел Мажэйка абвінавачваецца паводле арт. 361−4 КК «Садзейнічанне экстрэмісцкай дзейнасці». Артыкул, па якім ён праходзіць, назвала яго жонка Ірына Чарняўка.
У Гродне затрымалі супрацоўніка «Гродна Азот». Ён быў сябрам незалежнага прафсаюзу
44-гадовы Максім Сеннік затрыманы ў Гродне. Яго ўзялі пад варту і змясцілі ў СІЗА турмы № 1 Гродна. «Прытрымліваўся апазіцыйных поглядаў і ўдзельнічаў у акцыях пратэсту ў 2020 годзе. Таксама з’яўляўся сябрам незалежнага прафсаюза ААТ „Гродна Азот“. Паддаўшыся ўплыву лідара страйкама „Гродна Азот“ Юры Рававага, скідваў інфармацыю, якую ён размяшчаў у замежных СМІ», — паведаміў мужчына.
Вызваленне Пачобута і яшчэ некаторых палітвязняў маглі абмяркоўваць на нарадзе ў Лукашэнкі
У Мінску нібыта разважалі над вызваленнем часткі палітвязняў, у тым ліку Анджэя Пачобута, але рашэнне быццам бы блакуюць высокапастаўленыя сілавікі. Пра гэта піша Rzeczpospolita са спасылкай на Паўла Латушку і ананімныя крыніцы.
