Бізнэсоўца з Ваўкавыска будуць судзіць за ўдзел у пратэстах

Уладальнік фірмы «Мегасіла» Дзмітрый Марозаў затрыманы па матэрыялах УКДБ па Гродзенскай вобласці і знаходзіцца пад вартай. У дачыненні да яго расследуюцца крымінальныя справы за нявыплату падаткаў і гвалт над міліцыянтам.

Дзмітрыя Марозава будуць судзіць паводле ч. 2 арт. 243 КК «Ухіленне ад выплаты падаткаў, збораў», арт.364 КК «Гвалт альбо пагроза ўжывання гвалту ў дачыненні да супрацоўніка органаў унутраных спраў», паведамляе БелТА.

Яго назвалі «актыўным удзельнікам пратэстаў». «14.09.2020 знаходзіўся ў натоўпе пратэстоўцаў каля будынка Ваўкавыскага райвыканкама», — сказаў мужчына на відэа. Яго запісалі ў СІЗА.

Справа аб падатках

Марозава затрымалі разам з супрацоўнікамі і сям’ёй 24 студзеня. Пазней сям’ю адпусцілі. Паводле версіі КДК, ён раздрабіў бізнэс, каб плаціць менш падаткаў. Дзяржкантроль сцвярджае, што дзякуючы гэтай схеме Марозаў з 2016 года не даплаціў у бюджэт амаль 270 тыс.рублёў падаткаў.

Сілавікі затрымалі чатырох чалавек, аднаго з іх узялі пад варту. У ходзе следчых дзеянняў у падазраваных канфіскавалі больш за $ 200 тыс. і € 250 тыс. Маёмасць Марозава арыштавалі: сярод яго нерухомасць, а таксама транспартныя сродкі.

Яшчэ затрыманні

10 сакавіка ў Беларусі былі затрыманыя яшчэ некалькі чалавек. «У кватэрах — экстрэмісцкая сімволіка, у кампутарах і смартфонах — красамоўныя кадры з пратэстаў. У тым ліку затрыманыя некалькі адміністратараў дэструктыўнага Telegram-канала», — паведамляе БелТА.