Станцыю дэзінфекцыі аўтамабіляў перад пунктам пропуску “Беняконі” на літоўскай мяжы плануюць пачаць будаваць 15 лютага і завяршыць работы да 30 траўня 2023 года. Гэта будзе першая такая станцыя ў Беларусі, хаця пастанова аб абавязковай дэзінфекцыі аўтамабіляў на мяжы ўступіла ў сілу з траўня 2022 года. Дэзінфікаваць аўто будуць платна, а ў выпадку адмовы – не ўпусцяць у Беларусь.
Пра будаўніча-мантажныя працы перад пунктам пропуску “Беняконі” (сумежны – “Шальчынінкай”) і змяненні схемы арганізацыі руху па асобных палосах на дарозе M11/E85 паведаміў Лідскі памежны атрад. Кіроўцам параілі прытрымлівацца патрабаванняў часовых дарожных знакаў.
Указ N154 ад 26 красавіка“Аб абавязковай дэзінфекцыі транспартных сродкаў” апублікавалі вясной 2022 года. Ён набыў моц з 1 траўня 2022 года. З таго часу і дагэтуль дэзінфекцыя на мяжы не прымянялася, звярнуў увагу партал “Аўтабізнес”.
Дэзінфекцыя за маркі
Згодна з указам, увесь транспарт, які ўязджае ў Беларусь праз усе пункты пропуску, падлягае абавязковай дэзінфекцыі на платнай аснове. Аплаціць можна будзе, купіўшы кантрольную марку ў “Белдзяржстраху” і ААТ “АСБ Беларусбанк” у пунктах пропуску праз мяжу.
Калі ў кіроўцы або ўладальніка машыны не будзе такой кантрольнай маркі і ён адмовіцца яе купляць, транспартны сродак не зможа ўехаць у Беларусь.
Парадак арганізацыі і ажыццяўлення абавязковай дэзінфекцыі транспартнага сродку, а таксама лабараторнага кантролю яе якасці вызначаецца Міністэрствам сельскай гаспадаркі і харчавання. Кантраляваць наяўнасць у кіроўцаў або ўладальнікаў аўто кантрольных марак у пунктах пропуску будуць супрацоўнікі памежнай службы, а ў кіроўцаў або ўладальнікаў транспартных сродкаў, памежны кантроль якіх здзяйсняюць мытныя органы, — мытнікі.
Што за кампанія будзе праводзіць дэзінфекцыю
Эксперымент па абавязковай дэзінфекцыі транспартных сродкаў праводзілі з 1 ліпеня 2021 года ў пункце пропуску “Новая Гута” на мяжы з Украінай. Платную паслугу аказвала ТАА “БелГлобалГарант”. Рашэнне аб распаўсюджванні вопыту дэзінфекцыі транспарту на знешніх межах павінны былі прыняць па выніках гэтага эксперыменту.
Згодна з указам, аказваць паслугі па дэзінфекцыі на ўсіх пунктах пропуску таксама павінна будзе ТАА “БелГлобалГарант”. Кампанія існуе з канца 2013 года. Асноўная сфера дзейнасці – аптовы гандаль прадуктамі харчавання. Таксама займаецца будаўніцтвам – напрыклад, шматфункцыйнага комплексу насупраць Палаца незалежнасці ў Мінску. З 2015 года адна з нешматлікіх мае ліцэнзію на імпарт алкаголю – віскі, віна, каньяку, вермута.
На парытэтнай аснове кампанія належыць Сяргею Цяцерыну і Раману Бугайцу. Сяргей Цяцерын – былы старшыня Беларускай федэрацыі тэніса (да жніўня 2021 года), член хакейнай каманды Аляксандра Лукашэнкі. Набліжаны да яго з канца 1990-х гадоў. Раман Бугаец – дырэктар кампаніі, сябар праўлення і спонсар Беларускай федэрацыі тэніса. Яго называлі спонсарам будаўніцтва новага вялікага тэніснага комплексу ў Гродне на Горкага, які адкрыўся амаль год таму.
Ва ўказе сказана, што ТАА “БелГлобалГарант” забяспечыць будаўніцтва і ўвядзенне ў эксплуатацыю станцый дэзінфекцыі за кошт уласных сродкаў.
На мяжы і так праблемы
Адзін з двух пунктаў пропуску для легкавых машын і пасажырскага транспарту на мяжы з Польшчай – “Бераставіцу” – закрылі 10 лютага. Для звычайных людзей застаўся толькі пераход “Брэст” – “Цярэспаль”.
Чытайце таксама: «Как попасть в Беларусь?» Что происходит на вокзале в Белостоке, откуда ушли последние маршрутки через «Бобровники»
Нагрузка на іншыя кропкі перасячэння мяжы ўзрасла. Частка транспарту паехала ў Польшчу праз літоўскія пункты пропуску. Шлях у Беласток з Гродна праз Прывалку – амаль удвая карацейшы, чым праз Брэст. Цэны на маршруткі Гродна-Беласток выраслі на 33-38%. За 11 і 12 лютага чарга з легкавых аўтамабіляў, якія едуць у Еўразвяз, павялічылася на 16%, грузавых на 20%. Час чакання ў “Прывалцы” (“Райгардас”) даходзіла да 32 гадзін. Некаторыя аўто разварочваліся і з’язджалі на «Беняконі» або іншыя пункты пропуску.
