«Белтэлекам» сочыць за табой. У Гродне ўсталююць яшчэ амаль 1000 вулічных камер

Да канца 2023 у Гродне плануюць падключыць 160 камер вулічнага назірання, а ў першым паўгоддзі 2023 года падключаць яшчэ больш за 800. Манапалістам у сістэме вулічнага назірання ў Беларусі стаў «Белтэлекам».

Камеры ўсталёўваюць на ўсіх выездах і ўездах у горад, у месцах масавага збору людзей, на цэнтральных гарадскіх плошчах, у парках, у аэрапорце, на чыгуначным і аўтавакзале, удакладніў для «Гродна Плюс» начальнік гродзенскага занальнага вузла электрасувязі філіяла «Белтэлекам» Юрый Басько. Зараз да сістэмы маніторынгу штодня падключаюць каля 20 камер.

З 2018 года «Белтэлекам» укараніў паслугу «Відэакантроль». Камеры для аддаленага назірання усталёўваюць у шматкватэрных дамах, на прадпрыемствах. Назіранне можа адбывацца ў рэжыме рэальнага часу, ёсць доступ да архіву за апошнія 30 сутак. У гродзенскім філіяле «Белтэлекама» да паслугі падключылі больш за 26 тысяч абанентаў.

У ліпені 2022 года паведамлялі пра 3000 усталяваных у горадзе камерах. У гэты лік уваходзілі вулічныя камеры ў грамадскіх месцах, на дарогах, у 150 шматпавярховіках і на стратэгічных аб’ектах. Пры тым годам раней, у сярэдзіне 2021, было вядома ўсяго пра 20 камер, усталяваных у Гродне гарадскім ЖКГ пераважна ў цэнтры горада. У канцы 2021 года паведамлялі ўжо аб парадку 800 камерах відэаназірання ў горадзе.

Як могуць выкарыстоўваць камеры

У Беларусі з 2017 года існуе Рэспубліканская сістэма маніторынгу грамадскай бяспекі (РСМГБ) на аснове тэхналогіі Kipod ад кампаніі Synesis. Да 25 лютага 2022 за яе адказвала даччыная кампанія Synesis — «24×7 Паноптес». З 25 лютага за РСМОБ стаў адказваць «Белтэлекам».

Тэхналогія Kipod дазваляе распазнаваць людзей па тварах, аўтаматычна апрацоўваючы інфармацыю з камер відэаназірання. Таксама дзякуючы ёй можна адсачыць перамяшчэнні канкрэтнага чалавека за 10−30 секунд. Больш часу, да прыкладу, пяць хвілін, можа спатрэбіцца, каб адсачыць перамяшчэнні чалавека за вялікі перыяд, напрыклад, у некалькі месяцаў. Такім чынам можна знаходзіць злачынцаў - кішэннага злодзея, вандала.

Эфектыўнасць распазнавання залежыць ад тэхнічных паказнікаў камеры, якасці малюнка, асвятлення. Колькі камер падключана да Kipod, не паведамляецца.

В 2021 году BYPOL заяўляў, што тэхналогія выкарыстоўваецца сілавікамі для распазнавання і пошуку людзей, якія ўдзельнічалі ў пратэстах. Тады кампанія-распрацоўнік гэта адмаўляла.