Супрацоўніка аднаго з гандлёвых прадпрыемстваў горада затрымалі за абразлівыя каментары ў адрас Аляксандра Лукашэнкі, Уладзіміра Пуціна, Рамзана Кадырава, паведамляе Telegram-канал «Пульс Гродно».
Таксама мужчына пакідаў каментары аб ходзе «спецыяльнай ваеннай аперацыі расійскіх войскаў на тэрыторыі Украіны» (менавіта так мужчына сказаў на камеру — Hrodna.life) і заклікаў ўжываць гвалт да расійскіх вайскоўцаў.
Гродзенца затрымалі каля яго працы.
«Ахмат — сіла»
Мужчына папрасіў прабачэння ў Рамзана Кадырава. «Прашу прабачэння ў Рамзана Кадырава за свае непрыемныя каментары. Раскайваюся. Прабачце, калі ласка. Ахмат — сіла», — сказаў гродзенец. Ён паведаміў, што пакідаў каментары «пад уплывам дэструктыўных Telegram-каналаў». Мужчына раскаяўся ў зробленым.
Сілавікі паведамілі, што мужчына затрыманы «за распальванне нянавісці». Верагодна, у дачыненні да яго ўзбудзяць крымінальную справу па арт. 130 КК «Распальванне расавай, нацыянальнай, рэлігійнай альбо іншай сацыяльнай варожасці або варажнечы».
Чытайце таксама: Гродзенца асудзілі на 7 гадоў калоніі - у тым ліку за выказванні аб загінулых расійскіх дэсантніках
Як могуць судзіць за абразу палітыка іншай краіны?
Верагодна, выказванні мужчыны могуць кваліфікаваць не як абразу ці паклёп у дачыненні да палітыка, а як дыскрэдытацыю Рэспублікі Беларусь. Гэта значыць, яго абраза можа «дыскрэдытаваць» краіну з пункту гледжання органаў, распавёў Hrodna.life юрыст.
