Прыватны дом, стылізаваны пад замак, стаіць у 50 м ад касцёла Унебаўзяцця Найсвяцейшай Панны Марыі 1870 года. Мяркуючы па фота і апісані, яго перабудавалі са старога дома святара.
«Побач з касцёлам знаходзіўся дом і дворык каталіцкага святара. Менавіта на гэтым гістарычным месцы і пабудаваны наш сучасны замак. Сучасныя матэрыялы дома вытанчана спалучаюцца са старадаўнім цагляным мурам дома», — сказана ў абвестцы аб продажу дома.
Дом двухпавярховы, з двума санвузламі. Ён уяўляе сабой цэнтральную цагляную частку з двухсхільным дахам і мансардным паверхам і прыбудаваныя да яе з чатырох вуглоў вежы. Дзве з іх стаяць на апорах. «Вытанчанасць, прастата і манументальнасць гэтага дома ахінутая гісторыяй», — сказана ў апісанні.
Сцены дома збудаваныя з цэглы і газасілікатных блокаў, уцяпленне — пласт мінеральнай ваты ў 5 см. Звонку сцены вежаў атынкаваныя, дом часткова задэкараваны галандскай абліцавальнай цэглай ручной фармоўкі. Падмурак — маналітны стужкавы.
Агульная плошча дома складае 286 кв.м, жылыя з іх 152 кв. м. Кошт пытання — 241 794 рублёў.
Паводле праекта на першым паверсе запланаваны прасторныя гасцёўня з печкай-камінам і кухня-сталовая. Можна ўладкаваць трэнажорную залу, більярдавую, музычны пакой. Прадугледжана прасторная тэраса. На другім паверсе адведзены пакоі пад пяць спальняў і кабінет, ёсць балкон. Склеп — «старадаўні, з арачнымі скляпеннямі з цэглы».
Дах пакрыта мяккай дахоўкай, ёсць водаадводы. Вокны арачныя і панарамныя, з пластыкавымі трохкамернымі шклопакетамі з двухбаковым ламінаваннем.
У дом заведзеная электрычнасць. З інжынерных сетак ёсць разводка вады і каналізацыі, але самі яны адсутнічаюць. Газу таксама няма, але газаправод «побач, па дарозе».
Прыдамавы ўчастак прастакутнай формы, займае 12 сотак. На ўчастку пасаджаны газон, растуць дэкаратыўныя хмызнякі і туі. Каля дома пабудаваны вялікі гараж і гаспадарчая пабудова. Пад’езд да дома заасфальтаваны. Можна выкарыстоўваць дом як жыллё, а можна арганізаваць гасцінічна-турыстычны бізнес, адзначана ў аб’яве.
Участак з домам-замкам знаходзіцца проста ў сядзібным парку Антановіч-Чацвярцінскіх канца XIX стагоддзя. У 100 м ад яго працякае рэчка Спушанка. Парк мае статус помніка прыроды і займае тэрыторыю больш за чатыры гектары. Сама сядзіба не захавалася.
Касцёл дзейнічае, ахоўваецца дзяржавай як помнік архітэктуры. Службы праходзяць па нядзелях. У касцёле пахаваныя прадстаўнікі роду Антановіч-Чацвярцінскіх.
Чытайце таксама:
Плануецца, што ў кожным раёне з’явіцца па дзве новыя пляцоўкі для выгулу хатніх жывёл. Адпаведны…
Гродзенскі абласны суд прызнаў Ежы Грыгенчу вінаватым паводле чатырох крымінальных артыкулаў. Яму прызначылі шэсць гадоў…
Блогер з Гродна Аляксей Саўко з ростам у 136 см апублікаваў фота ў футболцы “Команда…
Экран вышынёй 7 метраў з’явіўся на фасадзе гандлёва-забаўляльнага цэнтра Triniti на праспекце Янкі Купалы. Гэта…
Гродзенская вобласць страціла лідарскую пазіцыю па колькасці арганізаваных турыстаў. Цяпер сярод найбольш папулярных напрамкаў —…
Аперацыя праводзіцца на тэрыторыі Гродна і Гродзенскага раёна ў рамках камандна-штабных вучэнняў сілавікоў. На час…
