Невядомыя ўсталявалі крыжы на знішчаных могілках АК у Суркантах

Бярозавыя крыжы паставілі на месцы разбураных могілак у вёсцы Сурканты (Воранаўскі раён). Акрамя гэтага там з’явіліся знічкі і бела-чырвоныя стужкі, паведаміў Glosznadniemna.pl. Хто ўсталяваў бярозавыя крыжы і ўшанаваў разбураныя могілкі - невядома.

Калі разбурылі могілкі ў Суркантах

Невядомыя разбурылі і зраўнялі з зямлёй могілкі жаўнераў Арміі Краёвай раніцай 25 жніўня 2022 года. Па словах відавочцаў, разбурэнне могілак нагадвала спецаперацыю — усе пад’езды да месца былі заблакаваны невядомымі. Мясцовых жыхароў, якія абураліся і спрабавалі фатаграфаваць тое, што адбываецца, палохалі зняволеннем.

Хто пахаваны ў Суркантах

Сурканты — невялікая вёска паблізу Пелясы, дзе нядаўна закрылі літоўскую школу, у 20 км ад Ліды. Жыхароў у Суркантах практычна не засталося. На могілках пахаваныя байцы Аріміі Краёвай, якія змагаліся з часткамі НКУС у жніўні 1944 годзе. Тады ў баі загінулі 18 вайскоўцаў, у тым ліку шэсць афіцэраў.

Пахаванне размешчана па-за могілкамі, у полі, каля магіл паўстанцаў 1863 года. Мясцовыя жыхары тады апасаліся рэпрэсій ад савецкай улады. Тым не менш пазней яны не дапусцілі, каб калгас заараў магілы.

8 верасня 1991 года там адкрылі вайсковыя магілкі польскіх жаўнераў. Надпіс на крыжы зроблены па-польску, але беларускія ўлады не давзолілі напісаць, супраць каго ваявалі забітыя.

Дзе яшчэ зруйнавалі могілкі

Руйнаванні помнікаў і пахаванняў польскіх жаўнераў пачалося летам 2022 года. У Суркантах не першы выпадак разбурэння пахаванняў польскіх вайскоўцаў у Беларусі. Сёлета могілкі жаўнераў польскай Арміі Краёвай былі знесеныя ў Качычах, Ваўкавыску, Мікулішках, Стрыеўцы і іншых месцах Гродзенскай вобласці.

Чытайце таксама: У Стрыеўцы зруйнавалі помнік загінулым польскім жаўнерам. Гэта ўжо пяты выпадак у Гродзенскай вобласці

Палякі асудзілі кампанію па знішчэнні помнікаў

У Польшчы асудзілі кампанію па знішчэнні слядоў польскасці ў Беларусі. Афіцыйная заява польскага Міністэрства замежных спраў з’явілася на сайце ведамства 6 ліпеня. Яна з’явілася пасля ў сувязі са знішчэннем пахавання салдат Арміі Краёвай у вёсцы Мікулішкі Ашмянскага раёна. МЗС Беларусі паведаміла ў адказ, што ў гэтым населеным пункце «воінскіх пахаванняў і пахаванняў замежных вайскоўцаў не зарэгістравана» і законнасць «работ па ўладкаванні тэрыторыі» ў дадзеным месцы была пацверджана Генпракуратурай пасля атрымання дадзеных, што чалавечыя парэшткі там адсутнічаюць.