Фота: "АўтаГродна", 2020 год
Судовыя разбіральніцтвы пасля надзвычайнага здарэння ў гродзенскім тралейбусе доўжыліся два гады. Праз выбух кола грузавіка у суседняга тралейбуса лопнула шкло, а пасажыраў засыпала аскепкамі. Па кампенсацыю шкоды звярнулася толькі адна пацярпелая, якая часткова страціла зрок. Суд задаволіў яе іск не цалкам, кампенсацыю шкоды заплоціць кіроўца МАЗа, а тралейбусны парк прызналі невінаватым.
Усё адбылося 28 жніўня 2020 года на скрыжаванні вуліц Соламавай і Чайкінай. У МАЗа з пяском, што стаяў на светлафоры, лопнула кола, выбухам вынесла шкло ў тралейбусе, які стаяў побач, аскепкі паляцелі ў пасажыраў. Траўмы атрымалі пяць чалавек, трох забралі ў бальніцу, пісаў «АўтаГродна».
У суд звярнулася толькі 25-гадовая дзяўчына. Ёй аскепкі шкла патрапілі ў твар і вочы. Выбуховай хваляй яе вынесла на іншае сядзенне. Яна нічога не бачыла і не магла сама выйсці з тралейбуса, па твары цякла кроў, пераказвае «Звязда» ўспаміны дзяўчыны ў судзе.
У час аперацыі, якая доўжылася паўтары гадзіны, ёй наклалі больш за 20 швоў на твар, шыю і галаву. Другая аперацыя ішла тры гадзіны. З вока дасталі аскепак, якім выбіла частку райка. Замену хрусталіка і пластыку радужнай абалонкі дзяўчыне рабілі ўжо пазней, у платнай клініцы ў Мінску. Пасля ўсіх аперацый засталіся шнары, а зрок на левым воку аднавіць так і не змаглі. Праз некалькі месяцаў пацярпелай далі трэцюю групу інваліднасці без устанаўлення працэнта непрацаздольнасці, хаця гэта і неабходна для атрымання страхавых выплат.
Дзяўчына запатрабавала кампенсацыю маральнай і матэрыяльнай шкоды ў 50 тыс. рублёў. Іск яна адрасавала кіроўцу МАЗа і тралейбуснаму ўпраўленню. Паводле закону, кампенсаваць шкоду, нанесеную небяспечным механізмам мусіць той, хто за яго адказвае. Маральную шкоду кампенсуюць незалежна ад віны таго, хто нанёс гэту шкоду, у выпадках, калі яна прычынена жыццю ці здароўю грамадзяніна крыніцай павышанай бяспекі.
Праверка ДАІ паказала, што выбух адбыўся з-за разгерметызацыі вонкавага кола МАЗа. Распачалі крымінальную справу, падазраваным у ёй стаў кіроўца грузавіка. Праз паўгода следства прыпынілі праз адсутнасць складу злачынства.
Дадаткова суд прыцягнуў да справы страхавыя кампаніі абодвух транспартных сродкаў. Яны агулам выплацілі гродзенцы 13,2 тыс. рублёў. У суму ўвайшла кампенсацыя толькі таго лекавання, якое было пацверджана дакументальна: лекаў, лазернай аперацыі, імпланта. Не кампенасавалі выдаткі, звязаныя з медустановай, якую дзяўчына выбірала самастойна, а не была туды накіраваная.
Кіроўца грузавіка прызнаў іск часткова і настойваў, што яго віны ў здарэнні няма. Патрабаванні аб кампенсацыі матэрыяльнай шкоды ён не прызнаў, бо лічыць, што страты мусяць кампенсаваць страхавыя выплаты. У судзе ён папрасіў зменшыць памеры іску праз сваё матэрыяльнае становішча, наяўнасць непаўнагадовых дзяцей і аказаную раней дапамогу.
У выніку з яго вырашылі спагнаць кампенсацыю маральнай шкоды у 30 тыс. рублёў і частку затратаў на медыцынскія паслугі і юрыдычную дапамогу. Агулам ён мусіць сплаціць 31 130 рублёў.Тралейбусны парк суд вырашыў не прыцягваць да адказнасці, і не прымушаць плаціць кампенсацыі. Прычына ў тым, што здарэнне палічылі не ДТЗ, а няшчасным выпадкам.
Два хлопцы са Слоніма, узростам 14 і 15 гадоў, атрымалі крымінальны артыкул за хуліганства, здзейсненае…
Дом у раёне вуліц Каліноўскага і Вясенняй, які пачалі будаваць у пачатку верасня, плануюць здаць…
Канфлікт разгарнуўся вакол паркоўкі ў новым доме на вуліцы Савецкіх пагранічнікаў. Гродзенцы абураны тым, што…
Фермерская гаспадарка знаходзіцца ў вёсцы Пальніца, што ў 23 кіламетрах ад Гродна. Гаспадарка дзейнічае —…
На ўчастку ад вуліцы Мітрапаліта Філарэта да прыпынку «Цэнтр занятасці» на вуліцы Дзяржынскага амаль скончылі…
ТАА "Флагман М'юзік" не пагадзілася з адмовай у іску аб абароне дзелавой рэпутацыі да актывісткі…