Маркевіч у бальніцы, Гундар на галадоўцы, гібель міліцыянта на «Хімвалакно». Як прайшоў тыдзень у Гродне і вобласці

Асуджаны на 10 сутак адміністрацыйнага арышту Мікалай Маркевіч адбыў пакаранне не цалкам. За суткі да заканчэння арышту ён трапіў у бальніцу. Палітвязень Уладзімір Гундар абяцае спыніць галадоўку пасля выхаду з карцэра, куды яго змясцілі 30 чэрвеня. На тэрыторыі завода «Хімвалакно» (філіял «Гродна Азот») выявілі труп супрацоўніка Дэпартамента аховы МУС. Паводле непацверджаных звестак, ён застрэліўся з табельнай зброі. Рэдакцыя Hrodna.life вывучыла, што адбылося ў вобласці з 4 па 10 ліпеня.

Затрыманні

Жыхара Гродна затрымалі за распаўсюджванне экстрэмісцкіх матэрыялаў. Таксама са жніўня 2020 года ён нібыта распаўсюджваў інфармацыю, якая «абражае Аляксандра Лукашэнку (арт. 368 КК), міліцыю і службовых асоб (арт.369 КК). Ён прызнаў віну.

Студэнта з Гродна затрымалі за распаўсюд малюнкаў з фашысцкай сімволікай. Ён паведаміў, што фашысцкай ідэалогіі не прытрымліваецца, палітычныя погляды змяніў і просіць прабачэння ў ветэранаў і людзей, якіх ён абразіў сваімі паводзінамі.

Затрымалі жыхара Ліды з партрэтам Гітлера на спіне. Ён быў у правым крыле каляфутбольнага руху. Прытрымліваўся правых поглядаў. Меў зносіны з паплечнікамі. Мужчына паабяцаў сілавікам перабіць татуіроўкі з адпаведнай сімволікай.

За распаўсюджванне экстрэмісцкіх матэрыялаў затрыманы супрацоўнік аднаго з дзяржпрадпрыемстваў Ліды.

Жыхара Ліды затрымалі за татуіроўку «1488». Ён паведаміў, што прыбярэ яе і фашысцкіх поглядаў не прытрымліваецца.

Аштрафавалі ксяндза

8 ліпеня ў Смаргоні на 20 базавых велічынь (640 рублёў) аштрафавалі ксяндза Яўгена Учкуроніса, пробашча парафіі Святога Яна Паўла II. Яго абвінавацілі ў захоўванні «экстрэмісцкіх матэрыялаў» (арт. 19.11 КаАП). Што менавіта было вызначана як «экстрэмісцкае» — невядома, паведамляе «Гарадзенская вясна».

Мікалай Маркевіч трапіў у бальніцу

Асуджаны 24 чэрвеня на 10 сутак адміністрацыйнага арышту за перапост «экстрэмісцкіх матэрыялаў» Мікалай Маркевіч адбыў пакаранне не цалкам. За суткі да заканчэння арышту ён трапіў у бальніцу. Падрабязнасці пакуль невядомыя, паведамляе Telegram-канал «Право имеют».

Маркевіч — заснавальнік і галоўны рэдактар газеты «Пагоня». Быў удзельнікам галадоўкі дэпутатаў Вярхоўнага Савету ў 1995 годзе. Зараз займаецца пасажырскімі перавозкамі ў фірме «Клас-Тур».

Палітвязень Уладзімір Гундар спыніць галадоўку пасля выхаду з карцэра, куды яго змясцілі 30 чэрвеня

«Валодзя становіцца шэрым. Вельмі схуднеў. Адвакат патрабавала, каб яго паглядзеў прама на пасяджэнні лекар. Той вымераў ціск, сказаў, што 138 на 80. Аднак абязводжвання арганізма, па словах лекара, нібыта няма. А як гэта няма?! — распавяла «Радыё Свабода» ягоная жонка Алена Гундар на восьмы дзень галадоўкі. — Калі ён столькі дзён не п’е вады, але, па іх словах (доктара і адміністрацыі), «гэта нічога страшнага». Яны кажуць — «ён жа сам, добраахвотна, мы яго не прымушаем, хай бы пачаў есці».

На мінулым тыдні ў судзе пачалі вывучаць матэрыялы справы, якія складаюць 65 тамоў (200−300 старонак у кожным).

«Атаварка» для зняволеных у турме № 1 Гродна часова недаступная

Прычына — прадаўшчыца з ўнутранага крамы турмы сышла ў адпачынак. Пра гэта распавяла жонка палітвязня Дзяніса Івашына Вольга.

«Падобныя перапынкі ў працы крамы для вязьняў адбываюцца настолькі часта, а асартымэнт у лаўцы такі „шырокі“, што выдаткоўваць грошы прынамсі Дзянісу няма на што, як ён кажа», — напісала яна.

Палітзняволенага фігуранта «справы Ціханоўскага» Уладзіміра Кнігу перавялі на турэмны рэжым

41-гадовага Уладзіміра Кнігу перавялі з папраўчай калоніі № 14 у Навасадах у турму № 1 Гродна. Палітвязню ўзмацнілі рэжым і перавялі на турэмны, паведамляе «Вясна».

Жыхарку Пружанаў судзяць ў Гродне па шасці артыкулах КК

Юлія Лаптановіч — шматдзетная маці з Пружан, фігурантка «справы карагодаў». Ёй прысудзілі тры гады «хатняй хіміі». Яе муж Ігар Лаптановіч таксама палітвязень — ён атрымаў 2,5 гады калоніі па «карагоднай справе».

Праз некалькі месяцаў пасля вынясення прысуду дома ў Юліі прайшоў ператрус, пасля якога яе затрымалі ў рамках новай крымінальнай справы.

Цяпер яна ў СІЗА турмы № 1 Гродна. Падчас утрымання пад вартай Юліі выдалілі апендыцыт.

Дзмітрый Бандарчук — на волі

Затрыманы 28 чэрвеня за распаўсюд экстрэмісцкіх матэрыялаў Дзмітрый Бандарчук на свабодзе ў Гродне. Каментары ён пакуль не дае, сказаў 4 ліпеня Hrodna.life актывіст Вадзім Саранчукоў.

Палітвязень Іван Дуброўскі выйшаў на волю

Яго судзілі за ўдзел у акцыі пратэсту ў Гродне 6 верасня 2020 года паводле ч. 1 арт. 342 КК «Арганізацыя і падрыхтоўка дзеянняў, якія груба парушаюць грамадскі парадак, альбо актыўны ўдзел у іх».

Жыхар Мастоў сарваў чырвона-зялёны сьцяг — яго будуць судзіць

2 чэрвеня 31-гадовы жыхар мастоў прыехаў у вёску Хорціца. Ноччу ён сарваў чырвона-зялёны сцяг з мясцовага Дома культуры і выкінуў у лужыну, паведамляюць сілавікі. Яны сцвярджаюць, што мужчына быў п’яны.

Мужчыну апазналі па відэакамеры і затрымалі ў Мастах. Паводле арт. 370 КК «Здзек з дзяржаўных сімвалаў» яму пагражае да трох гадоў пазбаўлення волі.

Міліцыянт судзіцца з МУС аб прычынах звальнення

У Гродзенскім абласным судзе ідзе пасяджэнне «аб змене фармулёўкі прычыны звальнення, канчатковага разліку пры звальненні і сярэдняга заробку за затрымку разліку пры звальненні».

Пазоўнік па справе — Шульга Аляксандр Рышардовіч. Ён быў участковым інспектарам у адным з раёнаў Гродна. Яго дадзеныя супадаюць з дадзенымі капітана Аляксандра Шульгі, які ў верасні 2020 года прыязджаў у «Цудоўню» па скарзе грамадзян на бел-чырвона-белы сцяг у краме.

Адказчыкі - МУС і УУС Гродзенскага аблвыканкама.

У Гродне асудзілі былога сілавіка

Былога супрацоўніка аднаго з праваахоўных ведамстваў асудзілі ў Гродзенскім абласным судзе на 5,5 гадоў пазбаўлення волі за «зліў персанальных дадзеных». Пра гэта паведаміў Telegram-канал, набліжаны да сілавікоў. Дадзеныя асуджанага не назвалі.

Сілавікі «вылічылі», што ён перадаваў дадзеныя былых калегаў у «экстрэмісцкія Telegram-каналы з мэтай іх далейшага булінга».

Таксама суд пастанавіў пазбавіць асуджанага звання лейтэнанта запасу.

Новыя «тэрарысты»

Яшчэ два гродзенцы папоўнілі пералік арганізацый і фізічных асоб, якія маюць дачыненне да тэрарыстычнай дзейнасці.

Папаўненне Рэспубліканскага спісу экстрэмісцкіх матэрыялаў

Telegram-чат «Повестка чат» і Telegram-канал «Повестка дня» прызнаныя экстрэмісцкімі па рашэнні суда Ленінскага раёна Гродна ад 1 ліпеня 2022 года.

Новыя палітвязні

Асуджанага на 8 гадоў калоніі ўзмоцненага рэжыму Юрыя Жукоўскага прызналі палітвязнем.

Зараз іх у Беларусі 1236.

Памёр супернік Лукашэнкі на першых прэзідэнцкіх выбарах

У Мінску памёр грамадскі актывіст граф Аляксандр Прушынскі. Яму было 88 гадоў. Гэта адбылося 1 ліпеня. Прушынскі вядомы тым, што ў 1994 годзе высунуў сваю кандыдатуру на пост прэзідэнта. Падчас збору подпісаў яго арыштавалі і дэпартавалі з краіны.

На Ашмяншчыне зраўнялі з зямлёй могілкі польскіх вайскоўцаў

Могілкі вайскоўцаў Арміі Краёвай у вёсцы Мікулішкі ў Ашмянскім раёне зраўнялі з зямлёй. Пра гэта паведаміў дэпутат польскага сейма Роберт Тышкевіч на сваёй старонцы ў Facebook. «Варварскі акт дзяржаўнага вандалізму над магіламі вайскоўцаў Арміі Краёвай у Беларусі. […] Гэты агідны ўчынак рэжыму Лукашэнкі павінен сустрэць жорсткі адказ польскіх уладаў», — напісаў Тышкевіч.

Памятаеце, у OZ прыбралі «ЛГБТ-кнігі»? Аказалася, іх забараніў Гродзенскі гарвыканкам

У Гродзенскім гарвыканкаме правялі прафілактычную гутарку з загадчыкам крамы «ОZ кнігі» ў гандлёва-забаўляльным цэнтры Triniti і кіраўніцтвам ГЗЦ. Ім распавялі аб «недапушчальнасці рэалізацыі» літаратуры, дзе апісваецца аднаполае каханне. Нараду ў Гродзенскім гарвыканкаме сабралі пасля звароту актывісткі Вольгі Бондаравай.

Пяць Telegram-каналаў Гродзенскай вобласці прызналі экстрэмісцкімі фарміраваннямі

У Беларусі з’явілася пяць новых экстрэмісцкіх фарміраванняў. Гэта Telegram-чаты з Гродзенскай вобласці. Рашэнне «аб прызнанні групы грамадзян экстрэмісцкім фарміраваннем і забароне яго дзейнасці» прыняў КДБ 30 чэрвеня.

На стэндзе ў цэнтры Гродна заклеілі сцяг Еўрасаюза. Раней ЕС даў гораду на праект больш за EUR 1,1 млн

На стэндзе ў цэнтры Гродна заклеілі сцяг Еўрасаюза і ўзгадку пра фінансаванне ім праекта «Шлях Тызенгаўза». Стэнд з веласіпедным маршрутам, усталяваны ў межах праекта, размяшчаецца каля сквера на месцы Фары Вітаўта.

У гродзенскай паліклініцы прыбралі банэр пра першую ў Рэчы Паспалітай жанчыну-лекара

У паліклініцы № 3 Гродна прыбралі банер пра гісторыю жыцця Саламеі Русецкай — першай у гісторыі Рэчы Паспалітай жанчыны-урача. На яго паскардзілася актывістка Вольга Бондарава. Гродзенскія ўлады з ёй пагадзіліся.

Гродзенцам выносяць прысуды па «справе Зельцара». Некаторыя хутка выйдуць на волю

У Гродзенскім абласным судзе выносяць прысуды жыхарам вобласці, затрыманым па «справе Зельцара». Як правіла, прысуджаюць некалькі гадоў калоніі. Абвінавачаныя чакаюць суду пад вартай ужо 10 месяцаў.

Неафіцыйна: на «Хімвалакно» знайшлі труп міліцыянта

На тэрыторыі філіяла «Гродна Азот» завода «Хімвалакно» выявілі труп супрацоўніка Дэпартамента аховы МУС. Пацверджанне або абвяржэнне здарэння ў афіцыйных крыніцах пакуль не з’явілася. Міліцыянту быў 21 год. Паводле непацверджаных звестак, ён застрэліўся з табельнай зброі. Вядома, што ў паставой будцы адзін ён знаходзіўся не больш за дзве гадзіны.

У Гродне ліквідуюць байцоўскі клуб. А з ім — яшчэ тры арганізацыі

У Гродзенскім абласным судзе ў канцы чэрвеня пачалі працэс ліквідацыі чатырох грамадскіх арганізацый. Гэта спартыўныя і сямейныя аб’яднанні. Пазоўнікам па справе выступае Галоўнае ўпраўленне юстыцыі Гродзенскага аблвыканкама. Пакуль іх статус у Адзіным дзяржаўным рэестры (АДР) пазначаны як «дзейны».