Вірус воспы малпаў. Фота: pixabay.com
Тэст-сістэму для лабараторнай дыягностыкі воспы малпаў распрацавалі ў Беларусі. Вынікі дыягностыкі будуць вядомыя на працягу некалькіх гадзін пасля паступлення біяматэрыяла. Пра гэта 13 чэрвеня распавёў дырэктар Рэспубліканскага навукова-практычнага цэнтру эпідэміялогіі і мікрабіялогіі Уладзімір Гарбуноў, паведамляе Міністэрства аховы здароўя. Эксперт упэўнены, што шырокага прымянення тэст-сістэма не знойдзе.
«У РНПЦ эпідэміялогіі і мікрабіялогіі некалькі гадоў таму распрацавана тэхналогія стварэння тэст-сістэм для дыягностыкі розных інфекцыйных захворванняў. Гаворка ідзе пра ПЦР-наборы — і для COVID-19, і для ліхаманкі Эбола і іншых рэдкіх захворванняў. Зараз мы распрацавалі тэст-сістэму для лабараторнай дыягностыкі воспы малпаў. Гэта стандартная ПЦР-тэхналогія, якая ўключае ў сябе некалькі этапаў. У тым ліку гэта падбор нуклеатыдных паслядоўнасцяў, якія павінны быць спецыфічныя для дадзенага ўзбуджальніка. Маюцца базы дадзеных гэтых паслядоўнасцяў, адкуль спецыялісты выбіраюць маркеры, якія пазней выкарыстоўваюцца ў тэст-сістэме», — сказаў Уладзімір Гарбуноў.
Воспа малпаў — гэта рэдкае віруснае захворванне, генетычна блізкае да натуральнай воспы. Першыя сімптомы — тэмпература, галаўны боль, болі ў цягліцах, млоснасць, слабасць. Адметная асаблівасць гэтага віду воспы ад іншых — запаленне лімфавузлоў. Праз дзень-тры пасля пачатку хваробы з’яўляецца сып, часцей на твары, ступнях і далонях. На розных этапах яна выглядае як плямы, гнойныя бурбалкі ці скарыначкі.
Першае захворванне на воспу малпаў пацвердзілі ў Польшчы. Пра гэта 10 чэрвеня сказаў міністр аховы здароўя краіны Адам Недзельскі. Таксама не менш за два выпадкі захворвання выявілі ў Латвіі.
Дыягностыку пачнуць рабіць у РНПЦ эпідэміялогіі і мікрабіялогіі. Вынікі дыягностыкі будуць вядомыя на працягу некалькіх гадзін пасля паступлення біяматэрыяла.
«Упэўнены, што шырокага прымянення гэтая тэст-сістэма не знойдзе. Таму што захворванне не характарызуецца шырокім распаўсюджваннем і не чакаецца, што хворыя з’явяцца ў Беларусі ў бліжэйшы час. < … > Камерцыйнай арганізацыі гэтага рабіць няма сэнсу, таму што ніякіх дывідэндаў яна не атрымае, бо не прадасць. А мы гэта робім і не чакаем ніякіх прыбыткаў. Мы вырашаем дзяржаўную задачу ў галіне біябяспекі», — сказаў ён.
Вірус малпавай воспы паходзіць ад віруса натуральнай воспы. Вакцынаваныя ад яе маюць імунітэт. «Хто нарадзіўся да 1980-х — у гэтых адносінах шчасліўчык. Але, думаю, Міністэрствам аховы здароўя будуць прынятыя меры пры неабходнасці. Вакцына існуе, яе можна пачаць хутка пры неабходнасці», — лічыць спецыяліст.
Гродзенскі абласны суд прызнаў Ежы Грыгенчу вінаватым паводле чатырох крымінальных артыкулаў. Яму прызначылі шэсць гадоў…
Блогер з Гродна Аляксей Саўко з ростам у 136 см апублікаваў фота ў футболцы “Команда…
Экран вышынёй 7 метраў з’явіўся на фасадзе гандлёва-забаўляльнага цэнтра Triniti на праспекце Янкі Купалы. Гэта…
Гродзенская вобласць страціла лідарскую пазіцыю па колькасці арганізаваных турыстаў. Цяпер сярод найбольш папулярных напрамкаў —…
Аперацыя праводзіцца на тэрыторыі Гродна і Гродзенскага раёна ў рамках камандна-штабных вучэнняў сілавікоў. На час…
Байкеры выявілі ў Пышках дрот, нацягнуты на ўзроўні шыі. Відэа яны размясцілі ў TikTok. "Вось…