Суд Шчучынскага раёна 31 траўня асудзіў 30-гадовага палітзняволенага Яўгена Буйніцкага да чатырох з паловай гадоў узмоцненага рэжыму і штрафу ў памеры 110 базавых велічыняў (3 520 рублёў). Яго прызналі вінаватым па ч. 3 арт. 371 КК — наўмыснае незаконнае перасячэнне дзяржаўнай мяжы, здзейсненае арганізаванай групай. Ён дапамагаў эвакуявацца з Беларусі людзям, якія ратаваліся ад палітычна матываванага пераследу, паведамляе праваабарончы цэнтр «Вясна».
Нягледзячы на тое, што яго судзілі за здзяйсненне ўчынка групай асобаў, на лаве падсудных быў адзін Яўген. Паводле абвінавачвання, ён падвозіў людзей у памежную зону Літвы. Суддзя Дзмітрый Цівунчык пачаў разглядаць справу яшчэ 5 красавіка, але агучыў прысуд толькі 31 траўня. Падрабязнасці справы невядомыя.
Наперадзе — апеляцыя
Яўген Буйніцкі быў затрыманы 5 жніўня 2021 года. Яўген скончыў гістарычны факультэт БДУ. Ён піша вершы і спрабуе маляваць. У ліставанні палітвязень беларускамоўны. За кратамі Яўген адзначыў сваё 30-годдзе. Ён хутка будзе этапаваны з ІЧУ Шчучына ў гродзенскую турму, дзе будзе чакаць разгляду апеляцыйна скаргі на прысуд.
Паводле следства, група на працягу як мінімум апошніх васьмі месяцаў ажыццяўлялі незаконную перапраўку беларускіх грамадзян на тэрыторыю Літоўскай Рэспублікі.
Адным з арганізатараў і кіраўнікоў групы з’яўляецца грамадзянка Беларусі Наталля Калегава, якая пастаянна пражывае ў Літве, — кіраўнік арганізацыі «Дапамога». Улады заявілі, што затрымалі шэраг беларусаў, якія дастаўлялі людзей да лініі дзяржаўнай мяжы".
Пра справу расказалі на дзяржтэлебачанні
Справе прысвяцілі відэасюжэт на дзяржаўным тэлебачанні. Ён выйшаў пад назвай «Скрыня Пандоры»: бізнэс на мігрантах. Як улады Літвы выкарыстоўваюць уцекачоў у сваіх палітычных мэтах". У фільме паказалі адзінага затрыманага па справе — Яўгена Буйніцкага. Яго называюць «кур'ерам, які прывозіў людзей да мяжы — ў памежную зону». У фільме сцвярджаецца, што ён «атрымліваў плату» за гэта, у чым прызнаўся следчаму: «Мне заплацілі… Заправілі машыну».
«Я перавозіў у агульнай колькасці пяць чалавек, якія пакінулі маю машыну каля пасёлку Першамайск з намерам пакінуць Рэспубліку Беларусь шляхам незаконнага перасячэння мяжы. Пра тое, што яны плануюць перасекчы літоўскую мяжу, адкрыта гэта, можа быць, і не было сказана, але гэта ўсведамлялася, то бок я гэта ўсведамляю», — расказаў у відэасюжэце Яўген.
