У прыватных лабараторый зноў забралі права рабіць ПЛР-тэсты. Дзе яшчэ зрабіць ПЛР ў Гродна

З 30 траўня ў Беларусі нельга будзе зрабіць ПЛР-даследаванне на COVID-19 у недзяржаўных лабараторыях, паведаміла прэс-служба Мінздароўя. Прычынай адмены тэставання назвалі аптымізацыю лабараторных ПЛР-даследаванняў і цэнтралізацыю назірання за пацыентамі на амбулаторным этапе. Пра іншыя спосабы даследавання (тэст на антыген, антыцелы) не згадваецца.

ПЛР-тэсты праводзілі ў прыватных лабараторыях «Синэво», «Незалежная лабараторыя Інвітра», «Синлаб-ЕМЛ», «Ладэ», медцэнтра «Палімед» філіяла «Гандлёвая сетка «ПРОДМИР» і «Клінікі «Мерсі»». З пачатку пандэміі права праводзіць ПЛР-тэставанне ў лабараторый то забіралі, то вярталі.

Платныя ПЛР-тэсты, у тым ліку для выезду за мяжу з выдачай вынікаў на рускай і англійскай мовах і з занясеннем вынікаў у сістэму «Падарожнічаю без COVID-19» зараз робяць 53 лабараторыі сістэмы Міністэрства аховы здароўя. Вынікі пры неабходнасці перадаюць у паліклініку або бальніцу і тэрытарыяльны цэнтр гігіены і эпідэміялогіі.

У Гродне ПЛР працягваюць рабіць:

• Гродзенскі абласны цэнтр гігіены, эпідэміялогіі і грамадскага здароўя. Кошт ПЛР-тэсту для грамадзян Беларусі - 41−44,6 руб., для замежнікаў - 54,5−58,1 руб. (у залежнасці ад таго, ці трэба ўносіць вынік у дадатак «Падарожнічаю без COVID-19»);
• Гродзенская абласная інфекцыйная клінічная бальніца. Кошт для грамадзян Беларусі 38,85−42,45 руб., для замежнікаў - 53,5−57,1 руб.;
• Гродзенскі дзяржаўны медыцынскі ўніверсітэт (аналіз бяруць у Прафесарскім кансультатыўным цэнтры).

Міністэрства аховы здароўя перастала публікаваць штодзённую статыстыку па захворванні з 11 траўня. Зараз зводкі публікуюць раз на месяц, 1-га дня. Прычынай такога рашэння назвалі невялікую колькасць рэгістрацый пацыентаў з інфекцыяй COVID-19.

«Паводле прагнозаў спецыялістаў, магчыма да восені інфекцыя COVID-19 на тэрыторыі Рэспублікі Беларусь павінна перайсці ў непандэмічную, сезонную фазу. Гэта азначае, што захворванне COVID-19 будзе рэгістравацца, як ВРВІ і грып — восенню і зімой», — гаворыцца ў паведамленні.

Чытайце таксама:

• Медцентры «Лодэ» в Беларуси приостанавливают работу
• У Гродне планавалі аказваць платныя медычныя паслугі ў выхадныя. Але ў бальніцы пра гэта не чулі