Затрыманні людзей з татуіроўкамі, даносчыкі і «ваенныя» калыскі. Як прайшоў тыдзень у Гродне і вобласці

У Гродзенскай вобласці затрымлівалі людзей з «нацысцкімі» татуіроўкамі. Каманда кіберпартызанаў дадала чацвёртую порцыю даносаў, інфармацыю аб іх аўтарах і змесце. 14 траўня прайшоў парад калясак «Пад ветразем кахання», прысвечаны Дню сям'і, — сярод намінацый конкурсу вазкоў была і прысвечаная Году гістарычнай памяці. Рэдакцыя Hrodna. life вывучыла, што адбылося ў вобласці з 9 па 16 траўня.

Затрыманні

• У Гродзенскай вобласці - чарговае затрыманне за «нацысцкія» татуіроўкі. Дадзеныя мужчыны і абставіны затрымання сілавікі ў відэа не агучылі.
• Таксама затрыманне мужчыны з татуіроўкамі адбылося ў Лідзе. На камеру ён сказаў, што раней прытрымліваўся фашысцкай ідэалогіі. Ён папрасіў прабачэнне ў «дзядоў і прадзедаў, якія аддалі жыцці ў імя Вялікай Перамогі».
• Жыхара Ліды затрымалі за распаўсюд экстрэмісцкіх матэрыялаў. «Раней быў футбольным фанатам Ліды і прытрымліваўся неанацысцкіх поглядаў. Цяпер не прытрымліваюся ніякіх поглядаў», — сказаў ён на камеру. Паводле версіі сілавікоў, ён «ўкараняў свае радыкальныя погляды іншым карыстальнікам, публічна дэманстраваў свастыку». Яго дадзеныя і далейшы лёс невядомыя.
• ГУБАЗ па Гродзенскай вобласці затрымаў гродзенца Андрэя Сачэўку. Паводле іх версіі, ён «актыўнічаў у Telegram, клікаў усіх на вуліцы супрацьстаяць сілавікам». Па словах сілавікоў, яго будуць судзіць па арт. 342 КК. На камеру хлопец сказаў, што яго затрымалі за распаўсюд экстрэмісцкіх матэрыялаў. У жніўні 2020 года ён нібыта заклікаў да «радыкальных дзеянняў». Ён прызнаў віну. Пазней стала вядом, што Андрэя Сачэўка будуць судзіць па арт. 19.11 ч. 2 — «Распаўсюджванне, выраб, захоўванне, перавозка інфармацыйнай прадукцыі, якая змяшчае заклікі да экстрэмісцкай дзейнасці».

Некаторыя лічбы па судзімасці ў Гродне

• 428 чалавек знаходзіліся на 1 красавіка на ўліку ў крымінальна-выканаўчай інспекцыі Гродзенскага РАУС,
• 226 з іх неаднаразова судзімыя,
• За тры месяцы іх наведалі па месцы жыхарства больш за тысячу разоў у рамках праверкі,
• У 2022 годзе адзначаецца рост рэцыдыўных злачынстваў - з 21 да 26,
• З пачатку года з папраўчых устаноў адкрытага і закрытага тыпу, арыштных дамоў у Гродзенскі раён прыбылі 28 чалавек.

Па версіі ўладаў, «магчымасцяў ўстаць на ногі для збавіўшых сваю віну дзяржава дае дастаткова», паведамляе «Перспектива».

Палітвязню і журналісту Дзянісу Івашыну працягнулі тэрмін утрымання пад вартай да 22 траўня

Аб гэтым паведаміла яго жонка Вольга. Паводле яе версіі, гэта зрабілі, каб Дзяніс і яго абаронца паспелі вывучыць яго крымінальную справу.

Мама і айчым ўпершыню за год сустрэліся з Соф’яй Сапегам

Праз дзень пасля вынясення прысуду 6 траўня мама дзяўчыны і айчым упершыню за год змаглі сустрэцца з дачкой. На спатканне ім адвялі дзве гадзіны, распавёў айчым Соф'і Сяргей Дудзіч блогу «Адлюстраванне».

• Ці будзе абскарджваць прысуд, Соф’я пакуль не вырашыла. Хутчэй за ўсё, яе накіруюць у калонію ў Гомелі, распавёў айчым.
• Зараз Соф’я Сапега знаходзіцца ў турме № 1 Гродна. Яна, кажа Сяргей Дудзіч, «забітая прысудам».
• На спатканне родныя прывезлі Соф'і рэчы і прадукты. Усё, што перадавалі, у іх прынялі. Літаратуру перадаваць асуджаным нельга.
• Пра Раман Пратасевіча Сяргей сказаў, што «для нас гэтага чалавека не існуе. Я не ведаю і ведаць не хачу, хто ён, што ён. Як яго завуць, я забыўся. Няма яго, няма. Я спадзяюся, для Соф'і таксама. Не існуе такіх людзей для нас».

Праваабарончы цэнтр «Вясна» аб’яўляе 21 траўня Днём палітвязня ў Беларусі

У гэты дзень год таму ў шклоўскай калоніі № 17 пры нявысветленых абставінах памёр палітвязень актывіст з Бярозаўкі Вітольд Ашурак.

Праваабаронцы заклікаюць у гэты дзень успомніць Вітольда, выказаць салідарнасць з палітвязнямі Беларусі і ў чарговы раз запатрабаваць ад уладаў іх вызвалення.

«Хацеў сцяг, але на яго не было грошай». Сланімчаніна абвінавацілі ў здзеках з дзяржсімвалаў

Яўгена Іваноўскага са Слоніма абвінавачвалі ў здзяйсненні злачынства па арт. 370 КК «Здзек з дзяржаўных сімвалаў». Судовае пасяджэнне ўзначаліў Сяргей Манько, піша «Вясна».

Яўгена абвінавачвалі ў тым, што 18 чэрвеня мінулага года каля крамы «Каласок» у Слоніме ён схапіў і вырваў з мацавання сцяг Беларусі, пры гэтым частка дрэўка, на якой трымаўся сцяг, зламалася. У матэрыялах справы было пазначана, што абломкі гэтага дрэўка мужчына «выкінуў у нявысветленым месцы», а сам сцяг паклаў сабе ў кішэню.

Крадзеж сцяга абвінавачаны патлумачыў тым, што заўсёды хацеў мець яго ў сябе дома, каб вывешваць на фасадзе ў Дзень незалежнасці, вось толькі грошай на яго не было.

Яму прысудзілі тры месяцы арышту па дадзеным артыкуле.

Даносчыкі ў Гродне

Каманда кіберпартызанаў дадала чацвёртую порцыю даносаў, інфармацыю аб іх аўтарах і змесце. Інфармацыя грунтуецца на дадзеных выклікаў 102 за кастрычнік 2020 года.

Гродзенская тытунёвая фабрыка «Нёман» патрапіць у шосты пакет санкцый ЕС супраць вайны

Пра гэта паведамляе «Наша Н**а». Таксама санкцыі за вайну ва Украіне накладуць на «Нафтан», Беларускую калійную кампанію «Белкалій» і шэраг іншых прадпрыемстваў.

У Лідзе будуць судзіць 26-гадовага мясцовага жыхара — за пратэсты і згвалтаванне малалетняй

Абвінавачаны ў жніўні 2020 года ў адным з «дэструктыўных Telegram-чатаў» размясціў паведамленні, накіраваныя на арганізацыю групавых дзеянняў, якія груба парушаюць грамадскі парадак (ч.1 арт. 342 КК).

Таксама яго судзяць за дзеянні сэксуальнага характару ў дачыненні да малалетняй насуперак яе волі і выкарыстоўваючы яе бездапаможны стан, і яе згвалтаванне (ч.3 арт. 166, ч.3 арт.167 КК).

Раней ён быў судзімы. Хлопца ўзялі пад варту.

СМІ: Двое салдат пацярпелі падчас праверкі сіл рэагавання ў Беларусі, адзін з іх на ШВЛ з пераломамі костак і разрывам лёгкага

Двое вайскоўцаў з рознымі траўмамі паступілі ўвечары 12 траўня ў Гродзенскую ўніверсітэцкую клініку і Гродзенскі вайсковы шпіталь, паведамляе Z**kalo.io.

Папярэдне, яны атрымалі траўмы пры счэпцы танкаў або БТРаў. Дзе менавіта гэта адбылося — невядома. Паведамляецца, што аднаго з іх ужо выдалілі лёгкае, цяпер ён у рэанімацыі на ШВЛ ў цяжкім стане.

«У яго множныя пераломы, разрыў лёгкага, траўмы кішачніка. Увогуле, траўмы і костак, і ўнутраных органаў. Другі - лягчэй. Ён быццам бы знаходзіцца ў ваенным шпіталі», — паведамляюць крыніцы Z**kalo.io. у Мінабароны інфармацыю абвяргаюць.

31-гадовага жыхара Гродна будуць судзіць за перадачу дадзеных аб сілавіках

‍Хлопец перадаў адміністратарам «дэструктыўных Telegram-каналаў» звесткі пра пяць супрацоўнікаў органаў унутраных спраў. Пасля гэтага некаторым пацярпелым паступілі пагрозы.

‍Справу накіравалі ў суд. Яго будуць судзіць за «незаконныя дзеянні ў дачыненні да інфармацыі аб прыватным жыцці і персанальных дадзеных» і «дапамаганне ў распальванні сацыяльнай варожасці і варажнечы» — па ч. 6 арт. 16 і ч. 3 арт. 130, ч. 3 арт. 203−1 КК. Гродзенца заключылі пад варту.

Гродзенскі празаік і праваабаронца Віктар Сазонаў стаў лаўрэатам літаратурнай прэміі «Гліняны Велес» за 2021 год з раманам «Генетычны алфавіт»

Штогод у траўні аргкамітэт вызначае лаўрэата за найлепшую беларускамоўную мастацкую кнігу. Сёлета ў шорт-лісце прэміі было дзевяць кніг. З іх тры зборнікі паэзіі, шэсць кніг прозы і адна кніга гістарычная, паведамляе БАЖ.

Віктар Сазонаў - праваабаронца цэнтра «Вясна». Улетку 2021 года яго затрымалі і правялі дома ператрус. З ізалятара яго адпусцілі пад падпіску аб нявыездзе. У яго статус падазраванага.

Ваенныя вазкі

14 траўня прайшоў парад вазкой «Пад ветразем кахання», прысвечаным Дню сям'і. Сярод намінацый конкурсу калясак была і прысвечаная Году гістарычнай памяці. Салодкія падарункі за гістарычныя вазкі атрымалі 11 сем’яў.

18-гадовага студэнта з Гродна асудзілі за пратэсты. У 2020-м яшчэ непаўналетняму хлопцу далі штраф

Студэнта Кірыла Кетурка з Гродна асудзілі да 2,5 гадоў «хатняй хіміі» за паведамленні ў чатах і ўдзел у адным пратэстным маршы. Яго затрымлівалі ў верасні 2020 года, калі яму было 16 гадоў. Тады яго ў аўтазаку адвезлі ў РАУС, пагрозамі прымусілі разблакаваць тэлефон і аддалі куратару каледжа. Хлопец не хаваў, што выступае супраць улады — праз паўтара года ўжо паўналетняга Кірыла пачалі судзіць.

Былы кіраўнік аблспорту Алег Андрэйчык стаў намеснікам міністра

Новым намеснікам міністра спорту і турызму Алега Андрэйчыка прызначылі 13 траўня. Да гэтага ён 24 гады прапрацаваў ва ўпраўленні спорту і турызму Гродзенскага аблвыканкама. Алега Андрэйчыка называлі адказным за ціск на спартоўцаў у 2020 годзе. Пасля выбараў, у снежні 2020 года, з’явіўся адкрыты ліст спартсменаў у падтрымку дзейнай улады. Некаторыя спартсмены не падпісвалі яго, але ўсё роўна знайшлі пад ім сваё прозвішча. Іншыя наўпрост распавялі, што спартыўныя чыноўнікі пагражалі звольніць іх за адмову падпісаць ліст.

Мікалая Аўтуховіча будуць судзіць у гродзенскай турме

Пасяджэнне па справе Мікалая Аўтуховіча будзе праходзіць не ў будынку абласнога суда, як паведамлялася раней. Для працэсу вызначылі памяшканне для суда ў турме. Сам суд перанесены з 16 на 18 траўня.

Прадпрымальніка з Ваўкавыска абвінавачваюць адразу па дзесяці артыкулах Крымінальнага кодэкса. Раней паведамлялася, што 18 траўня пачнецца судовы працэс і ва Уладзіміра Гундара — імаверна, разам з Мікалаем у гэты дзень пачнуць судзіць усіх фігурантаў «справы Аўтуховіча».

Выстава «СКУЛЬПТУРА» ў Гродне закрылася канчаткова

Выстава сучаснай скульптуры ў Гродне ўжо не адкрыецца. Прапанаваная форма далейшай працы экспазіцыі не задаволіла куратара і адміністрацыю галерэі. Мяркуючы па каментары куратара Івана Арцімовіча, частку работ прапанавалі прыбраць, але ён з такой прапановай не пагадзіўся.

Выстава станковай скульптуры «СКУЛЬПТУРА» адкрылася 29 красавіка ў ў галерэі «400 квадратаў» у ТРК Triniti. Яна павінна была працаваць да канца траўня. З просьбай закрыць выставу да ўладаў звярнулася актывістка Вольга Бондарава. На яе думку, некаторыя мастакі, якія ўдзельнічаюць у ёй, вядомыя антыдзяржаўнымі выказваннямі. Ці звязанае спыненне працы з яе зваротам, невядома — ні прадстаўнікі ТРК, ні гарвыканкам, ні куратар сітуацыю Hrodna.life не пракаментавалі.

Медцэнтры «Ладэ» ў Беларусі прыпыняюць працу

Ва ўсіх медыцынскіх цэнтрах «Ладэ» прыпыняюць аказанне медыцынскіх паслуг з 16 траўня. Як надоўга — пакуль невядома. Прычынай стала прадпісанне Міністэрства аховы здароўя Рэспублікі Беларусь.

У Гродне ліквідавалі краязнаўчае таварыства «Коматава» — старшыня не згодны з рашэннем суда

Па рашэнні Гродзенскага абласнога суда ліквідавалі грамадскую арганізацыю «Краязнаўчае таварыства — Коматава». Кіраўнік заплаціць тры базавыя велічыні (96 рублёў) дзяржпошліны. Арганізацыя даследавала гісторыю мясцовых цэркваў і зберагала гісторыка-культурную спадчыну. Рэдакцыя Hrodna. life прааналізавала дакументы, якія трапілі ў яе распараджэнне, і спытала старшыню Васіля Сямко, як ён будзе дзейнічаць далей.

У Беларусі распрацоўваюць аналаг Booking і Airbnb

У Беларусі плануюць запусціць аналаг сэрвісаў Booking і Airbnb для браніравання жылля ў падарожжах. Сэрвіс ствараюць на базе сайта «Белкрай».

З пачаткам вайны Расіі супраць Украіны 24 лютага 2022 года замежныя кампаніі масава пачалі пакідаць рынак Беларусі і Расіі альбо прыпыняць на неакрэслены час працу. У пачатку сакавіка сэрвісы бранавірання жылля і гатэлей Booking.com и Airbnb закрылі магчымасць здымаць кватэры і нумары ў гатэлях Беларусі і Расіі.

Да 3000 рублёў спаганяюць з асуджаных за абразу ў Гродне. Колькі людзей ўжо асудзілі?

Толькі ў судзе Ленінскага раёна Гродна з 2020 па 2022 гады па арт. 369 КК асудзілі 23 чалавекі. Іх прызналі вінаватымі ў абразе прадстаўніка ўлады ў інтэрнэце. У большасці выпадкаў абвінавачаных пасля ўзбуджэння крымінальнай справы заключалі пад варту. У судзе іх каралі абмежаваннем волі з накіраваннем у выпраўленчую ўстанову адкрытага тыпу на тэрміны ад 1,5 да 3 гадоў. Мабільныя тэлефоны і ноўтбукі канфіскавалі як сродкі здзяйснення злачынства.

Відэаназіранне хочуць дадаць у абавязковыя камунальныя паслугі

У Беларусі можа вырасці плата за камунальныя паслугі. Прычына ў тым, што ў яе могуць дадаць выдаткі на відэаназіранне ў пад’ездах. Пра гэта 11 траўня паведаміў першы намеснік міністра сувязі і інфарматызацыі Павел Ткач.

Незалежны прафсаюз «Гродна Азот» прызналі экстрэмісцкай арганізацыяй

Экстрэмісцкай прызналі першасную арганізацыю Беларускага Незалежнага прафсаюза работнікаў ААТ «Гродна Азот». Гродзенскі абласны суд таксама прыняў рашэнне аб забароне дзейнасці арганізацыі і яе ліквідацыі. Падрабязнасці працэсу невядомыя — яго зрабілі закрытым з-за дакументаў, «якія змяшчаюць службовую інфармацыю абмежаванага распаўсюджвання».

Чарговы суд за абразу міліцыянта Казлоўскага. Выхавацельку дзіцячага садка асудзілі на 1,5 гады «хатняй хіміі»

Суд Баранавічаў і Баранавіцкага раёна 6 траўня асудзіў Святлану Анціпкіну на 1,5 гады «хатняй хіміі». Прычынай стаў абразлівы каментар у «Аднакласніках» пад публікацыяй з фота старэйшага лейтэнанта міліцыі Ленінскага РАУС Гродна Уладзіміра Казлоўскага.

У Гродне адзначылі Дзень Перамогі, а Караеў распавёў пра «прывід фашызму недалёка ад нас»

Гродзенцы адсвяткавалі 9 траўня на Кургане Славы 77-ю гадавіну Дня Перамогі. На свяце можна было паглядзець выставу зброі і выступ сабак, падпісаць паштоўку і заплесці сабе косы або купіць шашлык і салодкую вату.

Міліцыя правяла прафілактычную гутарку з гродзенскім святаром Андрэем Ноздрыным

Міліцыя правяла прафілактычную гутарку з настаяцелем храма Спірыдона Трыміфунцкага ў Гродне Андрэем Ноздрыным. Гэта стала вядома з адказу за подпісам начальніка УУС Адміністрацыі Кастрычніцкага раёна Гродна Андрэя Форыся. Яго апублікавала актывістка Вольга Бондарава.