Згодна з генпланам горада, на Дзевятоўцы-3 з’явіцца 10-павярховы 80-кватэрны жылы дом. Гэта ўжо другі дом, які з’явіцца ў існуючай забудове. З’яўленне папярэдняга абмяркоўвалі ў лістападзе 2021 года.
Побач з домам выдзеляць асобную зону для праезду і парковак унутры двара. Пляцоўкі для гульняў дзяцей і адпачынку жыхароў не будуць перасякацца з транспартам. Пад’езд да дома будзе з боку вул. Дзяржынскага. Уздоўж праезду і парковак прадугледжаны тратуар.
Тратуары і дарожкі захаваюць. Таксама на тэрыторыі з’явіцца сквер плошчай 3660 кв. м. У ім уладкуюць пляцоўкі для адпачынку і заняткаў спортам.
Ушчыльненне Дзевятоўкі-3. Фота: Гродзенскі гарвыканкам 
Ушчыльненне Дзевятоўкі-3. Фота: Гродзенскі гарвыканкам 
Ушчыльненне Дзевятоўкі-3. Фота: Гродзенскі гарвыканкам
Дваровую і прылеглую тэрыторыю добраўпарадкуюць. Пакрыцці і праезды будуць з бетону, пляцоўкі і тратуары — з дробнаштучнай пліткі. Абсталююць пляцоўкі адпачынку, дзіцячыя гульнявыя і спартыўныя пляцоўкі. Існуючыя гаспадарчыя пляцоўкі часткова перанясуць і ўладкуюць новыя.
Праект прадугледжвае стварэнне безбар’ернага асяроддзя: паніжаныя борты на пешаходных пераходах, уладкаванне пандусаў і парковачных месцаў для фізічна аслабленых асоб.
Будаўніцтва абмяркуюць з гродзенцамі
З 7 па 31 траўня пройдуць грамадскія абмеркаванні праекта. Яго экспазіцыю можна паглядзець да 21 траўня ў працоўны час у вестыбюлі будынка ўпраўлення будаўніцтва, архітэктуры і горадабудаўніцтва Гродзенскага гарадскога выканаўчага камітэта па адрасе вул. Антонія Тызенгауза, 3.
Прэзентацыя праекта пройдзе 18 траўня ў 15.30 у будынку Гродзенскага гарвыканкаму на плошчы Леніна, 2/1, каб. 202 (2 паверх). Інфармацыя аб выніках абмеркаванняў з’явіцца ў чэрвені.
Ушчыльненне Дзевятоўкі
Яшчэ адзін жылы дом з’явіцца ў раёне існуючай забудовы на Дзевятоўцы-3. 10-павярховы будынак будзе складацца з трох блок-секцый. У ім будзе 50 двухпакаёвых і 60 аднапакаёвых кватэр. Будынак узвядзе Упраўленне капітальнага будаўніцтва Гродна. Распрацоўвалі эскіз будынка таксама згодна з генпланам горада.
