Распісваем яйкі ў тэхніцы дудлінг. Патрэбныя цыбулевае шалупінне і маркер

Наогул дудлінг — гэта крамзолі. Так што такая тэхніка роспісу даступная ўсім, піша Telegram-канал «Тётя Ира Разрешила». Асабліва — аматарам запаўняць калякамі-малякамі цэлыя старонкі нататнікаў у час планёрак. Калі гэта пра вас — то чаму б не выкарыстоўваць адпрацаваную тэхніку для роспісу яек? А калі не пра вас — чаму б не паспрабаваць зрабіць звыклыя рэчы па-новаму? # #ТетяИраРазрешила і таксама распісала яйкі ў тэхніцы дудлінг. Паглядзіце, што атрымалася.

Што з фонам?

Яйкі трэба зварыць. Гэта галоўнае. Што рабіць з фонам — вырашайце самі. Можна маляваць па белым. Або спачатку пафарбаваць яйкі цыбулевым шалупіннем.

Чым малюем?

Для роспісу патрэбныя будуць чорны і белыя колеры. У Цёці Іры ў гаспадарцы знайшоўся чорны маркер з вадараспушчальнымі чарніламі і белая гуаш. Калі ў вас ёсць белы маркер — таксама добра. Можна выкарыстоўваць фламастары або акрылавыя фарбы.

Што малюем?

Што хочам, то і малюем — #ТетяИраРазрешила. Дудлінг — гэта сучаснае мастацтва і ірацыянальны стыль малявання. Правілаў тут няма. Можа вам захочацца маляваць простыя геаметрычныя фігуры. А можа — кветкава-раслінныя кампазіцыі або россыпы кропак, палачак і спіралек. У дудлінгу галоўнае — пачаць.

Далей працэс зацягвае і сам дыктуе логіку. У канцы вы самі здзівіцеся выніку — праўда-праўда.

Дудлінг. Чаму цяпер?

Маляванне простых элементаў - добры спосаб расслабіцца, адключыць бясконцую плынь думак у галаве. Самі заўважыце, як уся ўвага сыдзе ў рукі і на паўгадзіны для вас стануць важнымі палосачкі і кропачкі. Ці кветачкі і лісцікі.

Праз паўгадзіны ў вас будзе не толькі распісанае яйка. Напэўна, атрымаецца здзівіцца сваім талентам і здольнасцям, усвядоміць уласную крэатыўнасць і метафарычнасць мыслення.

Настрой дудлінг дакладна падымае, а гэта — самае галоўнае перад святамі.

P. S. Калі ў чытачоў Hrodna.life узнікаюць сумневы, ці можна есці яйкі, шкарлупіна якіх размаляваная маркерамі, можна параіць знайсці спецыяльныя маркеры з харчовымі фарбавальнікамі. Другі варыянт — распісваць звычайнымі спіртавымі маркерамі пустую яйчную шкарлупіну. Для сувеніраў такі роспіс дакладна не будзе шкодным.

У гэтым выпадку трэба акуратна зрабіць адтуліну ў сырым яйку і выліць змесціва. А далей — рабіць роспіс любымі маркерамі і фарбамі.