На мяжы з Польшчай дальнабойшчыкі выйшлі на дарогу і хочуць самі рэгуляваць рух. З-за чаго гэта адбылося?

Каля пункта пропуска «Бераставіца» кіроўцы вялікагрузаў выйшлі на дарогу, каб самастойна рэгуляваць рух аўтамабіляў. Прычына — іншыя кіроўцы часта парушаюць чаргу. З-за гэтага «хвост» чаргі не рухаўся каля 30 гадзінаў, паведаміў «АвтоГродно».

«За 27 гадзінаў я не праехаў ніводнага сантыметра. У гэты час міма мяне ў бок мяжы ўвесь час праязжаюць без чаргі іншыя грузавікі. Гэта трэба спыніць», — сказаў адзін з кіроўцаў у размове з «АвтоГродно».

Справа ў тым, што грузавікам забаронена стаяць на вуліцах суседняга з пунктам пропуску мястэчка Пагранічы. З-за гэтага чарга абрываецца ў населеным пункце і працягваецца пасля яго. Гэтым карыстаюцца некаторыя кіроўцы, якія аб’язджаюць такім чынам калег, што стаяць перад мястэчкам.

«Калі запытаеш, чаму ён праехаў міма, то кіроўца адкажа, што ў яго ёсць пропуск. Праблема ў тым, што ў 70% такіх кіроўцаў пропуску няма, яны ўводзяць ў зман астатніх, каб тыдзень не стаяць у чарзе», — патлумачыў кіроўца з чаргі. Яе агульная даўжыня зараз — каля 20 кіламетраў.

Спачатку для вырашэння праблемы кіроўцы звярнуліся да супрацоўнікаў ДАІ. Але інспектары сказалі, што іх абавязак — кантраляваць бяспеку руху і правяраць, каб ніхто не стаяў уздоўж вуліц у Пагранічным.

Як можна ўрэгуляваць сітуацыю

Дальнабойшчыкі лічаць, што трэба перапісваць нумары грузавікоў у чарзе і звяраць іх на ўездзе ў пункт пропуска «Бераставіца». Парушальнікаў - разварочваць ў канец чаргі. Альбо дзейнічаць як польскія памежнікі, якія за парушэнне чаргі спыняюць і выпісваюць кіроўцу штраф 500 злотых (€ 110 еўра — заўв. Hrodna.life).

Акрамя гэтага незадаволеныя дальнабойшчыкі лічаць, што кіроўцаў, якія прыязджаюць афармляць мытныя дакументы ў лагістычны цэнтр «Бераставіца», трэба адпраўляць у канец чаргі. Так было раней, але зараз кіроўцы застаюцца на тэрыторыі пункта пропуска і хутка праходзяць мяжу.