«Хай мне чытачы патэлефануюць». Што дэпутаты адказалі на пытанні падпісчыкаў Hrodna.life

Прамую тэлефонную лінію з гродзенцамі 21 верасня правялі адразу дзве дэпутаткі Палаты прадстаўнікоў Нацыянальнага сходу Рэспублікі Беларусь — Ірына Луканская і Алена Патапава. Днём раней рэдакцыя Hrodna.life папрасіла дасылаць пытанні для дэпутатак. Карэспандэнтка Hrodna.life патэлефанавала на лінію і задала пытанні, якія адабралі ў рэдакцыі.

Ірыне Луканскай чытачы адрасавалі адно пытанне, Алена Патапавай — сем. Некаторыя пытанні рэдакцыя апусціла, бо яны насілі правакацыйны характар.

Выплаты медыкам і гонар за законапраекты

Чытач цікавіўся: у Беларусь прыйшла чацвёртая хваля COVID-19, а медыкам перастануць выплачваць даплаты за працу з заражанымі пацыентамі. «Як цяпер будуць аплачваць гадзіны працы з „кавіднымі“ пацыентамі і куды пойдуць зэканомленыя грошы, раз яны не ідуць медработнікам?», — пытаўся ён.

 — Такія канкрэтныя пытанні цалкам можна задаць канкрэтнай асобе — галоўнаму лекару Цэнтральнай паліклінікі. Я ўпэўненая, што ўсё робіцца згодна з інструкцыямі Міністэрства аховы здароўя. «Кавідныя» надбаўкі захоўваюцца тым, хто сапраўды працуе з «кавіднымі» хворымі. Гэта я дакладна ведаю. Канкрэтныя сумы вы можаце ўдакладніць у тых, хто непасрэдна гэтым займаецца на сённяшні дзень. Калі кагосьці канкрэтна «пакрыўдзілі», няхай да мяне звяртаецца, я буду вырашаць пытанне з канкрэтнымі людзьмі. < … > [Зэканомленыя грошы трэба накіраваць], вядома, на развіццё сістэмы аховы здароўя. На сённяшні дзень на ахову здароўя выдаткі павялічаныя на 20% у параўнанні з папярэднім годам. І наша сістэма аховы здароўя даказала сваю слушнасць — у тым ліку на сусветным узроўні. І Сусветная Арганізацыя Аховы здароўя дала найвышэйшую ацэнку працы з COVID-19 беларускім медыкам, — адказала Ірына Луканская.

Чытайце таксама: Мінздароўя: «Знаходзімся амаль на самых высокіх лічбах мінулых хваляў». У Гродне зноў перапрафілююць бальніцы пад каранавірус

«У памяшканні былой пальчаткавай фабрыкі „Акцэнт“ па вул. Маставой адкрыліся кафэ, якія працуюць да пяці раніцы па выхадных. Гэтыя ўстановы выстаўляюць столікі на вуліцы і ва ўнутраным дворыку. Вечарамі і ноччу вельмі шумна ад музыкі і крыкаў п’яных наведвальнікаў. Нашы звароты ў аблвыканкам і міліцыю далі толькі адпіскі ад гэтых арганізацый. Праблема так і не вырашана. Хочам сустрэцца з нашымі дэпутатамі, і хай яны ўдзельнічаюць у нашай праблемнай сітуацыі. З уладамі вырашыць пытанне не ўдаецца», — напісаў чытач. «Гэта не мая акруга, не магу вам нічога сказаць. Першы раз аб гэтай праблеме чую», — адказала Алена Патапава.

Чытачка адпраўляла дэпутатцы электронны зварот, у якім прасіла даць справаздачу аб дзейнасці, але адказу не было. На гэта Патапава папрасіла назваць дадзеныя чытаткі. Таксама яна зазначыла, што абавязаная даваць справаздачу аб працы раз у год. Апошні раз гэта было ў снежні 2020 года.

«Калі школы будуць забяспечаны інтэрнэтам, асабліва раёны, нармальным мелам, настаўнікі паперай, каб мець магчымасць друкаваць дадатковыя матэрыялы (усе дзеці рознага ўзроўню і не могуць вучыцца па адным падручніку. Добрыя настаўнікі падладжваюцца і для больш слабых друкуюць заданні лягчэй, моцным — складаней), калі настаўнікаў забяспечаць планшэтамі або камп’ютарамі, каб яны маглі карыстацца электроннымі дзённікамі ў рэжыме рэальнага часу, а не раз у тыдзень адзнакі выстаўляць і хатнія заданні ўносіць, калі яны ўжо не патрэбныя нікому? — пацікавіўся чытач. Алена адказала, што раёны — не яе адказнасць, «пытанні павінны быць абгрунтаванымі, а праблемы — канкрэтнымі, а не хтосьці дзесьці нешта казаў пра раённыя школы».

Яшчэ адзін чытач цікавіўся, удзелам у распрацоўцы або прыняцці якіх законаў дэпутаткі ганарацца. «У сэнсе — я ганаруся? Хай мне чытачы патэлефануюць на прамую лінію, мы з імі больш падрабязна абмяркуем, што яны закладваюць у гэтае пытанне. Вы перадайце — хай яны мне патэлефануюць».

Што яшчэ пыталіся чытачы?

Сярод іншага, чытачоў цікавіла:

• чаму масавыя мерапрыемствы праводзяцца бліжэй за 50 метраў (дыстанцыя, прадугледжаная заканадаўствам) каля консульстваў Літвы і Польшчы ў Гродне?
• ці дапускаюць яны магчымасць фальсіфікацыі выбараў не толькі падчас прэзідэнцкай кампаніі, але і парламенцкай?
• ці зможа кожная з іх сфармуляваць абавязкі, мэты і спосабы іх дасягнення дэпутатам?

Чым займаюцца дэпутаты?

Ірына Луканская і Алена Патапава сталі дэпутатамі пасля выбараў-2019. Тады студэнты скардзіліся на прымус да датэрміновага галасавання, а гродзенец не ўбачыў свой голас ў пратаколе.

Асноўныя кампетэнцыі Палаты прадстаўнікоў, паводле сайта president.gov.by, — разгляд законапраектаў, прызначэнне выбараў прэзідэнта, адабрэнне кандыдатаў, прызначаных прэзідэнтам на пасаду Прэм’ер-міністра, ацэнка работы ўрада. Палата прадстаўнікоў Нацыянальнага сходу штогод праводзіць па дзве чарговыя сесіі. Пазачарговыя сесіі склікаюцца ўказамі прэзідэнта.

Выходзілі да гродзенцаў пасля выбараў

Дэпутаты Ірына Луканская і Алена Патапава былі ў ліку прадстаўнікоў улады на сустрэчы ў гарвыканкаме 17 жніўня 2020 года. На ёй абмяркоўвалі зварот з патрабаваннямі пратэстоўцаў. Прадстаўнікі пратэстоўцаў тады прыйшлі да высновы, што чыноўнікі сыходзяць ад адказаў на прамыя пытанні, і дэманстратыўна пакінулі залу. Атрымалася абмеркаваць толькі некалькі з патрабаванняў пратэстоўцаў. Увечары дэпутаты выйшлі на плошчу Леніна, каб абмеркаваць з гродзенцамі выхад з крызісу. Камунікацыя была эмацыйнай і да выніку не прывяла.

Чытайце таксама:

• Гарадзенскія актывісты сустрэліся з чыноўнікамі. На якія пытанні (не) адказалі ўлады