У праваабаронцаў і грамадскіх арганізацый — ператрусы (абноўлена). У Гродне затрымалі Віктара Сазонава

А 8.15 раніцы з ператрусам прыйшлі да гродзенскага праваабаронцы Віктара Сазонава, сябра пазбаўленага ў Беларусі рэгістрацыі праваабарончага цэнтра «Вясна». Ператрус праводзілі супрацоўнікі Дэпартамента фінансавых расследаванняў.

UPD 22.00. Віктар Сазонаў затрыманы на 72 гадзіны, ён знаходзіцца ў ІЧУ на вул. Гая, паведаміла «Вясна» ў Telegram. 14 ліпеня ператрусы адбыліся ў цэлым шэрагу грамадскіх арганізацый і ініцыятыў.

«Ператрус скончыўся, яго затрымалі, хутчэй за ўсё пакуль на 72 гадзіны», — расказаў Hrodna.life калега Віктара Сазонава, Уладзімір Хільмановіч.

У якасці каго затрыманы Віктар Сазонаў, пакуль невядома. Пасля ператруса ў яго забралі тэхніку.

Ператрусы і затрыманні 14 ліпеня

Раней 14 ліпеня з пастановай на ператрус сілавікі прыйшлі да юрыста цэнтра «Вясна» Уладзімера Лабковіча і сябра Рады «Вясны» Валянціна Стэфановіча, паведамляюць праваабаронцы. Стэфановіча затрымалі. Стала вядома, што ў пастанове на ператрус пазначаны артыкулы 342 (арганізацыя дзеянняў, якія груба парушаюць грамадскі парадак) і 243 (ухіленне ад выплаты падаткаў) Крымінальнага кодэкса. Таксама ў Мінску затрымалі журналіста і праваабаронцу Сяргея Сыса.

Няма сувязі са старшынём цэнтра «Вясна» Алесем Бяляцкім, паведамляе «Вясна». Ператрус прайшоў дома ў каардынатара кампаніі «Праваабаронцы супраць смяротнага пакарання» Андрэя Палуды. Палуду затрымалі і павезлі на ператрус у пляцоўку кансультацыйна-інфармацыйнай установы па папулярызацыі прававой культуры «Тэрыторыя правоў». Затрыманая праваабаронца Яўгенія Бабаева. У Барысаве затрыманы юрыст і праваабаронца Алег Мацкевіч, паведаміў Ex-press.by. Ператрусы прайшлі ў праваабаронцы Алены Лапцёнак і эканаміста Яраслава Раманчука, паведамляе «Радыё С**бода».

Таксама 14 ліпеня ператрусы адбываюцца:

• у дырэктаркі Цэнтра прававой трансфармацыі Lawtrend Вольгі Смалянка. Ператрус мусіць прайсці і ў офісе арганізацыі;
• у офісе руху «За свабоду». Пра гэта паведаміў яго кіраўнік Юры Губарэвіч;
• у Міколы Шараха, кіраўніка ячэйкі свабоднага прафсаюза з Полацка і сябры Полоцкага праваабарончага таварыстваў;
• у Кірыла Кофанава (Брэст, праваабарончая арганізацыя Human Constanta);
• у офісе дабрачыннага праекта «Имена»;
• у «Згуртавання беларусаў свету «Бацькаўшына»;
• у праваабарончай арганізацыі «Гендэрныя перспектывы»;
• у офісе «Беларускай асацыяцыі журналістаў». Там выламалі дзверы;
• у офісе праваабарончай арганізацыі «Беларускі Хельсінскі камітэт»;
• у даследчым цэнтар BEROC;
• на сядзібе партыі «Беларускі народны фронт» (БНФ);
• у «Таварыстве беларускай школы»;
• у цэнтры «Супольнасць»;
• у офісе гродзенскай грамадскай арганізацыі «Цэнтр «Трэці сектар»;
• у «Фондзе імя Льва Сапегі»;
• у Офісе еўрапейскай экспертызы і камунікацый;
• у адукацыйным цэнтры «ПОСТ».

Чытайце таксама:

• Суд за заклікі да тэрарызму і лагер, дзе вучаць дзеянням пры масавых беспарадках. Як прайшоў тыдзень у Гродне і вобласці
• Затрыманні журналістаў працягваюцца