Суд за заклікі да тэрарызму і лагер, дзе вучаць дзеянням пры масавых беспарадках. Як прайшоў тыдзень у Гродне і вобласці

Тры крымінальныя справы за абразу прадстаўніка ўлады і адно — за «блюзнерскае стаўленне» да сцяга разглядаюць у Гродне. Тыдзень адзначыўся «зачысткай» і ціскам на журналістаў і актывістаў. У тым ліку і на Hrodna.life — наш Telegram-канал прызналі экстрэмісцкім. Мы вывучылі, як прайшоў тыдзень з 5 па 11 ліпеня ў Гродне і вобласці.

«Блюзнерскае стаўленне» да сцяга

17-гадоваму жыхару Смаргонскага раёна інкрымінавалі здзек над дзяржаўным сцягам (арт. 370 КК). Пракуратура накіравала справу ў суд. Хлопца адправілі «пад нагляд».

Паводле версіі абвінавачвання, 29 траўня 2021 года, а 23.30 хлопец «наважыў прадэманстраваць сваё абразлівае і блюзнерскае стаўленне да дзяржаўнага сцяга і сарваў яго з фасада будынка Жодзішкаўскай сельскай бібліятэкі».

У Гродне вызначылі месцы для мерапрыемстваў

Гарадскія ўлады рэкамендавалі праводзіць масавыя мерапрыемствы ў Каложскім парку і лесапарку Румлеўскі. Акрамя гэтага, Гродзенскі гарвыканкам прама забараніў правядзенне масавых мерапрыемстваў на плошчы і вуліцы Савецкай, плошчы Леніна і ў парку Жылібера.

Месцы правядзення масавых мерапрыемстваў вызначаны ў адпаведнасці з абноўленым законам «Аб масавых мерапрыемствах». Рашэнне гарвыканкама № 460 апублікавалі на Нацыянальным прававым інтэрнэт-партале 6 ліпеня.

У вобласці правяраюць тэрытарыяльную абарону

З 6 ліпеня праводзіцца першы этап комплекснай праверкі тэрытарыяльнай абароны Гродзенскай вобласці. Падчас праверкі мясцовыя органы ўлады Мастоўскага раёна сфарміруюць штаб тэрытарыяльнай абароны і асобны стралковы батальён тэрытарыяльных войскаў.

Падчас камандна-штабнога вучэння тэрытарыяльныя войскі разам з супрацоўнікамі органаў унутраных спраў на практыцы адпрацуюць пытанні аховы важных аб’ектаў і барацьбы з дыверсійна-разведвальнымі групамі праціўніка.

Лагер, дзе дзеці прымяраюць экіпіроўку міліцыі

На базе Мастоўскага РАУС сёлета адкрылі летні аздараўленчы лагер «Навабранцы».

Школьнікі прымерылі на сябе экіпіроўку міліцыі, пабывалі ў музеі УУС і музеі турмы № 1 у Гродне, а таксама ля Кургана Славы. Дзяцей навучалі, як дзейнічаць пры масавых беспарадках і як прымяняць прыёмы самаабароны.

Абраза прадстаўніка ўлады

16 чэрвеня пракуратура Гродзенскай вобласці распачала крымінальную справу па артыкуле 369 КК «Абраза прадстаўніка ўлады» у дачыненні да 53-гадовага жыхара Слоніма.

Мужчына абразіў прадстаўніка ўлады ў групе ў «Аднакласніках». Падазраваны прызнаў віну і сказаў, што быў у не зусім адэкватным стане і не аддаваў сабе справаздачу.

www.youtube.com/watch?v=t90faChv_sg&ab_channel=%D0%A3%D0%92%D0%94%D0%93%D1%80%D0%BE%D0%B4%D0%BD%D0%BE

Яшчэ адна абраза прадстаўніка ўлады

Затрымалі гродзенца, які ў студзені 2021 года ў Telegram-канале, прызнаным экстрэмісцкім, размясціў абразлівы каментар у дачыненні да ўчастковага Ленінскага раёна Гродна.

Падазраваны сваю віну прызнаў і раскаяўся. Ён — падазраваны па арт. 369 КК, цяпер знаходзіцца ў ізалятары.

www.youtube.com/watch?v=Ve-VYqr8MVA&ab_channel=%D0%A3%D0%92%D0%94%D0%93%D1%80%D0%BE%D0%B4%D0%BD%D0%BE

Асудзілі лекара

8 ліпеня ў судзе Кастрычніцкага раёна Гродна вынеслі прысуд ўрачу ультрагукавой дыягностыкі Алены Фадзеевай. Яе абвінавацілі ў «знявазе прадстаўніка ўлады» па артыкуле 369 КК.

Суддзя вынес прысуд: 2,5 гады абмежавання волі без накіравання ва ўстанову адкрытага тыпу («хатняй хіміі»). Таксама лекар павінна будзе заплаціць абражанаму 900 рублёў. Яе тэлефон канфіскавалі «як сродак здзяйснення злачынства».

Раней, 7 лістапада 2020, Алена Фадзеева ўдзельнічала ў акцыі медыкаў каля гарадской клінічнай бальніцы № 1. За гэта ёй прысудзілі штраф па арт 23.34 КаАП. У сакавіку 2021 года доктара звольнілі з дзіцячай паліклінікі, паведамляе Telegram-канал «Белые халаты».

Суд за заклікі да тэрарызму

Гродзенскі абласны суд працягвае разглядаць крымінальную справу 29-гадовага Леаніда Герасімлюка. Яго абвінавачваюць у публічных закліках да гвалту і здзяйснення актаў тэрарызму. Нібыта ён размяшчаў іх у кастрычніку-лістападзе 2020 года ў адным з публічных Telegram-чатаў і ўчыняў іншыя дзеянні, накіраваныя на прычыненне шкоды нацыянальнай бяспецы Беларусі (ч. 3 артыкула 361 КК).

Справу разглядае суддзя Уладзімір Яўхута, дзяржабвінаваўца — Анжаліка Клішына. Леаніда Герасімлюка затрымалі 25 лютага і змясцілі ў СІЗА № 1 Гродна. Сваёй віны ён не прызнае. Па яго словах, пры затрыманні яго збілі.

Чытайце таксама:

• Четыре «уголовки» за оскорбление президента и три — за оскорбление милиционера. Как прошла неделя в Гродно и области
• Сутки за флаг в лесу, надругательство над символикой и обвиняемый в розыске. Как прошла неделя в Гродно и области
• Активистов зовут в прокуратуру, политзаключенные отправились на «химию». Как прошла неделя в Гродно и области