Мерапрыемства ў Гродзенскім дзіцячым хоспісе. Фота: Алена Кавальчук
Дырэктарцы Гродзенскага дзіцячага хоспіса Вользе Вялічка 17 чэрвеня напісаў у Viber чалавек, які прадставіўся судовым выканаўцам. Ён паведаміў, што калі супрацоўнікі хоспіса не дадуць ключы ад памяшканняў, іх прымусова ўскрыюць з супрацоўнікамі РАУС. «Дыялог у нас не атрымліваецца», — канстатаваў ён.
Зараз Гродзенскі дзіцячы хоспіс працуе па вул. Дамейка, 7. Да гэтага хоспіс размяшчаўся ў дзіцячай паліклініцы № 2 па вул. Гагарына, 18, а пазней — у будынку Камбіната школьнага харчавання (КШП). Абедзве арганізацыі скасавалі дагавор з хоспісам.
У траўні 2020 года кіраўніцтва паліклінікі палічыла, што валанцёры павінны пакінуць гэтае памяшканне. Старшыня гродзенскага гарвыканкама Мечыслаў Гой прапанаваў валанцёрам памяшканне камбіната школьнага харчавання (КШХ) у Пышках, якое не выкарыстоўвалася, на тры месяцы. Пытанне з арэндай паабяцалі вырашыць за кошт горада, дапамагчы з пошукам спонсараў. У верасні мінулага года КШХ змяніў замкі на майстэрні і прымусіў хоспіс пакінуць памяшканне. Пазней камбінат скасаваў дамову арэнды з хоспісам праз суд.
«Судовы выканаўца» прадаставіў Вользе два судовых загады. Паводле першага, рашэнне Эканамічнага суда Гродзенскай вобласці аб высяленні хоспіса з памяшкання на вул. Гагарына ўступіла ў сілу 14 траўня. На працягу пяці дзён супрацоўнікі павінны былі вызваліць памяшканні.
Вольга ў пачатку чэрвеня накіравала зварот у пракуратуру і паведаміла, што пакуль яны не могуць выселіцца. Справа ў тым, што 19 траўня ў памяшканні на вул. Гагарына, 18 знаходзілася супрацоўніца хоспіса, якая рыхтавала памяшканне і дакументацыю для высялення. Да яе прыйшлі супрацоўнікі паліклінікі № 2, абражалі і аказвалі ціск. Акрамя таго, работнікі паліклінікі маюць доступ да былога памяшкання хоспіса. Вольга Вялічка мяркуе, што іх рэчы могуць быць пашкоджаныя або скрадзеныя. Яна просіць правесці праверку ў дачыненні да дзеяння супрацоўнікаў паліклінікі і перастаць аказваць ціск на хоспіс. У пракуратуры зварот зарэгістравалі 2 чэрвеня — на яго разгляд можа сысці да месяца.
Другі судовы загад тычыцца памяшканняў у Пышкі, 5а. Прысуд уступіў у сілу 12 студзеня. Дырэктарка спрабавала ўзгадніць з КШП дзень вывазу рэчаў, але ад іх не было адказу, пракаментавала Вольга Hrodna.life.
Вясной гэтага года ў хоспіс па вул. Дамейка, 7 праніклі невядомыя. Кіраўніцтва звярнулася па гэтым факце ў міліцыю — адказу яшчэ не было. Таксама праз восем месяцаў крымінальную справу на кіраўніка хоспіса перакваліфікавалі ў адміністрацыйную па арт. 13.6 КаАП «Нявыплата або няпоўная выплата сумы падатку». Цяпер з ахвяраванняў хоспіс заплаціць падаткі.
Грамадская дабрачынная арганізацыя «Гродзенскі дзіцячы хоспіс» была заснавана 19 верасня 2008 года для дапамогі цяжка і безнадзейна хворым дзецям, якія маюць множныя парушэнні развіцця, і іх сем’ям. Зараз у хоспісе 56 падапечных.
Чытайце таксама:
Гатэль «Кронон Парк Гатэль», размешчаны ў лесапарку Пышкі ў Гродне, атрымаў прэмію Travel Time Awards…
У 2024 годзе бацькоўскіх правоў у Беларусі былі пазбаўлены бацькі 3 955 дзяцей. Гэта найбольшая колькасць…
Жыхар Гродна набіў на шчыкалатцы татуіроўку з выявай расійскага рэпера Пашы Тэхніка і подпісам “Досвидания”.…
На сёмым паверсе дома па вуліцы Ліможа, 48Б выстаўлена на продаж трохпакаёвая кватэра плошчай 74,8…
У Гродне рыхтуюцца да святкавання 80-годдзя Перамогі ў Вялікай Айчыннай вайне. Мерапрыемствы аб'яднаюць пад канцэпцыяй…
З 5 красавіка ў Гродне талоны на праезд у гарадскім грамадскім транспарце даражэюць на 10…