Гастрафэст: наведаць цяжка прапусціць. Дзе паставяць коску гродзенцы?

Выйсці з дома, смачна паесці і быць у трэндзе — пра такую матывацыю схадзіць на гастрафэст распавядалі гродзенцы карэспандэнтцы Hrodna.life. Патрапіць у некаторыя ўстановы фестывалю аказалася няпроста. У іншых выходзіла атрымаць сэт нават без чакання. Колькасць наведвальнікаў за дзень ва ўстаноў-удзельніц гастрафэста вырасла ў параўнанні са звычайнай у 2−4 разы.

«Адказалі хутка — месцаў няма»

Жанна Лукашэвіч упершыню паспрабавала трапіць на гастрафэст. «Звычайна не ходзім па рэстаранах. Але зараз захацелася», — распавяла яна. Выбірала ўстанову па рэкламных фатаграфіях сэтаў. Першы званок для замовы зрабіла 16 красавіка. У першы раз трапіць на сэт атрымалася 26-га. У яшчэ адзін рэстаран удалося зарэзерваваць месцы на апошні дзень гастрафэста.

З аўторка 27 красавіка некаторыя рэстараны ўжо не прымаюць замовы. «Усе месцы зарэзерваваныя да канца фестывалю», — адказалі адміністратары «Беластока». На старонцы «Золотого теленка» ў Instagram паведамляюць, што сэтаў на вынас і дастаўку не забяспечаць. Прасцей за ўсё патрапіць на сэт у рэстаранах гандлёвых цэнтраў: у «Старым горадзе» (ГЦ Old City) і «Piazzetta Italiana» (ТРК Triniti). У «Подкове» і ў «Хинкальне» прыйдзецца чакаць сэт 1−2 гадзіны, але трапіць — рэальна.

«Сапраўдны» смак не заўсёды такі, як чакаеш

Для некаторых гродзенцаў гастрафэст стаў нагодай схадзіць у кавярню і правесці час з сябрамі. Яшчэ адна матывацыя — паспрабаваць «сапраўдны» смак страў ад рэстаранных шэфаў.

«Па-сапраўднаму можна наесціся і яшчэ застанецца. Усё-такі паўтара кілаграма ежы, — кажа Паліна Ткачэнка пра сэт у „Хинкальне“. — Спачатку прынеслі нам суп. Я пакаштавала пару лыжачак — мне спадабалася. Але потым аказалася, што суп востры. Гэта не выключае таго, што ён смачны. Можна есці з хачапуры».

«Асабліва вылучу салата — вельмі сакавіты, спадабаўся. Хінкалі каштавала ўпершыню. Не зразумела, чаму такі ажыятаж вакол іх. Нагадалі мне пельмені».

Хапіла на дваіх з сяброўкай

Аднаго сэта з піцэрыі «Piazzetta Italiana» цалкам хапіла на дваіх, адзначыла Вольга Сяліцкая. «Загадзя не рэзервавалі. Проста хадзілі па крамах, стаміліся, вырашылі адпачыць-падсілкавацца. Замовілі сэт і атрымалі яго хвілін праз 15. Было супер».

Дома так не прыгатуеш

«Гастрафэст ў „Артефакте“ нам вельмі спадабаўся, — кажа Ларыса Сыраваткіна. — Кулябяка з цялячымі мазгамі, з ягадамі і апельсінавымі цукатамі - незвычайна і смачна. Сам дома так не прыгатуеш. Прыгожа падавалі акуня ў саляным панцыры. Афіцыянтка яго падпаліла, елі, калі полымя згасла. Спадабаўся мядовік, як хатні. Выхад сэта — кілаграм. Наелася так, што абышлася без вячэры».

Лайфхак ад дасведчанага гурмана

Наведаць за тыдзень чатыры ўстановы ўдалося Кацярыне Забелінай. Яна распавяла, што звычайна выходзіць паабедаць не дома некалькі разоў на месяц. Таксама ў кафэ і рэстаранах яна сустракаецца з сяброўкамі ці прызначае дзелавыя сустрэчы. Калі праходзяць гастрафэсты — абавязкова імкнецца патрапіць.

У Кацярыны ёсць свой сакрэт, які дапамагае трапіць нават у самыя пафасныя месцы.

«Заўсёды ёсць розніца, спрабуеш патрапіць у пачатку ці потым. У першыя дні заўсёды прасцей. Усе яшчэ разгойдваюцца. У некаторыя ўстановы можна прыйсці без запісу».

Пра візіт у бар «Эсперанто» Кацярына напісала на сваёй старонцы ў Facebook:

««Эсперанто» паліў у прамым сэнсе слова: стравы то гарэлі, то дыміліся. А калі прынеслі дэсерт, я нават западозрыла, што цяпер дакладна ірване… Але абышлося.

Ахвотных было шмат. Цудам удалося зарэзерваваць столік проста перад візітам. Зала была пад завязку забітая прагнымі гастрафэсціць… Спойлерну: усе стравы спадабаліся. Было эстэтычна і смачна".

Гастрафэст як вучэбнае практыкаванне і рэйтынг ад студэнтаў-маркетолагаў

Студэнты-маркетолагі з ГрДУ скарысталіся гастрафэстам не толькі каб смачна паесці. Яны зладзілі ўласнае рейтынгаванне фестывалю з пункту гледжання маркетынгу, распавяла Hrodna.life Анастасія Сазановіч.

Сістэма ацэнкі устаноў у студэнцкім маркетынгавым даследаванні ўключала падачу, арыгінальнасць, агульны знешні выгляд фатаграфіі, адпаведнасць яго стылю ўстановы. Лідзіруюць у іх рэйтынгу «Золотой теленок», «YellowStreet17» і «Беласток».