Гродзенскую краму «Адметнасць» прыйшлі правяраць з чатырох устаноў адначасова

У гродзенскую краму патрыятычных сувеніраў «Адметнасць» прыйшлі з комплексным маніторынгам інспектар па пажарнай бяспецы ад МНС, прадстаўніцы аддзелу гандлю Гродзенскага гарвыканкама і санэпідэмстанцыі і супрацоўнік аддзела ідэалогіі, які не прадставіўся. Правяральнікаў суправаджалі два міліцыянты, якія спачатку сказалі, што прыйшлі для аховы парадку, пасля назваліся пакупнікамі.

Агулам у невялікае памяшканне прыйшлі сем чалавек. Гаспадары прасілі захоўваць сацыяльную дыстанцыю, але наведнікі не рэагавалі. Уласніку крамы Сяргею Верамеенку прад’явілі прадпісанні на маніторынг. Спачатку краму праверыў прадстаўнік пажарнай службы, пасля — санэпідэмстанцыі і аддзела гандлю.

«Якія ў іх былі прэтэнзіі? Паглядзіце на нашу краму! Яна выглядае не як крама сувеніраў, а як агітацыйны пункт: як узорна праводзіць праветрыванне, апрацоўваць рукі. У нас ёсць усё, што толькі трэба, і нават трошку больш», — кажа Сяргей.

Ён патлумачыў, што да праверак яны рыхтаваліся загадзя: «Мы бачылі, што адбываецца: з „Кубікам“, „Цудоўняй“, кавярнямі. Да таго ж мы грамадскія і палітычныя актывісты. З заканадаўчага пункту гледжання мы гатовыя, маем сертыфікаты, і ўсё, што патрэбна».

Інспектар МНС пасля апытання зрабіў заўвагу, што інструкцыя пажарнай бяспекі для крамы не дастаткова адаптаваная пад памяшканне згодна з Пастановай МНС № 28 от 28.04.2018. Ён прапанаваў скінуць электронны варыянт пастановы. Па выніках маніторынгу паабяцаў выслаць прадпісанні.

Супрацоўніца санстанцыі заўваг не мела: усе антыкаранавірусныя мерапрыемствы ў краме праводзяцца, як належыць. Прадстаўніца гандлёвага аддзелу праверыла цэтлікі на таварах.

Міліцыянты тлумачылі, што прыйшлі ахоўваць правяральнікаў. Пасля таго, як на пытанне ўласніка крамы правяральнікі адказалі, што ім не патрэбна ахова, супрацоўнікі УУС сказалі, што застаюцца ў памяшканні як пакупнікі і будуць выбіраць тавар.

Чытайце таксама: З гродзенскай крамы «Адметнасць» канфіскавалі бела-чырвона-белыя сцягі і спіс выбарчых участкаў

Супрацоўнік адзела ідэалогіі не прадстаўляўся, таксама назваўся пакупніком і моўчкі стаяў убаку. Ужо па сканчэнні маніторынгаў ён расказаў супрацоўніцы крамы Вользе Верамеенцы, з якой ён установы.

Уласнік крамы, Сяргей Верамеенка — гродзенскі грамадска-палітычны актывіст. 24 лістапада яго асудзілі на 5 сутак арышту паводле артыкула 23.34 КаАП за ўдзел у несанкцыянаваным мерапрыемстве 19 жніўня. Суд прайшоў больш чым праз тры месяцы пасля даты правапарушэння, бо працэс перапынялі праз хваробу Сяргея.

Пасля комплекснай праверкі ў краме «Адметнасць» інспектар па пажарнай бяспецы, два супрацоўнікі міліцыі і супрацоўнік ідэалогіі пайшлі правяраць рэдакцыю Hrodna.life.

Чытайце таксама:

• «Непад’ёмная сума». Гродзенскі Nesterka Bar, які адкрылі 10 сяброў, можа зачыніцца праз штраф
• У Гродне закрыецца тайм-кафэ «Партал». Установа не працавала ў дзень «усеагульнай забастоўкі«
• "Праверкі і велізарныя штрафы». У Гродне закрыўся бар, які прапрацаваў усяго паўгода