У Беларусі - 401 выпадак COVID-19 за суткі. Мінздраў: краіна гатова да другой хвалі каранавіруса

У Беларусі на 5 кастрычніка зарэгістраваны 401 новы выпадак каранавіруса. За суткі ачунялі 64 чалавекі, памерлі - 5 чалавек, паведаміла Міністэрства аховы здароўя. Сістэма аховы здароўя Беларусі гатовая да другой хвалі COVID-19, паведаміў БЕЛТА начальнік Галоўнага ўпраўлення арганізацыі медыцынскай дапамогі Міністэрства аховы здароўя Аляксандр Пацееў.

Усяго зарэгістраваныя 80 696 чалавек са станоўчым тэстам на COVID-19, ачунялі - 75 303. Усяго праведзена 1 949 656 тэстаў.

За ўвесь перыяд памерлі 862 пацыенты з шэрагам хранічных захворванняў з выяўленай каранавіруснай інфекцыяй.

«Апошні час мы бачым, што рост захворвання працягваецца. І ўжо зараз можна казаць, што гэта другая хваля. Аналагічную карціну мы назіраем у іншых краінах Еўропы і свету. Гэта звязана з нармальным цягам захворвання, з характарыстыкамі віруса», — сказаў Аляксандр Пацеев.

«У нас адпрацаваная ўся сістэма, усе алгарытмы аказання меддапамогі, усе клінічныя пратаколы. Мы стварылі сістэму, якая паказала сваю эфектыўнасць. У нас ёсць выразныя падзелы патокаў пацыентаў па цяжкасці захворвання. Койкавага фонду дастаткова. Дастатковыя магутнасці анестэзіёлага-рэанімацыйнай службы, ШВЛ. За апошнія некалькі месяцаў значна палепшылася сітуацыя па забеспячэнні кіслароднымі кропкамі. Сістэма аховы здароўя ў цэлым гатовая да працы. Прафесіяналы ведаюць пратаколы, у іх ёсць вопыт працы», — сказаў Аляксандр Пацеев.

Акрамя таго, сістэма аховы здароўя забяспечана лекамі для аказання меддапамогі. Для супрацоўнікаў маецца дастаткова сродкаў індывідуальнай абароны. «З пункту гледжання прафілактыкі неабходна тое, пра што мы гаварылі і раней, гэта сацыяльнае дыстанцыяванне і нашэнне сродкаў індывідуальнай абароны», — дадаў начальнік галоўнага ўпраўлення.