УУС: у Гродне затрымалі 54 чалавекі, у вобласці 10 чалавек засталіся ў ізалятарах

У Гродзенскай вобласці 20 верасня акцыі пратэсту прайшлі ў шасці гарадах: Гродна, Ліда, Бярозаўка, Смаргонь, Навагрудак і Ваўкавыск. У Гродне, па падліках УУС Гродзенскага аблвыканкама, выйшла 500 чалавек, у Лідзе — 200. У вобласці затрымалі 76 чалавек, з іх 54 — у Гродне. У дачыненні да 64 чалавек склалі 66 пратаколаў аб адміністрацыйных правапарушэннях, з іх 10 асоб змясцілі ў ізалятары часовага ўтрымання. З 12-ю затрыманымі праведзены прафілактычныя гутаркі, паведамілі ў прэс-службе УУС Гродзенскага аблвыканкама.

«Шэсце групы людзей па праезнай частцы перашкаджала руху транспартных сродкаў, а выкрыкванне лозунгаў ужо грунтоўна стала раздражняць гараджан», — паведамілі ў прэс-службе УУС Гродзенскага аблвыканкама.

УУС: цяжарную не затрымлівалі, яна канфліктавала з супрацоўнікамі ОУС

Адной з першых у Гродне 20 верасня затрымалі жанчыну, якая крычала, што цяжарная. На фота ў яе сапраўды ёсць прыкметны жывот. Крыху пазней стала вядома, што яе амаль адразу адпусцілі з аўтазака.

«Зафіксаваны і прыклад неабдуманага паводзінаў з боку меркавана цяжарнай жанчыны. Так, на вуліцы Вялікая Траецкая ў Гродне яна актыўна канфліктавала з супрацоўнікамі органаў унутраных спраў. Варта адзначыць, што грамадзянка не была затрыманая, а ёй самой рэкамендуем наступны раз падумаць, ці варта ісці на несанкцыянаваныя мітынгі, знаходзячыся «ў самым важным для жанчыны становішчы», — пракаментавалі ў прэс-службе УУС Гарадзенскага аблвыканкама.

Пра затрыманне кіроўцы: «Адмовіўся прад’яўляць дакументы, канфліктаваў з міліцыянтам»

Жорсткае затрыманне адбылося каля 16.00 20 верасня на вул. Горкага каля крамы «Мока». Кіроўцу Уладзіміра Сколышава дасталі з аўтамабіля, разбіўшы шкло. Супрацоўнік АМАП наступіў яму нагой на шыю, відаць на відэа. Уладзімір крычаў, што яго душаць, хоць ён не супраціўляецца. Затрыманыя пазней распавялі, што бачылі кроў на твары Уладзіміра.

«На вуліцы Замкавая гродзенец 1987 года нараджэння ўцёк ад супрацоўнікаў ДАІ. Кіроўца аўтамабіля «Фіят» быў спынены інспектарам Дзяржаўтаінспекцыі, грамадзянін адмовіўся прад’яўляць дакументы, канфліктаваў з міліцыянтам, а пасля хутка з’ехаў у бок вуліцы Горкага.

Мужчына быў затрыманы ў раёне гандлёвага цэнтра «Мока» і дастаўлены ў Ленінскі РАУС. Яго дзеянням будзе дадзена прававая ацэнка. Раней ён неаднаразова прыцягваўся да адміністрацыйнай адказнасці, быў асуджаны за захоўванне і распаўсюд парнаграфічных матэрыялаў", — пракаментавалі ў прэс-службе УУС Гродзенскага аблвыканкама.