Уладзімір Каранік пра забастоўкі: «Cёння ні адно прадпрыемства не мае праблем з працай»

Прадпрыемствы Гродзенскай вобласці строга выконваюць свае кантрактныя абавязацельствы. Пра гэта заявіў у інтэрв'ю праграме «Контуры» на тэлеканале ОНТ старшыня Гродзенскага аблвыканкама Уладзімір Каранік, паведамляе БЕЛТА.

На пытанне, ці застаюцца страйкі на парадку дня, ён адказаў адмоўна. «Сёння ні адно прадпрыемства не мае праблем з працай. Будаўнічая галіна працуе і па нядзелях, і нават не 8, а 10 гадзін у суткі, каб скарыстацца ўмовамі надвор’я і выканаць большы аб’ём працы. Усе астатнія прадпрыемствы таксама строга выконваюць свае кантрактныя абавязацельствы», — падкрэсліў Уладзімір Каранік.

Ён зараз актыўна наведвае прадпрыемствы рэгіёна. «У сям'і, дзе адно дзіця хварэе, здаровае часта аказваецца без нагляду. Напэўна, гэта няправільна, і ў першую чаргу трэба наведаць тыя прадпрыемствы, якія устойліва стаяць на нагах, каб паглядзець, які вопыт у іх можна пераняць і як яшчэ паскорыць іх развіццё. Гэта неабходна для таго, каб яны сталі драйверам і лакаматывам вобласці, каб іх вопыт і рэсурсы выкарыстоўваць для падцягвання адстаючых. Важна і пагутарыць з калектывам, адказаць на хвалюючыя людзей пытанні, зняць напружанне. Мне вельмі прыемна, што атрымліваецца нармальны дыялог», — адзначыў старшыня Гродзенскага аблвыканкама.

Уладзімір Каранік таксама пракаментаваў сітуацыю ў краіне. «Ашалелая інфармацыйная кампанія прыводзіць да таго, што ў людзей у розумах вялікая сумятніца, многія з іх проста страцілі стандарты і арыенціры і не ведаюць, што рабіць. Думаю, тут неабходная ўзважаная інфармацыйная стратэгія. Трэба растлумачыць людзям, што нам неабходна захаваць стабільнасць. І калі моладзі патрэбна „дзвіжуха“, то краіне патрэбны рух наперад: павелічэнне сацыяльных гарантый, павышэнне заробкаў, паляпшэнне жыцця ў цэлым», — заявіў ён.

Падчас развіцця пандэміі COVID-19 Уладзімір Каранік быў міністрам аховы здароўя Беларусі. «Мы выкарыстоўвалі рызыка-арыентаваны падыход і імкнуліся праводзіць не эфектныя, а эфектыўныя мерапрыемствы. СААЗ прызнае, што шведскі вопыт аказаўся найбольш рацыянальным, а Беларусь пайшла тым жа шляхам. Мы з самага пачатку казалі пра тое, што каранцін сваю эфектыўнасць не даказаў. Другую хвалю пандэміі мы чакаем менш маштабнай, таму што ў грамадстве сфармавалася Імунная праслойка. Дастаткова шмат людзей, якія асабліва ўспрымальныя да гэтага віруса, з ім ужо сустрэліся, перахварэлі і маюць імунітэт», — мяркуе ён.