Кіраўніка каталікоў Беларусі мітрапаліта Кандрусевіча не ўпускаюць у краіну

Галаву каталіцкага касцёла Беларусі, арцыбіскупа Тадэвуша Кандрусевіча, беларускія памежнікі не ўпускаюць у Беларусь, паведамляе «Радыё С**бода». Кандрусевіч — грамадзянін Беларусі, вяртаўся дадому з Польшчы.

«Я знаходжуся на пераходзе ў Кузьніцы Беластоцкай, мяне не пусцілі, — сказаў „С**бодзе“ мітрапаліт Тадэвуш Кандрусевіч па тэлефоне з польскім нумарам. — Потым будзе заява. Пакуль нічога больш сказаць не магу».

Мітрапаліт Кандрусевіч з’яўляецца грамадзянінам Беларусі.

Прэсавы сакратар Беларускага каталіцкага касьцёлу айцец Юры Санько паведаміў С**бодзе, што мітрапаліт Кандрусевіч вяртаўся з Польшчы, ён знаходзіўся там тыдзень на адпачынку:

«Тое, што здарылася на мяжы, яму зусім незразумела, яму там ніяк не патлумачылі прычыны такіх дзеяньняў. Я зь ім у к антакце, ён чакае цяпер на мяжы, на стан здароўя ня скардзімцца, хоць нядаўна ён перанёс апэрацыю і рэабілітацыю. Кандрусевіч зьяўляецца грамадзянінам Беларусі. Мы тут у Беларусі спрабуем цяпер разабрацца ў гэтай сытуацыі».

Службовыя асобы з беларускага боку каментароў не даюць.

Кандрусевіч: «Ёсць падставы меркаваць, што выбары праходзілі несумленна»

27 жніўня Тадэвуш Кандрусевіч зрабіў заяву наконт блакавання людзей сілавікамі ў Чырвоным касцёле ў Мінску ў час разгону акцыі пратэсту 26 жніўня. Ён адзначыў, што блакаванне выхадаў святыні і стварэнне перашкоды для свабоднага руху людзей з’яўляецца грубым парушэннем правоў вернікаў і свабоды веравызнання.

«Неадэкватныя і супрацьпраўныя дзеянні, якія мелі месца на тэрыторыі касцёла святога Сымона і святой Алены, павінны быць расследаваны, а вінаватыя панесці пакаранне ў адпаведнасці з заканадаўствам Рэспублікі Беларусь», — адзначыў ён.

30 жніўня Тадэвуш Кандрусевіч даў інтэрвью польскаму хрысціянскаму тэлеканалу TV Trwam. У ім ён выказаўся, што беларускі народ «дарос да таго, каб адстойваць свае правы, і гэта ўжо іншае пакаленне, чым 26 гадоў таму».

«Ёсць падставы меркаваць, што выбары праходзілі несумленна <…> Касцёл у Беларусі хоча мірнага вырашэння», — цытуе яго каталіцкі партал catholic.by паводле radiomaryja.pl. Таксама ён выказаў занепакоенасць тым, што ніхто з кандыдатаў на выбарах 9 жніўня не казаў пра духоўныя каштоўнасці. Тадэвуш Кандрусевіч дадаў, што разам з адносінамі з Расіяй Беларусь павінна імкнуцца да захавання свайго суверэнітэту

Тадэвуш Кандрусевіч родам з-пад Гродна

Тадэвуш Кандрусевіч нарадзіўся ў вёсцы Адэльск пад Гродна ў 1946 годзе. У 1964 году паступіў на энергамашынабудаўнічы факультэт Ленінградскага політэхнічнага інстытута, які ў 1970 г. скончыў на «выдатна» з дыпломам інжынера-мэханіка. У 1981 г.скончыў Духоўную семінарыю ў Коўне (Каўнас, Літва), прыняў святарскае пасвячэнне.

У 1989 г. Святы Айцец Ян Павел ІІ прызначыў кс. Тадэвуша Кандрусевіча тытулярным біскупам Гіпона-Дзарыцкім і Апостальскім Адміністратарам Мінскай дыяцэзіі для католікаў у Беларусі.

Тадэвуш Кандрусевіч заснаваў Гродзенскую вышэйшую духоўную сэмінарыю, спрыяў вяртанню і адкрыццю каля 100 раней зачыненых касцёлаў, спрычыніўся да выдання «Парадку Імшы» і «Катэхізісу» на беларускай мове.

З 1991 г. Тадэвуш Кандрусевіч стаў арцыбіскупам і быў прызначаны Апостальскім Адміністратарам для католікаў лацінскага абраду эўрапейскай часткі Расеі. У 2007 году папа Бэнэдыкт XVI менаваў Тадэвуша Кандрусевіча арцыбіскупам Мітрапалітам Менска-Магілёўскім, перавёўшы яго з архідыяцэзіі Маці Божай у Маскве.