У Гродзенскім абласным судзе 14 ліпеня не задаволілі скаргу Яўгена Разнічэнкі на пастанову суда Ленінскага раёна. Гаворка ідзе пра падзеі 29 траўня, калі Сяргея Ціханоўскага затрымалі на пікеце ў Гродне. Тады некалькі гродзенцаў асудзілі за дробнае хуліганства (арт.17.1 КоАП).
Яўгена Разнічэнку ў судзе Ленінскага раёна асудзілі на сем сутак арышту за дробнае хуліганства. Яўген 29 траўня на вул. Савецкай, 2 нецэнзурна лаяўся, хапаў людзей за вопратку, перашкаджаў праезду транспарту, не рэагаваў на заўвагу супрацоўнікаў міліцыі, паведаміў суддзя Собалеў.
Сам Яўген у абскарджанні рашэння не ўдзельнічаў. Цяпер ён праходзіць па крымінальнай справе па ч.1 арт. 342 (Арганізацыя і падрыхтоўка дзеянняў, якія груба парушаюць грамадскі парадак) і знаходзіцца ў СІЗА-1 г. Мінска. Суда па гэтай справе яшчэ не было. Яго апавясцілі аб разглядзе скаргі.
Адвакат Яўгена на працэс не прыехала. Яна сцвярджала, што справу трэба спыніць, таму што няма дакладных доказаў віны Яўгена, звесткі сведкаў супярэчлівыя, а справа разгледжана няпоўна і аднабакова.
Суддзя Собалеў разгледзеў матэрыялы справы за дзве з паловай хвіліны і праз сем хвілін нарады пакінуў рашэнне суда Ленінскага раёна без зменаў, скаргу адваката Вішанковай — без задавальнення.
«Не хапае людской падтрымкі». Политзаключенный Евгений Резниченко написал письмо из СИЗО
Яўген Разнічэнка не думаў, што вясной 2020 года апынецца ў Гродне і стане палітычным актывістам. Мужчына працаваў у Маскве і ў канцы сакавіка вымушаны быў прыехаць у Беларусь з-за смерці бацькі. Вярнуцца ў Расію ён не змог — была зачынена мяжа. Тады мужчына на час эпідэміі стаў шукаць працу ў родным Гродне і адначасова цікавіцца палітыкай.
Чытайце падрабязней: «Лёс вярнуў у родны горад». Як гродзенец Яўген стаў актывістам і сеў на пяць сутак
Палітвязень 8 траўня атрымаў першыя 5 дзён арышту за ўдзел у несанкцыянаванай акцыі ў падтрымку аўтара блога «Страна Для Жизни» Сяргея Ціханоўскага.
29 траўня гродзенца затрымалі паўторна ўжо на дазволеным пікеце збору подпісаў за вылучэнне Святланы Ціханоўскай у прэзідэнты Беларусі. Падчас інцыдэнту на плошчы Савецкай Яўген падхапіў міліцыянта, які падаў. Перад затрыманнем мужчына паспеў напісаць у тэлеграм-чат «Страна Для Жизни» паведамленне, што, хутчэй за ўсё, яму «прышыюць «крыміналку», і калі ён перастане выходзіць на сувязь, то «гэта правакацыя спецслужбаў».
У Гродне затрымалі палітычных актывістаў. Увечары 29 траўня на пікеце падчас збору подпісаў за Святлану Ціханоўскую адбыўся інцыдэнт, у выніку якога блогера Сяргея Ціханоўскага і некаторых яго прыхільнікаў затрымала міліцыя. Сярод затрыманых — сябра ініцыятыўнай групы Дзмітрый Фурманаў. Удзельніцу верагоднай правакацыі супраць Ціханоўскага апазналі ў сацсетках.
Затрыманні працягнуліся на наступны дзень. 30 траўня затрымалі актывіста Мікалая Саляніка, які днём раней вёў перамовы з кіраўніцтвам міліцыі і спрабаваў даведацца, за што быў затрыманы і дзе знаходзіцца Ціханоўскі. Праваабарончы цэнтр «Вясна» склаў спіс затрыманых у Гродне. Частку з іх перавезлі ў Мінск.
Гэта не спыніла ініцыятыўную групу Ціханоўскай. Афіцыйна было заяўлена, што падчас інцыдэнту пацярпеў міліцыянт. Узбуджаная крымінальная справа па факце гвалту ў адносінах да супрацоўнікаў органаў унутраных справаў. Нягледзячы на гэта, на наступныя дні да пікету Святланы Ціханоўскай выстраіліся чэргі — людзі стаялі, каб аддаць подпіс, нават пад дажджом.
Праваабаронцы прызналі Сяргея Ціханоўскага і іншых затрыманых у Гродне палітычнымі вязьнямі.
У выніку пад удар патрапілі і выпадковыя людзі. Увечары 29 траўня ў сацсетках пачалося цкаванне выпадковага чалавека, якога прынялі за супрацоўніка органаў у цывільным, які ўдзельнічаў у затрыманні ў Гродне. У дзяржаўных СМІ з другога боку пачалося цкаванне 81-гадовай пенсіянеркі Галіны Філіпаўны, якая падчас стрыму з Савецкай плошчы выказалася супраць Лукашэнкі і ў падтрымку Ціханоўскіх. Пенсіянерку Станіславу Дамшэль, якая 29 траўня таксама была на Савецкай, абвінавацілі ў дробным хуліганстве, але яна не пусціла міліцыю да сябе дадому. Выпадковыя людзі былі і сярод затрыманых на плошчы.
Два хлопцы са Слоніма, узростам 14 і 15 гадоў, атрымалі крымінальны артыкул за хуліганства, здзейсненае…
Дом у раёне вуліц Каліноўскага і Вясенняй, які пачалі будаваць у пачатку верасня, плануюць здаць…
Канфлікт разгарнуўся вакол паркоўкі ў новым доме на вуліцы Савецкіх пагранічнікаў. Гродзенцы абураны тым, што…
Фермерская гаспадарка знаходзіцца ў вёсцы Пальніца, што ў 23 кіламетрах ад Гродна. Гаспадарка дзейнічае —…
На ўчастку ад вуліцы Мітрапаліта Філарэта да прыпынку «Цэнтр занятасці» на вуліцы Дзяржынскага амаль скончылі…
ТАА "Флагман М'юзік" не пагадзілася з адмовай у іску аб абароне дзелавой рэпутацыі да актывісткі…