На вуліцы Маставой у Гродне завяршаецца ўсталёўка скульптур-літар, якія разам утвараюць слова «МОВА». Гэта пяты з серыі такіх арт-аб'ектаў, што дзякуючы кампаніі А1 і праекту «Веліч роднай мовы» з’явяцца ў шасці найбуйнейшых гарадах Беларусі.
Галоўная адметнасць кожнай з арт-інсталяцый — у колерах, якія адмыслова падбіраліся так, каб паказаць праз іх гістарычныя і прыродныя асаблівасці ўсіх рэгіёнаў краіны. Для Гродна гэта жоўты, чырвона-фіялетавы, сіні, чырвоны і чорны. Дынаміка і яскравасць такой гамы тлумачацца сучасным іміджам рэгіёна — памежнага, актыўнага і жывога. Спалучэнне гэтых колераў таксама адсылае да даследаванняў і рэканструкцый народных строяў Гродзеншчыны, зробленых знаным беларускім этнографам і мастацтвазнаўцам Міхасём Раманюком.
«Кампанія А1 працягвае падтрымліваць праекты, звязаныя з беларускай мовай і нацыянальнай культурай. Сёлета для гэтага мы спалучаем тэхналогіі з сучасным мастацтвам і вельмі рады, што праз арт-аб'екты „МОВА“ можам нагадаць жыхарам Беларусі пра тое адметнае і асаблівае, што ёсць у кожным рэгіёне краіны і звязвае ўсіх нас», — адзначыў кіраўнік аддзела карпаратыўных камунікацый кампаніі А1 Мікалай Брэдзелеў.
У хуткім часе побач з інсталяцыяй таксама плануецца стварыць сетку бясплатнага Wi-Fi ад А1.
«З пачуццём вялікай адказнасці, а таму і хвалявання, мы пачыналі гэты праект. А падчас яго рэалізацыі выявілі магутную яднальную сілу — шчырае, трапяткое стаўленне і павагу да роднай мовы. Гэта вельмі натхняе. Для нас кожны з арт-аб'ектаў увасабляе не толькі колеравыя асаблівасці рэгіёнаў, але і адценні гэтых светлых адчуванняў. На кожным этапе мы сустракалі непадробную цікаўнасць і спрыянне ўсіх, хто быў уключаны ў працэсы распрацоўкі, узгадненняў і ажыццяўлення арт-аб'ектаў „МОВА“. Мы ўдзячныя ўладам горада Гродна за садзейнічанне і ўпэўненасць у патрэбе развіцця падобных сацыяльных праектаў», — пракаментаваў ініцыятар праекта «Веліч роднай мовы» Захар Дудзінскі.
Арт-аб'екты «МОВА» ўжо ўсталяваныя на вуліцы Кірава ў Гомелі, набярэжнай Францыска Скарыны ў Брэсце, Траецкай набярэжнай у Магілёве і перад мостам 1000-годдзя Віцебска. Яшчэ адна інсталяцыя з’явіцца ў Мінску. Па задуме аўтара, вядомага беларускага скульптара Паўла Вайніцкага, ідэя праекта грунтуецца на працах Міхася Раманюка, а таксама на канцэпцыі дызайнера, мастака і паэта Міхала Анемпадыстава, апісанай ім у кнізе «Колер Беларусі».
Чытайце таксама:
Зараз праз памежныя пераходы ў Медынінкай (з беларускага боку Каменны Лог) і Шальчынінкай (Беняконі) можна…
У Гродне на продаж выставілі начны клуб "Калізей 2000". Ён прадаецца як гатовы бізнес. Паглядзелі,…
Прадаюць камерцыйнае памяшканне ў падвале будынка на вул. Савецкіх Пагранічнікаў, 17. Там дызайнерскі рамонт у…
У Гродне з аўкцыёну прадаюць памяшканне афтальмалагічнага цэнтра "Новое зрение" на вул. Леніна, 13-3. У…
Чарачная “са смакам дзяцінства” DEHDИ адкрылася ў Гродне на вул. 1-й Працоўнай, 8. Уладальнікі абяцаюць,…
У Гродне на Лідскай, 15А адкрыўся "пакой лютасці". Ва ўстанове пад назвай «Дебошь» можна скінуць…