Гродзенцы арганізавалі дапамогу затрыманым актывістам. Як іх падтрымаць?

Гродзенцы стварылі збор сродкаў праз краудфандынг для актывістаў, якіх асудзілі за сустрэчу з блогерам Сяргеем Ціханоўскім. Таксама ўсе жадаючыя могуць прыносіць ахвяраванні на вул. Кірава, 3 у краму «Адметнасць». Ахвяраваць можна як грошы, так і прадукты.

— Усе затрыманыя апынуліся ў няпростай сітуацыі і іх сем’ям зараз патрэбна дапамога ў арганізацыі прадуктовых і рэчавых перадач, аплаце за знаходжанне ў ізалятарах і г. д, — пішуць гродзенцы.

Таксама можна перадаваць газеты, паперу і асадкі. Ад 11-га мая актывісты будуць штодзённа у 12:00 прыходзіць на вул. Гая 4, каб аднесці перадачы. Грошы можна таксама накіроўваць родным асуджаных. Актывісты падкрэсліваюць, што ўсе дзеянні ажыццяўляюць з ужываннем сродкаў індывідуальнай абароны (СІА) — масак.

Па спасылцы вы знойдзеце інфармацыю пра тое, што можна перадаваць затрыманым.

За што іх затрымалі?

Прычына — удзел у сустрэчы 26 красавіка, якую арганізаваў у парку Жылібера аўтар блога «Страна для жизни» Сяргей Ціханоўскі. Затрымалі гродзенцаў на падставе арт. 23. 34 КоАП «Парушэнне парадку арганізацыі або правядзення масавых мерапрыемстваў».

Самога блогера затрымалі 6 траўня і асудзілі на 15 дзён арышту за ўдзел у несанкцыянаваных акцыях пратэсту. Ён знаходзіцца ў ізалятары часовага ўтрымання (ІЧУ) у Гомелі. Пасля затрымання ён абвясціў аб жаданні ўдзельнічаць у выбарах прэзідэнта Беларусі.

Хто такі блогер Сяргей Ціханоўскі, які хоча быць прэзідэнтам Беларусі

Падтрымаць блогера Ціханоўскага ў цэнтры Гродна выйшлі 20 чалавек

Колькі людзей затрымалі?

Адну з удзельніц гэтай сустрэчы, Алену Сахарчук, з раніцы 8 траўня міліцыя забрала прама з працоўнага месца. Яна напісала заяву на адпачынак за свой кошт, як ёй параілі і міліцыя і адміністрацыя прадпрыемства, пасля чаго яе забрала міліцыя і павезла ў Ленінскі РАУС Гродна. Ёй прысудзілі 6 сутак. На волю павіна выйсці 14 траўня.

Гродзенскаму актывісту Аляксандру Лаўрэнцьеву 8 траўня прысудзілі 7 сутак адміністрацыйнага арышту. Але на волю ён павінен выйсці толькі 17 траўня, бо засталіся яшчэ двое неадбытых сутак.

Таксама па артыкуле 23.34 КоАП у Гродне адправілі на суткі яшчэ тры чалавекі:

Васіль Калач засуджаны да 5 сутак арышту. Павінен выйсці 13 траўня;

Яўген Рэзнічэнка — 6 сутак. На волю павінен выйсці 14 траўня;

Юрый Шока — 7 сутак. На волю павінен выйсці 15 траўня.

Да сямі сутак арышту. Што з затрыманымі актывістамі зараз і як ім дапамагчы?

У Гродне асудзілі рэжысёра Васіля Калача за сустрэчу з блогерам Ціханоўскім

Будуць яшчэ затрыманні?

Каля пад’езда і на лесвічнай пляцоўцы аднаго з адміністратараў каналу «Страна для жизни» Зьміцера Фурманава з 8 траўня дзяжурыць міліцыя. Супрацоўнікі прыходзілі і да яго дзяўчыны — Вольгі Каракінай.

Некалькі чалавек асудзілі па той жа прычыне ў Лідзе. Сярод іх два медыка. Ім таксама арганізавалі збор. На 15 сутак асудзілі бацьку 4-х дзяцей Паўла Анціпкіна. Блогеру Сяргею Пятрухіну з Брэста далі 15 сутак, нягледзячы на тое, што ў яго высокая тэмпература і сімптомы, як пры каронавірусе.

На вечар 10 траўня ў праваабарончым цэнтры «Вясна» дакладна ведалі пра 55 актывістаў і прыхільнікаў блогера Сяргея Ціханоўскага, якія зараз знаходзяцца за кратамі. З іх 17 чалавек асуджаны на арышты тэрмінам ад 2 да 15 сутак (у іх ліку і Сяргей Ціханоўскі, які адбывае арышт, прысуджаны яму яшчэ ў студзені). Суды праходзілі ў пяці гарадах: Гомелі, Віцебску, Лідзе, Гродне, Магілёве. Агульная колькасць атрыманых сутак — 132. У ізалятарах 38 чалавек чакаюць судоў.

Фельчар хуткай дапамогі з Ліды: сітуацыя нашмат горшая за афіцыйныя звесткі

Як схадзіць на мірны сход, каб вярнуцца дамоў. Парады юрыста