У рамках сваіх глябальных дзеяньняў у адказ на ўспышку каранавірусу Эўрапейская камісія гатовая падтрымліваць краіны Усходняга партнэрства і пераразьмеркавала 140 мільёнаў эўра на самыя непасрэдныя патрэбы, у тым ліку і на патрэбы Беларусі, паведамляе Прадстаўніцтва ЭЗ у Беларусі, піша С**бода.
Акрамя таго, Эўрапейская камісія перанакіруе сродкі існуючых інструмэнтаў на суму да 700 мільёнаў эўра, каб дапамагчы ў зьмякчэньні сацыяльна-эканамічнага ўплыву каранавіруснага крызісу па ўсім рэгіёне.
Камісар па Эўрапейскай палітыцы суседзтва і перамовах аб пашырэньні Олівэр Вархеі адзначыў:
«Гэта вельмі цяжкія часы ня толькі для ЭЗ, але і для нашых краін-партнэраў, такіх як Беларусь. Мы павінны зрабіць усё магчымае, каб зьмякчыць уплыў успышкі каранавірусу на жыцьцё і дабрабыт людзей. Сфармаваны сёньня пакет — гэта адказ як на непасрэдныя патрэбы сыстэм аховы здароўя, так і на больш доўгатэрміновыя патрэбы самых уразьлівых слаёў грамадзтва і малых і сярэдніх прадпрыемстваў, якія зьяўляюцца асновай эканомік шасьці краінаў-партнэраў».
На што пойдзе дапамога:
- Падтрымка сыстэмы аховы здароўя Беларусі. На просьбу краін-партнэраў, у тым ліку і Беларусі, Камісія дапаможа ў задавальненьні іх непасрэдных патрэбаў шляхам падтрымкі з пастаўкамі мэдыцынскіх прыладаў і абсталяваньня, у тым ліку апаратаў штучнай вэнтыляцыі лёгкіх, лябараторных камплектаў, масак, ахоўных акуляраў, халатаў і ахоўных касьцюмаў. Эўрапейская камісія супрацоўнічае з Сусьветнай арганізацыяй здароўя і выдзяляе 30 млн эўра, каб гэтыя неабходныя матэрыялы былі сумесна закуплены і эфэктыўна разьмеркаваныя ў межах сыстэм аховы здароўя шасьці краінаў-партнэраў у бліжэйшыя тыдні.
- Акрамя таго, сродкі будуць накіраваны на падтрымку нацыянальных органаў аховы здароўя ў падрыхтоўцы мэдыцынскіх і лябараторных супрацоўнікаў і правядзеньні мер па павышэньні ўзроўню інфармаванасьці шырокіх слаёў насельніцтва. Гэтыя меры будуць дадаткова дапаўняцца пастаянным супрацоўніцтвам паміж ЭЗ, ААН і Беларускім Чырвоным Крыжам.
- Падтрымка людзей, якія найбольш пацярпелі ад крызісу, разам з грамадзянскімі партнэрамі. ЭЗ прадаставіў больш за 11,3 млн эўра ў выглядзе невялікіх грантаў арганізацыям грамадзянскай супольнасьці па ўсім рэгіёне. Гэтыя сродкі ўжо выкарыстоўваюцца для задавальненьня непасрэдных патрэбаў у рамках дзеючага рэгіянальнага Мэханізму хуткага рэагаваньня, такія як патрэба мясцовых школаў у дапамозе з арганізацыяй дыстанцыйнага навучаньня. Да лета ў межах гэтага пакету мер Камісія распачне рэалізацыю Праграмы салідарнасьці Ўсходняга партнэрства, якая будзе накіравана на падтрымку найбольш пацярпелых катэгорый насельніцтва шляхам дапамогі грамадзянскай супольнасьці і асабліва шляхам выдзяленьня субгрантаў меншым мясцовым арганізацыям.
- Падтрымка эканомікі Беларусі, асабліва малых і сярэдніх прадпрыемстваў (МСП):
- Эўрапейскі Зьвяз шчыльна супрацоўнічае зь Міжнароднымі фінансавымі інстытутамі і адпаведнымі фінансавымі арганізацыямі з краін-членаў ЭЗ, такімі як TEAM EUROPE, забясьпечваючы каардынаванасьць эўрапейскіх дзеяньняў у інтарэсах рэальнага сэктара эканомікі, у тым ліку МСП, праз:
- Запуск новай рэгіянальнай праграмы падтрымкі ў памеры 100 млн эўра для МСП, у тым ліку самазанятых асоб і іншых, якая дапамагала б ім лёгка атрымоўваць крэдыты і пашыраць свой бізнэс пасьля крызісу.
- Крокі па садзейнічаньні, спрашчэньні, паскарэньні і ўмацаваньні ў дачыненьні да існуючых крэдытных ліній і грантаў для МСП у мясцовай валюце на суму 200 мільёнаў эўра, у тым ліку ў рамках ініцыятывы EU4Business;
- Акрамя таго, ва ўмовах цяперашняга крызісу ЭЗ мабілізаваў свой асноўны інструмэнт зьмяншэньня рызыкі ў аб’ёме 500 млн эўра — Эўрапейскі фонд устойлівага разьвіцьця. Гэта мера хутка забясьпечыць неабходныя ліквідныя сродкі і можа быць тэрмінова прыменена партнэрскімі міжнароднымі фінансавымі інстытутамі для спрашчэньня ўмоў для выдзяленьня ліквідных сродкаў у рэгіёне суседзтва ЭЗ, у тым ліку праз прадастаўленьне абаротнага капіталу, фінансаваньне гандлю альбо мараторый на абслугоўваньне запазычанасьці.
- ЭЗ таксама гатовы аказаць дапамогу Беларусі па лініі TAIEX — інструмэнту супрацоўніцтва па прынцыпе peer-to-peer (роўны для роўнага), выкарыстоўваючы экспэртны патэнцыял дзяржаў-членаў ЭЗ, вопыт і прыклады належнай практыкі па ацэнцы схемы гатоўнасьці для рэагаваньня на надзвычайныя сытуацыі і сыстэм аховы здароўя.