Справа аб двайным забойстве ў Стаўбцах. Вярхоўны суд разгледзеў скаргу абвінавачанага

Вярхоўны суд ранейшае рашэнне пакінуў без зменаў. Перагляду дамагліся бацькі абвінавачанага ў забойствах падлетка Вадзіма М., паведамляе s**boda.org.

Разгляд скаргі на прысуд Вадзіму М. адбыўся ў пятніцу 20 снежня. Як і асноўны працэс, ён адбываўся ў закрытым рэжыме. Журналістам дазволілі прысутнічаць толькі на абвяшчэнні выніку. Акрамя бацькоў Вадзіма М., на разгляд прыехалі таксама родныя загінулай настаўніцы — сястра Алена і сын. Самога Вадзіма ў залі не было.

Вярхоўны суд вырашыў пакінуць вынесены Мінскім абласным судом прысуд без зменаў.

Прысуд Вадзіму М. (13 гадоў калоніі і 110 тысяч рублёў кампенсацыі для сям'і забітай настаўніцы) Мінскі абласны суд вынес 11 верасня 2019 году (забойства адбылося 11 лютага 2019-га).

Сын загінулай настаўніцы пасля прысуду Вадзіму М.: «Што яму перашкодзіць паўтарыць гэта зноў?»

Разгляд справы пачаўся 19 жніўня, працэс праходзіў у закрытым рэжыме. Падчас судовых спрэчак дзяржаўны абвінаваўца папрасіў пакараць Вадзіма М. зняволеннем на 13 гадоў. Вядома таксама, што абвінавачаны прызнаў сваю віну часткова. У выніку суд даў Вадзіму М. пакаранне ў выглядзе 13 гадоў калоніі.

Суд таксама пастанавіў спагнаць 110 тысяч рублёў кампенсацыі для сямʼі забітай настаўніцы.

Вадзіма М. абвінавачвалі ў злачынствах, прадугледжаных:

• ч. 3 арт. 339 (хуліганства з выкарыстаннем зброі);
• пп.1, 6, 13 ч. 2 арт. 139 (забойства дзвюх і больш асобаў з асаблівай жорсткасцю з хуліганскіх матываў);
  ч.1 арт.14 (спроба злачынства);
• пп.1, 6, 10, 13 ч. 2 арт. 139 (забойства дзвюх і больш асобаў з асаблівай жорсткасцю з хуліганскіх матываў і забойства асобы ў сувязі з выкананнем ёю службовых абавязкаў).