У Гродне сустрэлі 100-тысячнага бязвізавага турыста

У Гродне сустрэлі 100-тысячнага бязвізавага турыста з пачатку бягучага года, перадае БЕЛТА.

Рэкордным па колькасці гасцей без візы стаў для Гродна і Гродзенскага раёна 2019 год. За ўвесь 2018 год рэгіён наведалі каля 92 тыс. такіх турыстаў. Сёння ў абласным цэнтры ўшаноўвалі Аляксандра Кучынскі з Беластока, які стаў 100-тысячным бязвізавым турыстам для Гродна ў гэтым годзе. Мужчына ў складзе групы з усходніх рэгіёнаў Польшчы прыехаў у Гродна ўпершыню.

«Для мяне, вядома, сам факт стаў вялікай нечаканасцю. Вядома, прыемна. Цікава было адкрыць для сябе і Гродна — гэта горад з душой, дзе ёсць што паглядзець», — адзначыў Аляксандр Кучынскі. Ён распавёў, што абавязкова вернецца ў Гродна з жонкай. Акрамя памятных сувеніраў, госцю ўручылі сертыфікат на двух чалавек на Фестываль нацыянальных культур, які Гродна прыме летам 2020 года. Запрошаным забяспечаць прыём, яны змогуць пабываць на ўсіх святочных пляцоўках.

Магчымасць без візы наведваць Гродна і наваколлі замежнікі атрымалі ў кастрычніку 2016 года. Плынь турыстаў з кожным годам павялічваецца. За ўвесь час такой магчымасцю скарысталіся каля 250 тыс. чалавек, сярод якіх сёлета былі грамадзяне 37 дзяржаў. У лідэрах па колькасці турыстаў Літва, Польшча, Латвія, Германія, Эстонія, Італія, Францыя.

«Сёння вельмі важна не проста запрасіць турыстаў, але і прапанаваць ім цікавы аб’ект або падзею, распавесці пра яго загадзя. Работа ў гэтым кірунку вядзецца ў рэгіёне актыўна. Функцыянуюць тэматычныя парталы, створаныя, напрыклад, інтэрактыўныя карты музеяў рэгіёну, веладарожак, распрацаваны і пастаянна папаўняюцца мабільныя дадаткі аб Аўгустоўскім канале, асноўных трасах рэгіёну і размешчаных побач адметнасцях», — распавёў на сустрэчы юбілейнага турыста намеснік старшыні Гродзенскага аблвыканкама Віктар Лісковіч. Ён падкрэсліў, што з пашырэннем даступнай для бязвізавых турыстаў зоны на ўсю тэрыторыю Гродзенскай вобласці гэта работа будзе актывізавана.

Калі раней бязвізавыя турысты ў Гродне прыязджалі ў сярэднім на суткі, то сёння сярэдні тэрмін знаходжання перавысіў 3 дні. Ёсць адчувальны эфект ад росту колькасці турыстаў і ў эканоміцы. У прыватнасці, за час існавання бязвіза ў Гродне адкрылася звыш 40 новых аб’ектаў грамадскага харчавання, з’явіліся 7 новых гасцініц і хостэлаў, створаны звыш 600 рабочых месцаў, істотна ўзрос у горадзе і раздробны таваразварот.

У Гродна замежнікі едуць не толькі для таго, каб пазнаёміцца са славутасцямі, гісторыяй горада, але іх прыцягвае і падзейны турызм, шопінг. Усё больш запатрабаванымі становяцца медыцынскі і аздараўленчы віды турызму.