Аўтар кнігі «Канстанцін Каліноўскі: асоба і легенда» Васіль Герасімчык 17 кастрычніка паведаміў, што выклаў у вольны доступ сваю працу.
«22 лістапада 2019 года ў Вільнюсе на могілках „Росы“ адбудзецца ўрачыстае перапахаванне паўстанцаў, знойдзеных на замкавай гары на пачатку 2017 года. Сярод іх нацыянальны герой беларускага народа Кастусь Каліноўскі. Я лічу, што трэба пасадзейнічаць, каб як мага больш беларусаў прыехала на гэту ўрачыстасць і каб ведалі, хто такі Каліноўскі. Бо ў большасці выпадкаў веды ў беларусаў вельмі скажоныя. Менавіта для ўсяго гэтага і выклаў сваю кнігу ў вольны доступ. Спадзяюся, хтосьці даведаецца больш пра нашага героя і прыедзе на перепахаванне», — распавёў Герасімчык.
Кнігу гісторык выдаў у 2018 годзе да 180-годдзя з дня нараджэння Каліноўскага. Яго кніга — гэта біяграфія знакамітага паўстанца, вынікі даследаванняў, што аўтар вёў з 2010 года. Грошы на выданне Герасімчык збіраў праз краўдфандынгавую пляцоўку «Талака». Папярэдняя біяграфія Каліноўскага выдавалася 30 гадоў таму.
