Як стала вядома Hrodna.life, з 19 жніўня пракатным кропкам на Савецкай плошчы забаранілі здаваць у арэнду электракарты і электраскутары. Забарона паступіла ад гарадскіх службаў.
Гараджане ў сацыяльных сетках прасілі гарадскія ўлады навесці парадак на Савецкай плошчы — абмежаваць колькасць электратранспарту на пешаходнай зоне. Апошнія прыслухаліся і 19 жніўня забаранілі прыватнікам здаваць на пешаходнай зоне электракарты і электраскутары.
Нагадаем, за апошні час пачасціліся выпадкі траўміравання людзей на Савецкай плошчы. 12 жніўня 7-гадовае дзіця за рулём электракарта па неасцярожнасці збіла жанчыну. Тая ўпала на плітку і атрымала страсенне мозгу, закрытую чэрапна-мазгавую траўму і шматлікія ўдары. Міліцыя праводзіць праверку. На наступны дзень медыцынская дапамога спатрэбілася ўжо іншай жанчыне, яе таксама збіў на электракарце юны гарадзенец. 17 жніўня медыцынская дапамога спатрэбілася дзіцяці, якое падчас язды на электрасамакаце сутыкнулася з электракартам.
